തിരുവനന്തപുരം: ഒന്നു മുതല്‍ പന്ത്രണ്ട് വരെയുള്ള ക്ലാസുകളിലെ മുഴുവന്‍ പാഠപുസ്തകങ്ങളും ‘സമഗ്ര’ പോര്‍ട്ടലി ലഭ്യമാണ്. ഒമ്പത്, പത്ത് ക്ലാസുകളിലെ ഭേദഗതി വരുത്തിയ പുസ്തകങ്ങളും ഇതില്‍ ഉള്‍പ്പെടും. പാഠപുസ്തകങ്ങളുടെ മലയാളം, ഇംഗ്ലീഷ്, തമിഴ്, കന്നട പതിപ്പുകള്‍ പ്രത്യേകം ലോഗിന്‍ ചെയ്യാതെ തന്നെ www.samagra.kite.kerala.gov.in പോര്‍ട്ടല്‍ വഴി ലഭിക്കും.
ഹോം പേജിലെ ‘ടെക്സ്റ്റ് ബുക്സ്’എന്ന ലിങ്ക് വഴി മീഡിയം, ക്ലാസ്, വിഷയം എന്നിങ്ങനെ തരംതിരിച്ച് പാഠപുസ്തകങ്ങളുടെ പി.ഡി.എഫ് പതിപ്പുകള്‍ ലഭിക്കും. ഇതിനു പുറമെ പ്ലേസ്റ്റോറില്‍ ‘ SAMAGRA ‘ എന്ന് നല്‍കി ഇന്‍സ്റ്റാള്‍ ചെയ്യുന്ന മൊബൈല്‍ ആപ്പുവഴിയും മുഴുവന്‍ പാഠപുസ്തകങ്ങളും ഡിജിറ്റല്‍ റിസോഴ്സുകളും പൊതുജനങ്ങള്‍ക്കുള്‍പ്പെടെ സൗജന്യമായി ഡൗണ്‍ലോഡ് ചെയ്യാന്‍ കഴിയുന്ന രൂപത്തില്‍ കേരള ഇന്‍ഫ്രാസ്ട്രക്ചര്‍ ആന്റ് ടെക്നോളജി ഫോര്‍ എഡ്യൂക്കേഷന്‍ (കൈറ്റ്) ലഭ്യമാക്കിയിട്ടുണ്ട്. പ്രൈമറി മുതല്‍ ഹയര്‍ സെക്കന്ററിതലം വരെയുള്ള എല്ലാ അധ്യാപകര്‍ക്കും നാല് ദിവസത്തെ വിഷയാധിഷ്ഠിത പരിശീലനവും ഈ മാസം നല്‍കുന്നതിനാല്‍ പാഠഭാഗങ്ങളെ അടിസ്ഥാനമാക്കിയുള്ള പഠന വിഭവങ്ങള്‍ തയ്യാറാക്കുന്നതിനും പാഠാസൂത്രണം നടത്തുന്നതിനും ഡിജിറ്റല്‍ പാഠഭാഗങ്ങള്‍ സഹായിക്കും.
Discussion about this post