തിരുവനന്തപുരം: മലയാള ഭാഷയുടെയും സംസ്‌കാരത്തിന്റെയും പരിപോഷണത്തിന് ശക്തി പരകുന്ന മാധ്യമ പ്രവര്‍ത്തനം, പൊതു സമൂഹത്തെ സ്വാധീനിക്കുകയും സമൂഹത്തില്‍ ചര്‍ച്ച ചെയ്യപ്പെടുകയും ചെയ്ത അന്വേഷണാത്മക മാധ്യമ പ്രവര്‍ത്തനം, നിയമസഭാ നടപടികളുടെ റിപ്പോര്‍ട്ടിംഗ് എന്നിങ്ങനെ മൂന്ന് മേഖലകളില്‍ ദൃശ്യ-അച്ചടി മാധ്യമ വിഭാഗങ്ങളിലെ മികച്ച സൃഷ്ടികള്‍ക്കായി നിയമസഭാ മാധ്യമ അവാര്‍ഡിന് അപേക്ഷ ക്ഷണിച്ചു.
‘ആര്‍. ശങ്കരനാരായണന്‍ തമ്പി നിയസഭാ മാധ്യമ അവാര്‍ഡ്, ഇ.കെ. നായനാര്‍ നിയമസഭാ മാധ്യമ അവാര്‍ഡ്, ജി. കാര്‍ത്തികേയന്‍ നിയമസഭാ മാധ്യമ അവാര്‍ഡ്’ എന്നി പേരുകളില്‍ കേരള നിയമസഭ ഏര്‍പ്പെടുത്തിയിരിക്കുന്ന അവാര്‍ഡുകള്‍ക്കാണ് അപേക്ഷ ക്ഷണിച്ചത്. അച്ചടി-ദൃശ്യ മാധ്യമ വിഭാഗങ്ങള്‍ ഓരോന്നിനും മൂന്നു വീതം ആകെ ആറു അവാര്‍ഡുകള്‍ ഉണ്ടായിരിക്കും. 50,000 രൂപയും പ്രശസ്തി പത്രവും ഫലകവും അടങ്ങുന്നതാണ് ഓരോ അവാര്‍ഡും. 2018 ജനുവരി ഒന്നിനും 2018 ഡിസംബര്‍ 31നും ഇടയില്‍ പ്രസിദ്ധീകരിക്കുകയോ സംപ്രേഷണം ചെയ്യുകയോ ചെയ്തിട്ടുള്ള സൃഷ്ടികള്‍ക്കാണ് അവാര്‍ഡ്. പരിഗണിക്കേണ്ട റിപ്പോര്‍ട്ടുകളുടെ/പരിപാടികളുടെ ആറ് പകര്‍പ്പുകള്‍ സഹിതം നിശ്ചിത മാതൃകയിലുള്ള അപേക്ഷകള്‍ മേയ് 13, വൈകിട്ട് മൂന്ന് മണിക്ക് മുന്‍പ് സെക്രട്ടറി, കേരള നിയമസഭാ സെക്രട്ടറിയറ്റ്, വികാസ്ഭവന്‍.പി.ഒ, തിരുവനന്തപുരം-33 എന്ന വിലാസത്തില്‍ ലഭ്യമാക്കണം. അവാര്‍ഡിനെ സംബന്ധിക്കുന്ന നിബന്ധനകള്‍, അപേക്ഷാഫാറം എന്നിവ അടങ്ങുന്ന വിശദമായ സ്‌കീം, വിജ്ഞാപനം എന്നിവ കേരള നിയമസഭയുടെ ഔദ്യോഗിക വെബ്സൈറ്റായ www.niyamsabha.org-ല്‍ ലഭ്യമാണ്.
Discussion about this post