ശബരിമല: കണ്ണുകള്‍ക്കും മനസ്സിനും പുണ്യമായി മകരജ്യോതി കണ്ട് ഭക്തലക്ഷങ്ങള്‍ മലയിറങ്ങി. തിരുവാഭരണവിഭൂഷിതനായ അയ്യപ്പസ്വാമിയെ കണാന്‍ വന്‍ തിരക്കാണ് ശബരിമലയില്‍ അനുഭവപ്പെട്ടത്.
വൈകുന്നേരം 6.42ന് ദീപാരാധനയ്ക്കായി നട തുറന്നപ്പോള്‍ സന്നിധാനവും പരിസരവും ശരണംവിളികളാല്‍ മുഖരിതമായി. ദീപാരാധനയ്ക്കു ശേഷം പൊന്നമ്പലമേട്ടില്‍ മൂന്നുതവണ മകരജ്യോതി മിന്നിമറഞ്ഞു. ഇതോടെ ശരണം വിളികള്‍ ഉച്ചസ്ഥായിയിലായി.
ഇന്നലെ പുലര്‍ച്ചെ നടന്ന മകരസംക്രമപൂജയ്ക്ക് കവടിയാര്‍ കൊട്ടാരത്തില്‍നിന്നു പ്രത്യേക ദൂതന്‍ വശം കൊടുത്തയച്ച നെയ്യ് അഭിഷേകം ചെയ്തു. പുലര്‍ച്ചെ ഒന്നിനു നട തുറന്ന് 1.27ന് പൂജ നടത്തി നട അടച്ചു. തുടര്‍ന്ന് പുലര്‍ച്ചെ മൂന്നിനു പതിവു പൂജകള്‍ക്കായി നട തുറന്നു. ഉച്ചയ്ക്കു നട അടച്ചു. വൈകുന്നേരം അഞ്ചിനു നട തുറന്നു തിരുവാഭരണം സ്വീകരിക്കാനുള്ള മാല പൂജിച്ചു നല്‍കി. ശരംകുത്തിയില്‍ ദേവസ്വം അധികൃതരുടെയും പോലീസിന്റെയും നേതൃത്വത്തില്‍ തിരുവാഭരണപേടകങ്ങള്‍ സ്വീകരിച്ചു.
പതിനെട്ടാംപടി കയറി കൊടിമരച്ചുവട്ടിലെത്തിയ തിരുവാഭരണ പേടകങ്ങള്‍ സ്വീകരിക്കാന്‍ മന്ത്രി വി.എസ്. ശിവകുമാര്‍, ദേവസ്വം ബോര്‍ഡംഗങ്ങളായ അജയ് തറയില്‍, പി.കെ. കുമാരന്‍ തുടങ്ങിയവര്‍ സന്നിഹിതരായിരുന്നു. തന്ത്രി കണ്ഠര് മഹേഷ് മോഹനര്, മേല്‍ശാന്തി എസ്.ഇ. ശങ്കരന്‍ നമ്പൂതിരി എന്നിവര്‍ ചേര്‍ന്നു പേടകങ്ങള്‍ ഏറ്റുവാങ്ങി ശ്രീകോവിലിനുള്ളില്‍ കൊണ്ടുപോയി ചാര്‍ത്തി. നട തുറന്ന് ദീപാരാധന നടന്നു.
