പത്തനംതിട്ട: വരള്‍ച്ചാ ലഘൂകരണത്തിന്റെ ഭാഗമായി ജില്ലയിലെ 55 കുളങ്ങളും 82 പൊതുകിണറുകളും പുനരുദ്ധരിക്കുമെന്ന്‌ ജില്ലാ കളക്‌ടര്‍ എസ്‌.ഹരികിഷോര്‍ അറിയിച്ചു. 1.3 കോടി രൂപ ചെലവഴിച്ച്‌ ജില്ലാ ദുരന്ത നിവാരണ അതോറിറ്റിയുടെ മേല്‍നോട്ടത്തില്‍ നടത്തുന്ന പ്രവൃത്തികളില്‍ കുടുംബശ്രീ ജില്ലാ മിഷനും ദാരിദ്ര്യ ലഘൂകരണ വിഭാഗവും പങ്കാളികളാകും.
ദാരിദ്ര്യ ലഘൂകരണ വിഭാഗം 33.79 ലക്ഷം രൂപയും കുടുംബശ്രീ ജില്ലാ മിഷന്‍ 44.17 ലക്ഷം രൂപയും ചെലവഴിക്കും. ബാക്കി തുക സംസ്ഥാന ദുരന്ത നിവാരണ ഫണ്ടില്‍ നിന്നും കണ്ടെത്തും. ജില്ലയിലെ 24 ഗ്രാമ പഞ്ചായത്തുകളിലെയും പത്തനംതിട്ട മുനിസിപ്പാലിറ്റിയിലെയും പട്ടികജാതി-വര്‍ഗ വിഭാഗങ്ങള്‍ ഉള്‍പ്പടെയുള്ളവരുടെ വാസകേന്ദ്രങ്ങളിലെ ജലാശയങ്ങളാണ്‌ പുനരുദ്ധാരണത്തിനായി തിരഞ്ഞെടുത്തിരിക്കുന്നത്‌. പഞ്ചായത്ത്‌ സെക്രട്ടറി, അസിസ്റ്റന്റ്‌ എന്‍ജിനിയര്‍ എന്നിവര്‍ മേല്‍നോട്ടം വഹിക്കുന്ന നിര്‍മാണ പ്രവൃത്തികള്‍ ദുരന്ത നിവാരണം ഡെപ്യൂട്ടി കളക്‌ടര്‍ പരിശോധിക്കും.
Discussion about this post