പത്തനംതിട്ട: ഫയര്‍ ആന്റ്‌ റസ്‌ക്യു സര്‍വീസിനെ ആധുനിക വത്‌ക്കരിക്കുന്നതിന്‌ 120 കോടി രൂപയുടെ ബൃഹത്‌ പദ്ധതി നടപ്പാക്കുമെന്ന്‌ ആഭ്യന്തര മന്ത്രി രമേശ്‌ ചെന്നിത്തല പറഞ്ഞു. കോന്നി ഫയര്‍ സ്റ്റേഷന്റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം.
ഫയര്‍ ആന്റ്‌ റസ്‌ക്യു സര്‍വീസിന്റെ ആഭിമുഖ്യത്തില്‍ സ്‌കൂള്‍, കോളേജ്‌ വിദ്യാര്‍ഥികള്‍ക്കായി നീന്തല്‍ പരിശീലനം നല്‍കും. രക്ഷാപ്രവര്‍ത്തനം സംബന്ധിച്ച്‌ ജനങ്ങള്‍ക്ക്‌ ബോധവത്‌ക്കരണം നല്‍കുന്നതിന്‌ കോന്നിയില്‍ രണ്ടു മണിക്കൂര്‍ വരുന്ന ഫയര്‍ ഷോ സംഘടിപ്പിക്കും. ഫയര്‍ ആന്റ്‌ റസ്‌ക്യു സര്‍വീസില്‍ സ്‌ത്രീകള്‍ക്ക്‌ ജോലി ലഭിക്കുന്നതിന്‌ നിയമഭേദഗതി വരുത്തും. കോന്നി ഫയര്‍ സ്റ്റേഷന്‌ പുതിയ ഒരു ഫയര്‍ എന്‍ജിന്‍ കൂടി നല്‍കും. ചാല, എറണാകുളം ഹൈക്കോടതി, കോഴിക്കോട്‌ മിഠായിത്തെരുവ്‌ എന്നിവിടങ്ങളില്‍ സാറ്റലൈറ്റ്‌ ഫയര്‍ സ്റ്റേഷനുകള്‍ സ്ഥാപിക്കും. സംസ്ഥാന സര്‍ക്കാര്‍ പുതുതായി 83 ഫയര്‍ എന്‍ജിനുകള്‍ പുറത്തിറക്കി. ഇതിനു പുറമെ 65 ജീപ്പുകളും 22 ആംബുലന്‍സുകളും ഫയര്‍ഫോഴ്‌സിനായി വാങ്ങും. ഫ്‌ളാറ്റ്‌ ഉള്‍പ്പടെയുള്ള വലിയ കെട്ടിടങ്ങളില്‍ രക്ഷാപ്രവര്‍ത്തനം നടത്തുന്നതിന്‌ സ്‌കൈ ലിഫ്‌റ്റ്‌ സംവിധാനം വാങ്ങുമെന്നും ആഭ്യന്തര മന്ത്രി പറഞ്ഞു.
വിമാനത്താവളങ്ങളില്‍ ഉപയോഗിക്കുന്ന അത്യാധുനിക സൗകര്യങ്ങളോടുകൂടിയ രണ്ടു ഫയര്‍ എന്‍ജിനുകള്‍ സംസ്ഥാന ദുരന്ത നിവാരണ വിഭാഗം ഫയര്‍ ആന്റ്‌ റസ്‌ക്യു വകുപ്പിനു വാങ്ങി നല്‍കുമെന്ന്‌ യോഗത്തില്‍ അധ്യക്ഷത വഹിച്ച റവന്യു മന്ത്രി അടൂര്‍ പ്രകാശ്‌ പറഞ്ഞു. കോന്നി ഫയര്‍ സ്റ്റേഷനു വേണ്ടി ഭൂമി കണ്ടെത്താനായി സര്‍വ്വെ നടത്തുമെന്നും മന്ത്രി പറഞ്ഞു. ഫയര്‍ ആന്റ്‌ റെസ്‌ക്യു സര്‍വീസസ്‌ അഡ്‌മിനിസ്‌ട്രേഷന്‍ ഡയറക്‌ടര്‍ ജോ കുരുവിള ഈശോ, കോന്നി ബ്ലോക്ക്‌ പഞ്ചായത്ത്‌ പ്രസിഡന്റ്‌ കോന്നിയൂര്‍ പി.കെ, ഗ്രാമ പഞ്ചായത്ത്‌ പ്രസിഡന്റ്‌ എം.രജനി, ജില്ലാ പഞ്ചായത്തംഗങ്ങളായ എലിസബേത്ത്‌ അബു, ബിനിലാല്‍, ബ്ലോക്ക്‌ പഞ്ചായത്തംഗം ലീല രാജന്‍, ഗ്രാമ പഞ്ചായത്ത്‌ വൈസ്‌ പ്രസിഡന്റ്‌ പ്രവീണ്‍ പ്ലാവിളയില്‍ തുടങ്ങിയവര്‍ പങ്കെടുത്തു
