ഒളിമ്പിക്‌സില്‍ ഇന്ത്യയുടെ യശസ്സുയര്‍ത്തി സിന്ദു ഫൈനലില്‍ കടന്നു

റിയോ ഡി ഷാനെറോ: റിയോ ഒളിമ്പിക്‌സില്‍ ഇന്ത്യയുടെ പി.വി.സിന്ധു ബാഡ്മിന്റണില്‍ മികച്ച പ്രകടനത്തോടെ ഫൈനലില്‍ കടന്ന് മെഡല്‍ ഉറപ്പിച്ചു. 58 കിലോഗ്രാം ഫ്രീസ്റ്റൈല്‍ ഗുസ്തിയില്‍ സാക്ഷി വെങ്കലം സ്വന്തമാക്കിയിരുന്നു. ലോക അഞ്ചാം നമ്പര്‍ ജാപ്പനീസ് താരം നൊസോമി ഒകുഹാരയെ നേരിട്ടുള്ള ഗെയിമുകള്‍ക്കു പരാജയപ്പെടുത്തിയാണ് 10-ാം റാങ്ക് സിന്ധു ഫൈനലില്‍ കടന്നത്. സ്‌കോര്‍: 21-18, 21-10. കലാശപ്പോരാട്ടത്തില്‍ ലോക ഒന്നാം നമ്പര്‍ സ്‌പെയിനിന്റെ കരോളിന മരീനെയാണ് സിന്ധു നേരിടുക. ബാഡ്മിന്റണ്‍ ചരിത്രത്തില്‍ ആദ്യമായാണ് ഒരു ഇന്ത്യന്‍ താരം ഒളിമ്പിക് ഫൈനലില്‍ കടക്കുന്നത്.

മത്സരത്തിലുടനീളം സിന്ധുവിനായിരുന്നു മേല്‍ക്കൈ നിലനിന്നിരുന്നത്. ആദ്യ ഗെയിമിന്റെ തുടക്കത്തില്‍ ലീഡ് നേടിയ സിന്ധു തകര്‍പ്പന്‍ സ്മാഷുകളും ഡ്രോപ് ഷോട്ടുകളും ബാക് ഹാന്‍ഡ് ഷോട്ടുകളുമായി കളംനിറഞ്ഞു. കിട്ടിയ അവസരങ്ങള്‍ മുതലെടുത്ത് ഒകുഹാര ഒരു ഘട്ടത്തില്‍ 17-15 എന്ന നിലയിലെത്തിയിരുന്നു. എന്നാല്‍, 125 കോടി ജനങ്ങളുടെ പ്രതീക്ഷകള്‍ അത്ര എളുപ്പത്തില്‍ തല്ലിക്കെടുത്താന്‍ തയാറല്ലാതിരുന്ന സിന്ധു 21-19 എന്ന സ്‌കോറിന് ആദ്യ ഗെയിം സ്വന്തമാക്കി.

രണ്ടാം ഗെയിം സിന്ധുവിന്റെ തകര്‍പ്പന്‍ പ്രകടനത്തോടെയാണ് ആരംഭിച്ചത്. 3-0ന്റെ ലീഡ് തുടക്കത്തില്‍ സിന്ധു നേടിയെങ്കിലും തിരിച്ചടിച്ച ഒകുഹാര തുടര്‍ച്ചയായി അഞ്ചു പോയിന്റുകള്‍ നേടി തിരിച്ചുവരവിന്റെ സൂചനകള്‍ പ്രകടിപ്പിച്ചു. തുടര്‍ന്ന് ഇരുവരും ഒപ്പത്തിനൊപ്പം സ്മാഷുകള്‍ പായിച്ചപ്പോള്‍ പോയിന്റ് നില 5-5, 8-8, 10-10 എന്നായി. ഇവിടെനിന്നായിരുന്നു രണ്ടാം സെറ്റിലെ സിന്ധുവിന്റെ പടയോട്ടം ആരംഭിച്ചത്. തകര്‍പ്പന്‍ ബാക്ഹാന്‍ഡ് ഷോട്ടുകളും ഡ്രോപ് ഷോട്ടുകളും ഉതിര്‍ത്ത സിന്ധുവിനു മുന്നില്‍ മറുപടിയില്ലാതായിപ്പോയ ഒകുഹാര തുടര്‍ച്ചയായി 11 പോയിന്റുകള്‍ വഴങ്ങി മത്സരം ഇന്ത്യന്‍ താരത്തിന്റെ പേരിലെഴുതി. ഒരു തകര്‍പ്പന്‍ ഡ്രോപ് ഷോട്ടിലൂടെയായിരുന്നു സിന്ധു വിജയം ഉറപ്പാക്കിയത്.