മഹാഗണപതിയെ വന്ദിച്ച് അനന്തപുരിയില്‍ വിനായകചതുര്‍ത്ഥി ആഘോഷിച്ചു

തിരുവനന്തപുരം: വിഘ്നേശ്വരസങ്കല്‍പ്പത്താല്‍ ഗണപതിയെ വണങ്ങി നാടെങ്ങും വിനായകചതുര്‍ത്ഥി ആഘോഷിച്ചു. ജില്ലയിലെ ക്ഷേത്രങ്ങളിലെല്ലാം ഗണപതിയുടെ ഉപദേവതാക്ഷേത്രത്തില്‍ ചതുര്‍ത്ഥി പൂജ നടന്നു. പഴവങ്ങാടി ശ്രീമഹാഗണപതി ക്ഷേത്രം ഉള്‍പ്പെടെ എല്ലാ പ്രധാനഗണപതി ക്ഷേത്രങ്ങളിലും നിരവധി ഭക്തര്‍ ചതുര്‍ത്ഥി തൊഴുതു.

പുലര്‍ച്ചെ മഹാഗണപതിഹോമത്തോടെയാണ് ക്ഷേത്രങ്ങളില്‍ പൂജകള്‍ ആരംഭിച്ചത്. തുടര്‍ന്ന് വിവിധതരം ഹോമങ്ങളും ഉച്ചയ്ക്ക് അന്നദാനവും വൈകിട്ട് ചതുര്‍ത്ഥി പൂജ, എഴുന്നള്ളത്ത് എന്നിവയും ഉണ്ടായിരുന്നു. പഴവങ്ങാടി ശ്രീമഹാഗണപതി ക്ഷേത്രത്തില്‍ വെള്ളിയാഴ്ച പുലര്‍ച്ചെ മുതല്‍ നല്ല ഭക്തജനത്തിരക്കായിരുന്നു. നാളികേരമുടച്ചും നേര്‍ച്ച അര്‍പ്പിച്ചും ഭക്തര്‍ വിനായകചതുര്‍ത്ഥിയില്‍ പങ്കുചേര്‍ന്നു. ക്ഷേത്രത്തില്‍ എഴുന്നള്ളത്തും ഉണ്ടായിരുന്നു.

തമ്പാനൂര്‍ ഗണപതിക്ഷേത്രം, വഞ്ചിയൂര്‍ കമ്മട്ടം ഗണപതിക്ഷേത്രം, വഴുതയ്ക്കാട് മഹാഗണപതിക്ഷേത്രം, തമ്പാനൂര്‍ വിഘ്നേശ്വര സ്വാമി കോവില്‍, ശ്രീപദ്മനാഭസ്വാമി ക്ഷേത്രം, നെയ്യാറ്റിന്‍കര ശ്രീകൃഷ്ണസ്വാമി ക്ഷേത്രം എന്നിവിടങ്ങളിലും മറ്റ് ക്ഷേത്രങ്ങളിലും വിനായകചതുര്‍ത്ഥി ആഘോഷം നടന്നു.

ഗണേശോത്സവ ട്രസ്റ്റിന്റെ നിമജ്ജനത്തിനുള്ള വിഗ്രഹപ്രതിഷ്ഠ നടന്ന ജില്ലയിലെ 1,108 കേന്ദ്രങ്ങളിലും വെള്ളിയാഴ്ച വിനായകചതുര്‍ത്ഥി ആഘോഷം നടന്നു. ഇവിടെ ഭക്തര്‍ കൊഴുക്കട്ട പൊങ്കാല അര്‍പ്പിച്ചു. ശംഖുംമുഖത്ത് ട്രസ്റ്റിന്റെ നേതൃത്വത്തില്‍ സര്‍വവിഘ്നനിവാരണ യജ്ഞം സംഘടിപ്പിച്ചിട്ടുണ്ട്. 28ന് വൈകുന്നേരം പഴവങ്ങാടിയില്‍നിന്നു വിഗ്രഹനിമജ്ജന ഘോഷയാത്ര ആരംഭിക്കും. ശംഖുംമുഖത്ത് 1,00,008 കൊട്ടത്തേങ്ങകള്‍ ഉപയോഗിച്ചുള്ള മഹാഗണപതിഹോമം നടക്കും. ഗൗഡസാരസ്വത ബ്രാഹ്മണ മഹാസഭയുടെ നേതൃത്വത്തില്‍ നടന്ന ചതുര്‍ത്ഥിയാഘോഷത്തില്‍ ശംഖുംമുഖം ആറാട്ടുകടവില്‍ വിഗ്രഹനിമജ്ജനം നടന്നു. പൂജകള്‍ക്ക് ശേഷമാണ് വിഗ്രഹഘോഷയാത്ര പുറപ്പെട്ടത്. കൈമനം അമൃതാനന്ദമയി മഠത്തില്‍ ഗണേശചതുര്‍ത്ഥിയുടെ ഭാഗമായി കളിമണ്ണില്‍ നിര്‍മിച്ച ഗണേശമൂര്‍ത്തികള്‍ വിതരണം ചെയ്തു.