തിരുവനന്തപുരം: പ്രകൃതിയുടെ സന്തുലിതാവസ്ഥ നിലനിര്ത്തിക്കൊണ്ടുള്ള വികസനമാണ് കേരളത്തിന് വേണ്ടതെന്ന് വിദ്യാഭ്യാസമന്ത്രി പ്രൊഫ. സി രവീന്ദ്രനാഥ് പറഞ്ഞു. കുണ്ടറ നിയോജക മണ്ഡലത്തിന്റെ സുസ്ഥിര വികസനത്തിനുള്ള ഇടം പ്രോജക്ടിന്റെ ഭാഗമായി കേരള സര്വകലാശാല രൂപപ്പെടുത്തിയ സമഗ്ര ജല സംരക്ഷണ ഭൂഗര്ഭ ജല പരിപോഷണ മാസ്റ്റര് പ്ലാന് തിരുവനന്തപുരത്ത് പ്രകാശനം ചെയ്യുകയായിരുന്നു അദ്ദേഹം.
ഭാവിക്കായി കരുതേണ്ട വിലപ്പെട്ട സമ്പത്ത് ജൈവവൈവിധ്യങ്ങളായിരിക്കണം. രാജ്യത്ത് മൂവായിരം മില്ലിമീറ്റര് മഴ ലഭിക്കുന്ന അപൂര്വം സംസ്ഥാനങ്ങളിലൊന്നാണ് കേരളം. മൂവായിരം മില്ലി മീറ്റര് മഴവെള്ളം ആഗിരണം ചെയ്യാന് നമ്മുടെ മണ്ണ് പ്രാപ്തമല്ലാതായതിനാല് പരിസ്ഥിതി സന്തുലനത്തിന്റെ താളം തെറ്റുകയും സംസ്ഥാനത്ത് മഴ ലഭ്യത കുറയുകയും ചെയ്യുകയാണ്. ഭൂമിയില് നിന്ന് മനുഷ്യകുലം വേരറ്റുപോയാലും മറ്റു ജീവജാലങ്ങള്ക്ക് ഒന്നും സംഭവിക്കില്ല. എന്നാല് ജീവജാലങ്ങളിലേതെങ്കിലുമൊന്ന് നശിച്ചുപോകുന്നത് മനുഷ്യകുലത്തിന് ഭീഷണിയാണ്. ഭാവിതലമുറയ്ക്കായി നാം കരുതിവക്കേണ്ടത് ജൈവവൈവിധ്യ സമ്പത്താണ്. കുട്ടികളില് ഈ അറിവ് വളര്ത്തിയെടുക്കാന് എല്ലാ സ്കൂളിലും ജൈവവൈവിധ്യ ഉദ്യാനങ്ങളുണ്ടാക്കാന് പഞ്ചായത്തുകള് ശ്രദ്ധിക്കണമെന്ന് മന്ത്രി പറഞ്ഞു. ജലസഭ പദ്ധതിയില് മികച്ച പ്രകടനം കാഴ്ചവച്ച പഞ്ചായത്തുകള്ക്കുള്ള പുരസ്കാരങ്ങള് വിദ്യാഭ്യാസമന്ത്രിയില് നിന്ന് കുണ്ടറ ഗ്രാമപഞ്ചായത്ത് പ്രസിഡന്റ് കെ. ബാബുരാജും രണ്ടാം സ്ഥാനാര്ഹരായ നെടുമന, പെരിനാട് ഗ്രാമപഞ്ചായത്തുകളുടെ പ്രസിഡന്റുമാരായ എസ്. നസറുദ്ദീനും എസ്. അനിലും ഏറ്റുവാങ്ങി.
