ന്യൂഡല്ഹി : സിയാച്ചിനില് ഹിമപാതത്തിലകപ്പെട്ട് ആറാം ദിവസം ജീവനോടെ കണ്ടെത്തിയ ധീരസൈനികന് ലാന്സ് നായിക് ഹനുമന്തപ്പ ഒടുവില് മരണത്തിന് കീഴടങ്ങി . രാജ്യം മുഴുവന് പ്രാര്ത്ഥനയോടെ കാത്തിരിക്കുമ്പോഴാണ് മരണവാര്ത്ത എത്തിയത്. ഡല്ഹിയിലെ ആര്. ആര് ഹോസ്പിറ്റലിലായിരുന്നു അന്ത്യം സംഭവിച്ചത്. കരളും വൃക്കയും പ്രവര്ത്തന രഹിതമായതോടെ ഡോക്ടര്മാരുടെ പ്രതീക്ഷ മങ്ങിയിരുന്നു . ന്യൂമോണിയ ഗുരുതരമായതോടെ എല്ലാ പ്രതീക്ഷകളും അവസാനിക്കുകയായിരുന്നു . പ്രവര്ത്തന രഹിതമായ ആന്തരാവയങ്ങള് സാധാരണ നിലയിലേക്കെത്തിക്കാന് കിണഞ്ഞ് പരിശ്രമിച്ചെങ്കിലും സാധിച്ചില്ല.
ഹനുമന്തപ്പയുടെ നില അതീവ ഗുരുതരമാണെന്ന മെഡിക്കല് റിപ്പോര്ട്ട് രാവിലെ തന്നെ പുറത്തു വന്നിരുന്നു. രക്തം കട്ടപിടിച്ചത് തടയാന് എല്ലാ ശ്രമങ്ങളും നടത്തിയെങ്കിലും ഫലവത്താവുന്നില്ലെന്ന് റിപ്പോര്ട്ടില് പറഞ്ഞിരുന്നു . കോമയുടെ അങ്ങേയറ്റത്തെ ഘട്ടത്തിലാണ് ഹനുമന്തപ്പയെന്ന് മെഡിക്കല് ബുള്ളറ്റിന് വ്യക്തമാക്കിയിരുന്നു . തുടര്ന്നാണ് രാവിലെ 11. 45 ഓടെ മരണം സ്ഥിരീകരിച്ചത് .
Discussion about this post