തിരുവനന്തപുരം: ലോകബാങ്കിന്റെ ധനസഹായത്തോടെ നടപ്പാക്കുന്ന കഴക്കൂട്ടം-അടൂര് കെ.എസ്. ടി.പി. മാതൃകാസുരക്ഷാ റോഡ് പ്രവൃത്തി 2018 മാര്ച്ച് മാസത്തോടെ പൂര്ത്തിയാക്കും. ഇതുമായി ബന്ധപ്പെട്ട് മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന യോഗത്തിലാണ് തീരുമാനം.
78.65 കീ.മി. വരുന്ന റോഡാണ് മാതൃകാസുരക്ഷാ റോഡായി മാറ്റുന്നത്. റോഡ്നിര്മ്മാണത്തിന് ലോകോത്തര നിലവാരവുമുളള സാങ്കേതിക വിദ്യയാണ് ഉപയോഗിക്കുന്നത്. ബിറ്റുമിന് കോണ്ക്രീറ്റ് ഉപയോഗിക്കല്, തെരഞ്ഞെടുത്ത പ്രധാന കവലകളുടെ വികസനം, ചടയമംഗലം പാലത്തിന്റെ വീതികൂട്ടല്, ഓടകളുടെയും നിലവിലുളള പാലങ്ങളുടെയും പരിപാലനം, നിര്മാണം എന്നിവയ്ക്ക് പ്രാമുഖ്യം നല്കും.
റോഡുസുരക്ഷാ ക്രമീകരണങ്ങളായ റോഡ്മാര്ക്കിംഗ്, സ്റ്റഡ്സ്, ക്രാഷ് ബാര്യര്, ദിശാസൂചക ബോര്ഡുകള്, ഐ.ആര്.സി. പ്രകാരമുളള വേഗതാ നിയന്ത്രണ സംവിധാനങ്ങള്, നടപ്പാതകള്, കൈവരികള്, മീഡിയനുകള് എന്നിവയും പദ്ധതിയില് ഉള്പ്പെടുത്തിയിട്ടുണ്ട്. കൂടാതെ റോഡ് കടന്നുപോകുന്ന സ്ഥലങ്ങളിലെ മെഡിക്കല് കോളേജ് ഉള്പ്പെടെയുളള തെരഞ്ഞെടുത്ത സര്ക്കാര് ആശുപത്രികളില് ട്രോമാകെയര് സംവിധാനം ഏര്പ്പെടുത്തും. അപകടത്തില്പ്പെടുന്നവരെ എത്രയും പെട്ടെന്ന് ആശുപത്രിയില് എത്തിക്കാനുളള ആംബുലന്സ് സംവിധാനങ്ങളും ഇതിന്റെ ഭാഗമായി ഒരുക്കും. കുറ്റകൃത്യങ്ങള് കണ്ടെത്തുന്നതിന് ഇന്റര്നെറ്റ് സംവിധാനത്തോടെയുളള ചിപ്പുകള് ഉള്പ്പെടെയുളള ആധുനിക സാങ്കേതിക വിദ്യകള് ഉപയോഗപ്പെടുത്തും.
146.6 കോടി രൂപ ചെലവില് നവീകരിക്കുന്ന റോഡിന്റെ പ്രവൃത്തി അതിവേഗം പുരോഗമിക്കുകയാണ്. പ്രവൃത്തി നിശ്ചിത സമയത്തിനകം പൂര്ത്തീകരിക്കാന് ബന്ധപ്പെട്ട ഉദ്യോഗസ്ഥര് ജാഗ്രത പുലര്ത്തണമെന്ന് മുഖ്യമന്ത്രി യോഗത്തില് നിര്ദ്ദേശിച്ചു. പൊതുമരാമത്ത് മന്ത്രി ജി. സുധാകരന്, റവന്യൂ പ്രിന്സിപ്പല് സെക്രട്ടറി പി.എച്ച്. കുര്യന്, ആരോഗ്യവകുപ്പ് സെക്രട്ടറി രാജീവ് സദാനന്ദന്, പൊതുമരാമത്ത് വകുപ്പ് സെക്രട്ടറി സുബ്രതാ ബിശ്വാസ്, കെ.എസ്.ടി.പി. പ്രൊജക്ട് ഡയറക്ടര് സതീശന് തുടങ്ങിയവര് പങ്കെടുത്തു.
Discussion about this post