തിരുവനന്തപുരം: തലസ്ഥാനത്തെ നവരാത്രി ആഘോഷങ്ങള്ക്കും പൂജകള്ക്കും മുന്നോടിയായി നവരാത്രി വിഗ്രഹങ്ങളുടെ എഴുന്നള്ളത്തിന് തുടക്കമായി. പത്മനാഭപുരം തേവാരക്കെട്ടില്നിന്നു സരസ്വതിദേവി, വേളിമലയില്നിന്ന് കുമാരസ്വാമി, ശുചീന്ദ്രത്ത് നിന്ന് മുന്നൂറ്റിനങ്ക എന്നീ വിഗ്രഹങ്ങളെയാണു ഘോഷയാത്രയുടെ അകമ്പടിയോടെ തിരുവനന്തപുരത്തേക്ക് എത്തിക്കുന്നത്.
രാവിലെ 7.10നു പത്മനാഭപുരം കൊട്ടാരത്തിലെ ഉപ്പിരിക്കമാളികയില് ഘോഷയാത്രയോടനുബന്ധിച്ച സുപ്രധാന ചടങ്ങായ ഉടവാള് കൈമാറി. പട്ടുവിരിച്ച പീഠത്തില് സൂക്ഷിച്ചിരുന്ന ഉടവാള് ആചാരപ്രകാരം കൊട്ടാരം ചാര്ജ് ഓഫീസര് സി.എസ്. അജിത്കുമാര്, കേരള പുരാവസ്തുവകുപ്പ് ഡയറക്ടര് ജെ. രജികുമാര് എന്നിവരില് നിന്ന് സ്വീകരിച്ച് പുരാവസ്തു പുരാരേഖാ വകുപ്പ് മന്ത്രി രാമചന്ദ്രന് കടന്നപ്പള്ളി ദേവസ്വം മന്ത്രി കടകംപള്ളി സുരേന്ദ്രന് കൈമാറി. അദ്ദേഹം ഉടവാള് കന്യാകുമാരി ദേവസ്വം ജോയിന്റ് കമ്മിഷണര് എം. അന്പുമണിക്ക് നല്കി. കേന്ദ്രമന്ത്രി പൊന് രാധാകൃഷ്ണന്, എം.പി മാരായ സുരേഷ് ഗോപി, എ. വിജയകുമാര്, തിരുവിതാംകൂര് ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന് തുടങ്ങിയവര് ചടങ്ങില് സംബന്ധിച്ചു.
വൈകുന്നേരം വിഗ്രഹങ്ങള് കുഴിത്തുറ മഹാദേവക്ഷേത്രത്തില് ഇറക്കിപൂജയ്ക്കുശേഷം നാളെ (സെപ്റ്റംബര് 19) രാവിലെ കുഴിത്തുറനിന്നു പുറപ്പെടുന്ന ഘോഷയാത്രയ്ക്ക് കളിയിക്കാവിളയിലെ തിരുവനന്തപുരം ജില്ലാതിര്ത്തിയില് കേരളാ പോലീസ്, ദേവസ്വം, റവന്യൂവകുപ്പുകള് എന്നിവയുടെ നേതൃത്വത്തില് സ്വീകരണം നല്കും. വൈകിട്ട് നെയ്യാറ്റിന്കര ശ്രീകൃഷ്ണസ്വാമി ക്ഷേത്രത്തില് വിഗ്രഹങ്ങള് ഇറക്കിപൂജ നടത്തും.
സെപ്റ്റംബര് 20ന് രാവിലെ നെയ്യാറ്റിന്കരയില്നിന്ന് പുറപ്പെടുന്ന ഘോഷയാത്ര വൈകുന്നേരമാണ് തലസ്ഥാനനഗരത്തില് കിഴക്കേക്കോട്ടയിലെ ശ്രീപത്മനാഭസ്വാമി ക്ഷേത്രത്തിനു മുന്നിലുള്ള നവരാത്രി മണ്ഡപത്തില് എത്തുക. ആചാരപ്രകാരമുള്ള വരവേല്പ്പിനെത്തുടര്ന്ന് ഉടവാളിനൊപ്പം സരസ്വതിവിഗ്രഹത്തെ പദ്മതീര്ഥക്കരയിലെ നവരാത്രിമണ്ഡപത്തിലും വേളിമല കുമാരസ്വാമിയെ ആര്യശാല ദേവീക്ഷേത്രത്തിലും മുന്നൂറ്റിനങ്കയെ ചെന്തിട്ട ഭഗവതീക്ഷേത്രത്തിലും പൂജയ്ക്കിരുത്തും.
21ന് നവരാത്രിപൂജ ആരംഭിച്ച് വിജയദശമിദിനമായ 30നു സമാപിക്കും. പൂജയെടുപ്പിന് മറുനാള് ഒരുദിവസത്തെ നല്ലിരുപ്പിനുശേഷം ഒക്ടോബര് രണ്ടിന് രാവിലെ മാതൃക്ഷേത്രങ്ങളിലേക്ക് വിഗ്രഹങ്ങളുടെ മടക്കിയെഴുന്നള്ളിപ്പ് ആരംഭമാകും. ആദ്യദിനം നെയ്യാറ്റിന്കര ശ്രീകൃഷ്ണസ്വാമി ക്ഷേത്രത്തിലും രണ്ടാംദിനം കുഴിത്തുറ മഹാദേവക്ഷേത്രത്തിലും ഇറക്കിപൂജ നടത്തിയശേഷം വിഗ്രഹങ്ങള് ഒക്ടോബര് നാലിന് വൈകുന്നേരം പദ്മനാഭപുരം കൊട്ടാരത്തില് എത്തിച്ചേരും. സരസ്വതിദേവിയെ ആനപ്പുറത്തും മറ്റു വിഗ്രഹങ്ങളെ പല്ലക്കിലുമാണ് എഴുന്നള്ളിക്കുന്നത്.
Discussion about this post