മുംബൈ : മുംബൈയില് ദമ്പതികളും ബന്ധുക്കളുമടക്കം അഞ്ചുപേര് ഭീകര സംഘടനയായ ഇസ്ളാമിക് സ്റ്റേറ്റില് ചേര്ന്നതായി റിപ്പോര്ട്ട്. അഷ്ഫഖ് അഹമ്മദ് (26), ഭാര്യ, മകള്, ബന്ധുക്കളായ മുഹമ്മദ് സിറാജ് (22), ഇജാസ് റഹ്മാന് (30) എന്നിവരാണു കഴിഞ്ഞ ജൂണില് ഐഎസില് ചേരാനായി രാജ്യം വിട്ടത്.
ഇസ്ളാമിക് സ്റ്റേറ്റില് ചേരാനായി രാജ്യം വിട്ടെന്നും തിരിച്ചുവരാന് ആഗ്രഹിക്കുന്നില്ലെന്നും മാതാപിതാക്കളെ സംരക്ഷിക്കണമെന്നും പറഞ്ഞ് തന്റെ ഇളയ സഹോദരനു ജൂണ് അവസാനം അഷ്ഫഖ് മൊബൈല് സന്ദേശം അയച്ചിരുന്നു. ഇതിനുപിന്നാലെയാണ് ഓഗസ്റ്റ് ആറിന് അഷ്ഫഖിന്റെ പിതാവ് അബ്ദുല് മജീദ് പരാതിയുമായി പൊലീസിനെ സമീപിച്ചത്. മതപ്രഭാഷകനായ മുഹമ്മദ് ഹനീഫ്, അഷ്ഫാഖിനൊപ്പം സിറിയ സന്ദര്ശിച്ച മലയാളിയായ ഒരു സ്കൂള് അധ്യാപകന്, നവി മുംബൈ സ്വദേശി ആര്ഷി ഖുറേഷി, കല്യാണ് സ്വദേശി റിസ്വാന് ഖാന് എന്നിവര് ചേര്ന്നു തന്റെ മകനെ ഐഎസില് ചേര്ത്തുവെന്നാണു മജീദിന്റെ പരാതി.
പരാതിയെത്തുടര്ന്ന് മതപ്രഭാഷകനായ മുഹമ്മദ് ഹനീഫിനെ ക്രൈംബ്രാഞ്ച് കസ്റ്റഡിയിലെടുത്തു. ആര്ഷി ഖുറേഷിയും റിസ്വാന് ഖാനും മലയാളികളെ ഐഎസിലേക്കു റിക്രൂട്ട് ചെയ്ത കേസില് കേരള പൊലീസിന്റെ കസ്റ്റഡിയിലാണ്. സംഭവം ഞെട്ടിപ്പിക്കുന്നതാണെന്നും ഇതില് ഹനീഫിനു പങ്കുണ്ടോയെന്ന് അന്വേഷിക്കുന്നുണ്ടെന്നും ക്രൈം ബ്രാഞ്ച് ഉദ്യോഗസ്ഥന് അറിയിച്ചു.
