തിരുവനന്തപുരം: ഇരുപത്തിയൊന്നാമത് അന്താരാഷ്ട്ര ചലച്ചിത്രമേളയ്ക്കുള്ള ഡെലിഗേറ്റ് പാസുകളുടെ വിതരണം പ്രമുഖ ചലച്ചിത്രനടിയും ചലച്ചിത്ര അക്കാഡമി ജനറല്‍ കൗണ്‍സില്‍ അംഗവുമായ മഞ്ജുവാര്യര്‍ക്ക് പാസും മീഡിയാ കിറ്റും നല്‍കി സാംസ്‌കാരിക മന്ത്രി എ.കെ. ബാലന്‍ ഉദ്ഘാടനം ചെയ്തു. ടാഗോര്‍ തിയറ്ററിലെ കൗണ്ടറില്‍നിന്ന് ഡെലിഗേറ്റുകള്‍ക്ക് പാസുകള്‍ വിതരണം ചെയ്യും.
പതിമൂന്നു തിയറ്ററുകളിലായി ഒമ്പതിനായിരം പേര്‍ക്കാണ് സിനിമ കാണാന്‍ സൗകര്യമുള്ളത്. എന്നാല്‍ അപേക്ഷകരുടെ എണ്ണം കൂടുതലായതിനാല്‍ പന്ത്രണ്ടായിരത്തോളം പേര്‍ക്ക് പാസുകള്‍ അനുവദിച്ചിട്ടുണ്ട്. തന്മൂലമുണ്ടായേക്കാവുന്ന ചെറിയ ചെറിയ അസൗകര്യങ്ങള്‍ ക്ഷമിച്ച് മേളയുടെ വിജയത്തിനായി സിനിമാപ്രേമികള്‍ സഹകരിക്കണമെന്ന് മന്ത്രി പറഞ്ഞു. ഡിസംബര്‍ 9നാണ് ചലച്ചിത്രമേള തുടങ്ങുന്നത്. വൈകിട്ട് ആറിന് നിശാഗന്ധി ഓഡിറ്റോറിയത്തില്‍ നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ മേള ഉദ്ഘാടനം ചെയ്യും. വിശ്രുത ചലച്ചിത്രനടനും സംവിധായകനുമായ അമോല്‍ പലേക്കര്‍ വിശിഷ്ടാതിഥിയായിരിക്കും. മേളയോടനുബന്ധിച്ച് നല്‍കുന്ന ലൈഫ്‌ടൈം അച്ചീവ്‌മെന്റ് അവാര്‍ഡ് വിഖ്യാത ചെക്കോസ്ലാവാക്യന്‍ സംവിധായകന്‍ ജിറി മെന്‍സിലിന് സമ്മാനിക്കും.
അറുപത്തിരണ്ട് രാജ്യങ്ങളില്‍ നിന്നുള്ള 185 ചിത്രങ്ങളാണ് പല വിഭാഗങ്ങളിലായി മേളയില്‍ പ്രദര്‍ശിപ്പിക്കുന്നത്. അഫ്ഗാന്‍ ചിത്രമായ പാര്‍ട്ടിംഗ് ആണ് ഉദ്ഘാടന ചിത്രം. സിനിമയോടുള്ള ജനങ്ങളുടെ അഭിനിവേശം നാള്‍ക്കുനാള്‍ കൂടിക്കൊണ്ടിരിക്കുന്നുവെന്നതിനു തെളിവാണ് ഓരോവര്‍ഷവും ചലച്ചിത്രമേളയ്ക്കുള്ള ഡെലിഗേറ്റുകളുടെ എണ്ണത്തിലുള്ള അനിയന്ത്രിതമായ വര്‍ധന. ഇത്രയും പ്രേക്ഷകര്‍ക്ക് ചലച്ചിത്രമേളയില്‍ ഒരിടത്തിരുന്ന് സിനിമകാണാന്‍ സൗകര്യമുണ്ടാകുന്ന വിധത്തില്‍ നൂറുകോടി രൂപ ചെലവില്‍ തിയേറ്റര്‍ കോംപ്ലക്‌സ് നിര്‍മിക്കാനുള്ള നടപടികളുമായി സര്‍ക്കാര്‍ മുന്നോട്ടുപോകുകയാണ്. അതിനൊപ്പം ചിത്രാഞ്ജലി സ്റ്റുഡിയോയെ മിനി ഫിലിംസിറ്റിയായി ഉയര്‍ത്താനും നടപടിയായി. അന്താരാഷ്ട്ര ചില്‍ഡ്രന്‍സ് ഫിലിം ഫെസ്റ്റിവല്‍ സംഘടിപ്പിക്കുവാനും ഈ സര്‍ക്കാര്‍ ആലോചിക്കുന്നുണ്ട്. ഇതിന്റെ ഭാഗമായി ദേശീയ ചലച്ചിത്രോത്സവവും സംഘടിപ്പിക്കും.
ഓരോ ജില്ലയിലും നാല്‍പതു കോടി ചെലവില്‍ സിഥിരം കള്‍ച്ചറല്‍ കോംപ്ലക്‌സുകളും ഗ്രാമപ്രദേശങ്ങളില്‍ അന്യംനിന്നു പോകുന്ന സിനിമാ ടാക്കീസുകളെ തിരിച്ചുകൊണ്ടുവരുന്നതിനായി നൂറു പുതിയ സിനിമാ തിയേറ്ററുകളും സ്ഥാപിക്കാനും സര്‍ക്കാര്‍ മുന്‍കൈയെടുക്കും. സിനിമാമേഖലയില്‍ പുതിയ തൊഴിലവസരങ്ങള്‍ സൃഷ്ടിക്കാനും ഉയര്‍ന്നു വരുന്ന പുതിയ കലാകാരന്മാര്‍ക്ക് പ്രോത്സാഹനം നല്‍കാനുമുള്ള ലക്ഷ്യത്തോടെയാണ് സര്‍ക്കാരിന്റെ ഈ നടപടികളെന്നും മന്ത്രി പറഞ്ഞു.
ഭിന്ന ലിംഗക്കാര്‍ക്കുള്ള പാസുകളുടെ വിതരണോദ്ഘാടനം നടിയും ആക്ടിവിസ്റ്റുമായ ശീതള്‍ ശ്യാമിനു പാസും മീഡിയാ കിറ്റും നല്‍കി മഞ്ജു വാര്യര്‍ നിര്‍വഹിച്ചു. സാംസ്‌കാരിക വകുപ്പ് സെക്രട്ടറി റാണി ജോര്‍ജ് സ്വാഗതം പറഞ്ഞ ചടങ്ങില്‍ ചലച്ചിത്ര അക്കാഡമി ചെയര്‍മാന്‍ കമല്‍ അധ്യക്ഷത വഹിച്ചു. ചലച്ചിത്ര വികസന കോര്‍പ്പറേഷന്‍ ചെയര്‍മാന്‍ ലെനിന്‍ രാജേന്ദ്രന്‍, കെ.ടി.ഡി.സി. ചെയര്‍മാന്‍ എം. വിജയകുമാര്‍, ഫെസ്റ്റിവല്‍ ഡയറക്ടര്‍ ബീനാ പോള്‍, സംവിധായകന്‍ ടി.വി. ചന്ദ്രന്‍, നടിയും ആക്ടിവിസ്റ്റുമായ ശീതള്‍ ശ്യാം, ചലച്ചിത്ര അക്കാഡമി സെക്രട്ടറി മഹേഷ് പഞ്ചു എന്നിവര്‍ സംബന്ധിച്ചു.
Discussion about this post