കൊച്ചി: തനിക്ക് നേരെയുയര്ന്ന കോഴ ആരോപണത്തില് വിശദീകരണവുമായി ബിജെപി സംസ്ഥാന ജനറല് സെക്രട്ടറി എംടി രമേശ്. മെഡിക്കല് കോളേജ് പോയിട്ട് നഴ്സറി സ്കൂളിന് പോലും അനുമതി വാങ്ങിക്കൊടുക്കാന് തനിക്കാവില്ലെന്ന് എംടി രമേശ് കൊച്ചിയില് മാദ്ധ്യമങ്ങളോട് പറഞ്ഞു. അതുകൊണ്ടുതന്നെ ആരോപണത്തില് കഴമ്പില്ല.
തനിക്ക് ആരും പണം വാഗ്ദാനം ചെയ്തിട്ടില്ല. മറിച്ചുളള പ്രചാരണം വസ്തുതാവിരുദ്ധമാണ്. ഏത് അന്വേഷണത്തിനും താന് തയ്യാറാണെന്നും അന്വേഷണക്കമ്മീഷന് റിപ്പോര്ട്ടിനെക്കുറിച്ച് അറിയില്ലെന്നും ബാക്കിയുളള കാര്യങ്ങള് നാളെ ബിജെപി സംസ്ഥാന കോര്ക്കമ്മിറ്റി ചര്ച്ചചെയ്യുമെന്നും രമേശ് പറഞ്ഞു.
നേരത്തെ മെഡിക്കല് കോളേജ് അനുവദിക്കുന്നതുമായി ബന്ധപ്പെട്ട് ബിജെപി നേതാക്കള് കോഴ വാങ്ങിയെന്ന ആരോപണമുയര്ന്നിരുന്നു. ഇത് അന്വേഷിക്കാന് നിയോഗിച്ച കമ്മിറ്റിയുടെ റിപ്പോര്ട്ടില് രമേശിന്റെയും പേരുണ്ടെന്ന് മാദ്ധ്യമങ്ങള് വാര്ത്ത നല്കിയിരുന്നു.
എന്നാല് ഇതുമായി ബന്ധപ്പെട്ട് മാദ്ധ്യമങ്ങളില് ഉയര്ന്നു വരുന്ന വാര്ത്തകള് ഊഹാപോഹത്തിന്റെ അടിസ്ഥാനത്തിലുളളതാണെന്നും ഇതിന് പാര്ട്ടിയുമായി ബന്ധമില്ലെന്നും ബിജെപി സംസ്ഥാന അദ്ധ്യക്ഷന് കുമ്മനം രാജശേഖരന് വ്യക്തമാക്കിയിരുന്നു.
Discussion about this post