തിരുവനന്തപുരം: കാസര്കോട് മണ്ഡലത്തിലെ പിലാത്തറ പത്തൊമ്പതാം നമ്പര് ബൂത്തില് കള്ളവോട്ട് ചെയ്തെന്ന് കണ്ടെത്തിയ പഞ്ചായത്തംഗം സലീനയെ അയോഗ്യയാക്കാന് മുഖ്യ തെരഞ്ഞെടുപ്പ് ഓഫീസര് ടിക്കാറാം മീണ ശുപാര്ശ ചെയ്തു. ഓപ്പണ് വോട്ട് ചെയ്തതാണെന്ന് വാദമുയര്ത്തിയെങ്കിലും സലീന ബൂത്ത് മാറി കള്ളവോട്ട് ചെയ്തതാണെന്ന് തെളിഞ്ഞതിനെത്തുടര്ന്നാണ് നടപടി.
പിലാത്തറ പത്തൊന്പതാം നമ്പര് ബൂത്തില് കള്ളവോട്ട് നടന്നതിന് തെളിവുണ്ടെന്ന് ഇന്നലെ മുഖ്യ തെരഞ്ഞെടുപ്പ് ഓഫീസര് വാര്ത്താ സമ്മേളനത്തില് വ്യക്തമാക്കിയിരുന്നു. പത്മിനി, സെലീന, സുമയ്യ എന്നിവര് കള്ളവോട്ട് ചെയ്തെന്ന് ടിക്കാറാം മീണ സ്ഥിരീകരിച്ചു.
പഞ്ചായത്ത് അംഗം സെലീനയും മുന് പഞ്ചായത്ത് അംഗം സുമയ്യയും പത്തൊന്പതാം നമ്പര് ബൂത്തിലെ വോട്ടര്മാരല്ല. ഇവര് രണ്ട് പേരും ബൂത്ത് മാറി വോട്ട് ചെയ്തു. യഥാര്ത്ഥ ബൂത്തില് ഇവര് വോട്ട് രേഖപ്പെടുത്തിയിട്ടുണ്ടോ എന്ന കാര്യത്തില് നിലവില് വ്യക്തതയില്ല. രേഖകളെല്ലാം സ്ട്രോംഗ് റൂമിലാണെന്നും അത് പരിശോധിച്ചാല് മാത്രമെ അവിടെ വോട്ട് ചെയ്തോ എന്ന കാര്യത്തില് വ്യക്തത വരു എന്നും മുഖ്യ തെരഞ്ഞെടുപ്പ് ഓഫീസര് പറഞ്ഞു. പത്മിനി എന്ന സ്ത്രിയാകട്ടെ പത്തൊന്പതാം നമ്പര് ബൂത്തില് രണ്ട് തവണ വോട്ട് ചെയ്യാനെത്തി.
കള്ളവോട്ട് ചെയ്ത മൂന്ന് പേര്ക്കും എതിരെ പൊലീസ് കേസ് രജിസ്റ്റര് ചെയ്യാനും നിര്ദ്ദേശം നല്കിയിട്ടുണ്ട്. എംപി സലീന പഞ്ചായത്ത് അംഗത്വം രാജി വച്ച് അന്വേഷണം നേരിടണമെന്നും മുഖ്യ തെരഞ്ഞെടുപ്പ് ഓഫീസര് പറഞ്ഞു. പ്രിസൈഡിംഗ് ഓഫീസര്ക്ക് വീഴ്ച പറ്റിയെന്നും ടിക്കാറാം മീണ നിരീക്ഷിച്ചു.
വെബ് കാസ്റ്റിംഗ് ഇല്ലായിരുന്നെങ്കില് ഇത്തരം സംഭവങ്ങള് കണ്ടുപിടിക്കാന് കഴിയില്ലായിരുന്നു എന്നും വെബ് കാസ്റ്റിംഗ് സംവിധാനത്തിന്റെ വിജയമാണ് ഇപ്പോള് ഉണ്ടായിട്ടുള്ളതെന്നും ടിക്കാറാം മീണ അവകാശപ്പെട്ടു. കേന്ദ്ര തെരഞ്ഞെടുപ്പ് കമ്മീഷന് റിപ്പോര്ട്ട് കൈമാറാനാണ് തീരുമാനം. അതേസമയം, ഫേസ്ബുക്കിലൂടെ വ്യാപക അധിക്ഷേപമാണെന്ന് കാണിച്ച് സലീന പൊലീസില് പരാതി നല്കിയിട്ടുണ്ട്.
Discussion about this post