തിരുവനന്തപുരം: മലയാളി ശാസ്ത്ര സാങ്കേതിക വിദഗ്ദ്ധരെ കേരളത്തില്‍ തന്നെ നിലനിര്‍ത്തുന്നതിന് സംസ്ഥാനത്തെ ശാസ്ത്ര സാങ്കേതിക സ്ഥാപനങ്ങളില്‍ ലോകോത്തര നിലവാരത്തിലുള്ള സാങ്കേതിക സൗകര്യവും അടിസ്ഥാന സൗകര്യവും ഒരുക്കുമെന്ന് മുഖ്യമന്ത്രി ഉമ്മന്‍ ചാണ്ടി പറഞ്ഞു. സംസ്ഥാന മൃഗസംരക്ഷണ വകുപ്പ് പാലോട് ചീഫ് ഡിസീസ് ഇന്‍വെസ്റ്റിഗേഷന്‍ ഓഫീസ് പരിസരത്ത് പുതുതായി ആരംഭിച്ച ബയോ സേഫ്റ്റി ലെവല്‍-2 സുരക്ഷാ സംവിധാന ലബോറട്ടറി സമുച്ചയം ഉദ്ഘാടനം ചെയ്യുകയായിരുന്നു മുഖ്യമന്ത്രി. പച്ചക്കറി, പാലുത്പാദനത്തില്‍ സംസ്ഥാനം സ്വയംപര്യാപ്തത കൈവരിക്കേണ്ടതുണ്ടെന്നും അതിനായി സാങ്കേതിക സംവിധാനങ്ങള്‍ പ്രയോജനപ്പെടുത്തണമെന്നും മുഖ്യമന്ത്രി പറഞ്ഞു.
വളര്‍ത്തുമൃഗങ്ങളില്‍ ഉണ്ടാകുന്ന രോഗങ്ങള്‍ നിര്‍ണയിക്കുന്ന ലോക നിലവാരത്തിലുള്ള ലബോറട്ടറിയാണ് പാലോട് ഉദ്ഘാടനം ചെയ്തതെന്ന് അധ്യക്ഷത വഹിച്ച കൃഷി മന്ത്രി കെ.പി. മോഹനന്‍ പറഞ്ഞു. രോഗ നിര്‍ണയത്തിനായി ഇതര സംസ്ഥാനങ്ങളെ ആശ്രയിക്കേണ്ട സ്ഥിതി ഇനി ഉണ്ടാകില്ലെന്നും മറ്റു സംസ്ഥാനങ്ങള്‍ക്ക് ഇവിടെ പരിശോധനയ്ക്ക് കേരളത്തെ സമീപിക്കാവുന്നതാണെന്നും മന്ത്രി പറഞ്ഞു.
മോളിക്യുലാര്‍ ബയോളജി ലബോറട്ടറിയുടെ ഉദ്ഘാടനം ഡപ്യൂട്ടി സ്പീക്കര്‍ പാലോട് രവിയും സെല്‍ കളക്ടര്‍ ലബോറട്ടറി ഉദ്ഘാടനം കോലിയക്കോട് എം. കൃഷ്ണന്‍ നായര്‍ എം.എല്‍.എ.യും റസിഡ്യൂ അനലിറ്റിക്കല്‍ ലബോറട്ടറിയുടെ ഉദ്ഘാടനം തിരുവനന്തപുരം ജില്ലാ പഞ്ചായത്ത് പ്രസിഡന്റ് വി.കെ. മധുവും വി.ഐ.പി. ഗസ്റ്റ് ഹൗസ് ഉദ്ഘാടനം വാമനപുരം ബ്ലോക്ക് പഞ്ചായത്ത് പ്രസിഡന്റ് കെ.പി. ചന്ദ്രനും ബയോമെഡിക്കല്‍ ഇന്‍സിനറേറ്റര്‍ ഉദ്ഘാടനം നന്ദിയോട് ഗ്രാമപഞ്ചായത്ത് പ്രസിഡന്റ് ഇ.വി അജിത്കുമാറും നിര്‍വഹിച്ചു. മൃഗസംരക്ഷണ വകുപ്പ് ഡയറക്ടര്‍ ഡോ. എസ്. ചന്ദ്രന്‍കുട്ടി, ചീഫ് ഡിസീസ് ഇന്‍വെസ്റ്റിഗേഷന്‍ ഓഫീസര്‍ ഡോ. പി.കെ. സദാനന്ദന്‍, ഗ്രാമ, ബ്ലോക്ക് പഞ്ചായത്ത് പ്രസിഡന്റുമാര്‍, സ്റ്റാന്‍ഡിംഗ് കമ്മിറ്റി അംഗങ്ങള്‍, മെമ്പര്‍മാര്‍ തുടങ്ങിയവര്‍ പങ്കെടുത്തു.
