തിരുവനന്തപുരം: പശുക്കളെ ഇന്‍ഷ്വര്‍ ചെയ്യുന്ന പദ്ധതി നടപ്പാക്കാന്‍ സര്‍ക്കാര്‍ ഉദ്ദേശിക്കുന്നതായി വനം, മൃഗസംരക്ഷണം, ക്ഷീരവികസനം മന്ത്രി കെ. രാജു പറഞ്ഞു. സര്‍ക്കാര്‍ വിഹിതത്തോടെയാണ് പദ്ധതി നടപ്പാക്കുന്നത്.
മൃഗസംരക്ഷണ വകുപ്പിന്റെ ആഭിമുഖ്യത്തില്‍ തിരുവനന്തപുരം കനകക്കുന്ന് കൊട്ടാരത്തില്‍ കര്‍ഷക പുരസ്‌കാരങ്ങള്‍ വിതരണം ചെയ്തു സംസാരിക്കുകയായിരുന്നു അദ്ദേഹം. ക്ഷീരകര്‍ഷകരെ കാര്‍ഷിക രംഗത്ത് പിടിച്ചു നിര്‍ത്താനാവശ്യമായ കൂടുതല്‍ നടപടികള്‍ സ്വീകരിക്കുമെന്നും അദ്ദേഹം പറഞ്ഞു. വീടുകളില്‍ ഒന്നോ രണ്ടോ പശുക്കളെ മാത്രം വളര്‍ത്തുന്ന ചെറുകിട കര്‍ഷകര്‍ക്കു പ്രോത്സാഹനവും പ്രചോദനവും നല്‍കും. ക്ഷീരകര്‍ഷകര്‍ക്ക് അധ്വാനത്തിനനുസരിച്ചുളള ആദായം ലഭിക്കണം.
വെറ്ററിനറി ആശുപത്രികള്‍ ഇല്ലാത്തിടങ്ങളില്‍ സ്ഥാപിച്ച് ഡോക്ടര്‍മാരെ നിയമിക്കും. മുഴുവന്‍ ബ്ലോക്കുകളിലും 24 മണിക്കൂര്‍ ഡോക്ടര്‍മാരുടെ സേവനം ഉറപ്പുവരുത്താന്‍ നടപടി സ്വീകരിക്കും. പേവിഷ വാക്‌സിനുകള്‍ കേരളത്തില്‍ നിര്‍മ്മിക്കാനാവശ്യമായ നടപടി കൈകൊളളും. വരുന്ന രണ്ടോ മൂന്നോ വര്‍ഷത്തിനകം അത് ലക്ഷ്യത്തിലേക്ക് എത്തിക്കുമെന്നും മന്ത്രി പറഞ്ഞു. കാലവര്‍ഷ കെടുതിയില്‍ കൃഷിനാശം സംഭവിച്ച കര്‍ഷകര്‍ക്ക് ധനസഹായം മന്ത്രി വിതരണം ചെയ്തു. ജില്ലകളില്‍ മികച്ച രീതിയില്‍ വാക്‌സിനേഷന്‍ നടപ്പാക്കിയ ഉദ്യോഗസ്ഥര്‍ക്ക് പുരസ്‌കാരങ്ങളും നല്‍കി.
കെ.മുരളീധരന്‍ എം.എല്‍.എ അധ്യക്ഷത വഹിച്ചു. ഡെപ്യൂട്ടി മേയര്‍ രാഖി രവികുമാര്‍, മൃഗസംരക്ഷണ വകുപ്പ് ഡയറക്ടര്‍ ഡോ. എന്‍.എന്‍.ശശി, ക്ഷീര വികസന വകുപ്പ് ഡയറക്ടര്‍ ജോര്‍ജ്ജ് കുട്ടി ജേക്കബ്, കെ.എസ്.പി.ഡി.സി എം.ഡി ഡോ.സുനില്‍കുമാര്‍, കെ.എല്‍.ഡി.ബോര്‍ഡ് എം.ഡി ഡോ.ജോസ് ജെയിംസ് തുടങ്ങിയവര്‍ സംസാരിച്ചു
Discussion about this post