അങ്കമാലി: കൊച്ചിയില് നടിയെ ആക്രമിച്ച കേസിലെ മുഖ്യപ്രതി സുനില് കുമാറിന്റെ റിമാന്ഡ് കാലാവധി ഈ മാസം 18 വരെ നീട്ടി. അങ്കമാലി മജിസ്ട്രേറ്റ് കോടതിയാണ് കാലാവധി നീട്ടിയത്. കൂടുതല് ചോദ്യംചെയ്യലിന് സുനിയെ കസ്റ്റഡിയില് തുടര്ന്നും ആവശ്യമുണ്ടെന്ന് പോലീസിന്റെ ആവശ്യം അംഗീകരിച്ചാണ് കോടതി റിമാന്ഡ് നീട്ടിയത്.
തനിക്ക് ജയിലില് വച്ച് മര്ദനമേറ്റെന്ന് സുനി അങ്കമാലി കോടതിയില് പറഞ്ഞു. ഇതിനെ തുടര്ന്ന് സുനിയെ പരിശോധിച്ച ഡോക്ടറെ കോടതി വിസ്തരിച്ചു. പോലീസ് മര്ദ്ദിച്ചെന്ന് സുനി പറഞ്ഞിട്ടില്ലെന്ന് ഡോക്ടര് വിശദീകരിച്ചു.
സുനിയുടെ അഭിഭാഷകര് തമ്മിലും കോടതിയില് തര്ക്കമുണ്ടായി. അഡ്വ. ടെനിക്ക് പകരം അഡ്വ. ബി.എ. ആളൂരിനെ വക്കാലത്ത് ഏല്പിക്കാന് അനുവദിക്കണമെന്നും സുനി കോടതിയോട് അഭ്യര്ഥിച്ചു. കക്ഷികളെ തേടി വക്കീല് ജയിലില് പോകുന്ന പതിവില്ലെന്ന് അഡ്വ. ടെനി പറഞ്ഞു. ഇതേത്തുടര്ന്നു ആളൂരിനെ കോടതി താക്കീത് ചെയ്തു. അനാവശ്യ കാര്യങ്ങള് കോടതിയില് പറയരുതെന്ന് മജിസ്ട്രേറ്റ് ആളൂരിനോട് ആവശ്യപ്പെട്ടു.
റിമാന്ഡ് കാലാവധി അവസാനിച്ച സുനിയെ ഇന്ന് രാവിലെയാണ് അങ്കമാലി കോടതിയില് ഹാജരാക്കിയത്. കേസില് സ്രാവുകള് കുടുങ്ങാനുണ്ടെന്ന് ഹാജരാകാന് എത്തിച്ചപ്പോള് കോടതി വളപ്പില്വെച്ച് സുനി പറഞ്ഞിരുന്നു. സുരക്ഷാ ഭീഷണിയുള്ളതിനാല് സുനി ജാമ്യാപേക്ഷ സമര്പ്പിച്ചിരുന്നില്ല.
Discussion about this post