കൊച്ചി: മലയാള സിനിമാ പ്രദര്ശനത്തിനു തടസമായിരുന്ന തിയറ്റര് സമരം പിന്വലിച്ചു. സര്ക്കാര് ചര്ച്ചയ്ക്ക് വിളിച്ചിരിക്കുന്ന സാഹചര്യത്തിലാണ് ഫിലിം എക്സിബിറ്റേഴ്സ് ഫെഡറേഷന് സമരം പിന്വലിച്ചത്. ഇന്നു മുതല് പ്രദര്ശനം തുടങ്ങുമെന്ന് സംഘടനയുടെ പ്രസിഡന്റ് ലിബര്ട്ടി ബഷീര് അറിയിച്ചു. മുഖ്യമന്ത്രിയുടെ വാക്കുകള് വിശ്വസിക്കുന്നു. ജനുവരി 26ന് വിളിച്ചിരിക്കുന്ന ചര്ച്ചയില് പ്രതീക്ഷയുണ്ടെന്നും ബഷീര് കൂട്ടിച്ചേര്ത്തു.
പുതിയ സംഘടന തുടങ്ങാന് നീക്കം നടക്കുന്നതിനിടെയാണ് സമരം പിന്വലിച്ചത്. വിജയ് നായകനായ തമിഴ് ചിത്രം ഭൈരവ എക്സിബിറ്റേഴ്സ് ഫെഡറേഷനില് അംഗങ്ങളായിരുന്ന 73 തിയറ്ററുകളില് പ്രദേശിപ്പിച്ചിരുന്നു. ഇതു ഫെഡറേഷന്റെ നീക്കത്തിന് തിരിച്ചടിയായിരുന്നു. ഇതിന്റെ അടിസ്ഥാനത്തില് നടനും ഡി സിനിമാസ് തിയറ്റര് ഉടമയുമായ ദിലീപ്, ആന്റണി പെരുമ്പാവൂര് എന്നിവരും സെന്ട്രല് പിക്ചേഴ്സ്, ഇവിഎം, മുത്തൂറ്റ് ഗ്രൂപ്പ് തുടങ്ങി നിരവധി തിയറ്റര് ഉടമകളും വിതരണക്കാരും നിര്മാതാക്കളും ചേര്ന്നു പുതിയ സംഘടന രൂപീകരിക്കാനുള്ള ശ്രമത്തിലാണ്. ഇന്നു കൊച്ചിയില് നിര്മാതാക്കളും വിതരണക്കാരും തിയറ്റര് ഉടമകളും ചേരുന്ന ആലോചന യോഗത്തിനുശേഷം പുതിയ സംഘടന പ്രഖ്യാപിച്ചേക്കുമെന്നാണ് കരുതുന്നത്.
ആദ്യദിവസം 206 തിയറ്ററുകളിലായിരുന്നു ഭൈരവ പ്രദര്ശനത്തിന് എത്തിയിരുന്നത്. എന്നാല് ഫിലിം എക്സിബിറ്റേഴ്സ് ഫെഡറേഷന്റെ വിലക്കു ലംഘിച്ചു കഴിഞ്ഞ ദിവസം 31 തിയറ്ററുകളും വെള്ളിയാഴ്ച 42 തിയറ്ററുകളും കൂടി ചിത്രം പ്രദര്ശിപ്പിച്ചു തുടങ്ങിയതോടെ സംഘടന പിളര്പ്പിലേക്ക് നീങ്ങുകയായിരുന്നു. ഇതിനിടെ ട്രഷറര് സാജു ജോണിയുടെ രാജിയും ഫെഡറേഷന്റെ നേതൃത്വത്തിന് തിരിച്ചടിയായി. തിയേറ്ററുകളില്നിന്നുള്ള വരുമാന വിഹിതത്തില് സ്വന്തം പങ്ക് 40ല് നിന്ന് 50 ശതമാനമായി വര്ധിപ്പിച്ചില്ലെങ്കില് റിലീസ് ചിത്രങ്ങള് പ്രദര്ശിപ്പിക്കില്ലെന്നു ഫെഡറേഷന് പ്രഖ്യാപിച്ചതാണു പ്രതിസന്ധിക്കു കാരണമായത്.
Discussion about this post