തിരുവനന്തപുരം: സംസ്ഥാനത്തെ 29 കൗണ്ടിംഗ് ലൊക്കേഷനുകളിലായി 140 വോട്ടെണ്ണല്‍ കേന്ദ്രങ്ങള്‍ സജ്ജീകരിച്ചിട്ടുള്ളതായി മുഖ്യ തിരഞ്ഞെടുപ്പ് ഓഫീസര്‍ ടീക്കാറാം മീണ വാര്‍ത്താസമ്മേളനത്തില്‍ അറിയിച്ചു. ഇതു കൂടാതെ പോസ്റ്റല്‍ ബാലറ്റുകള്‍ എണ്ണുന്നതിനായി എല്ലാ ലോക്സഭാ മണ്ഡലങ്ങളിലും ഒന്നോ രണ്ടോ റൂമുകള്‍ ഒരുക്കിയിട്ടുണ്ട്.
23ന് നടക്കുന്ന വോട്ടെണ്ണല്‍ രാവിലെ എട്ടുമണിക്ക് ആരംഭിക്കും. തപാല്‍ വോട്ടുകള്‍ ആയിരിക്കും ആദ്യമെണ്ണുക. അതോടൊപ്പം ഇ.ടി.പി.ബി.എസ് വഴി ലഭിച്ച സര്‍വീസ് വോട്ടുകള്‍ സ്‌കാനിംഗ് ആരംഭിക്കും. വോട്ടെണ്ണല്‍ ദിവസം രാവിലെ എട്ടുമണിവരെ ലഭിക്കുന്ന എല്ലാ തപാല്‍ വോട്ടുകളും എണ്ണാന്‍ ഉള്‍പ്പെടുത്തും.
കൗണ്ടിംഗ് സൂപ്പര്‍വൈസര്‍, കൗണ്ടിംഗ് അസിസ്റ്റന്റ്, മൈക്രോ ഒബ്സര്‍വര്‍മാര്‍, ഇലക്ഷന്‍ കമ്മീഷന്‍ അനുവദിച്ച തിരിച്ചറിയല്‍ കാര്‍ഡുള്ളവര്‍, ഒബ്സര്‍വര്‍മാര്‍, തിരഞ്ഞെടുപ്പുമായി ബന്ധപ്പെട്ട സര്‍ക്കാര്‍ ഉദ്യോഗസ്ഥര്‍, സ്ഥാനാര്‍ഥി/ഇലക്ഷന്‍ ഏജന്റ്/ കൗണ്ടിംഗ് ഏജന്റ് എന്നിവര്‍ക്ക് മാത്രമായിരിക്കും വോട്ടെണ്ണല്‍ ഹാളുകളില്‍ പ്രവേശനമുള്ളത്.
പരമാവധി 14 കൗണ്ടിംഗ് ടേബിളുകളാണ് സജ്ജീകരിച്ചിട്ടുള്ളത്. ആവശ്യമെങ്കില്‍ കൂടുതല്‍ ടേബിളുകള്‍ കമ്മീഷന്റെ അനുമതിയോടെ സജ്ജീകരിക്കും. നാല്കൗണ്ടിംഗ് ടേബിളുകളാണ് പോസ്റ്റല്‍ ബാലറ്റ് പേപ്പറുകള്‍ എണ്ണുന്നതിന് നിര്‍ദ്ദേശിച്ചിട്ടുള്ളതെങ്കിലും കൂടുതല്‍ പോസ്റ്റല്‍ ബാലറ്റുകള്‍ ഉള്ള സ്ഥലങ്ങളില്‍ കമ്മീഷന്‍ അനുവാദത്തോടെ കൂടുതല്‍ ടേബിളുകള്‍ ഒരുക്കും. പോസ്റ്റല്‍ ബാലറ്റ് പേപ്പറുകള്‍ എണ്ണുന്ന കൗണ്ടിംഗ് ടേബിളുകളില്‍ സ്ഥാനാര്‍ത്ഥികള്‍ക്ക് അവരുടെ ഏജന്റുമാരെ ഒരു ടേബിളില്‍ ഒരു ഏജന്റ് എന്ന കണക്കില്‍ ഏര്‍പ്പെടുത്താം.
മൊത്തംലഭിച്ച പോസ്റ്റല്‍ ബാലറ്റുകളേക്കാള്‍ കുറവാണ് വിജയിച്ച സ്ഥാനാര്‍ത്ഥിയുടെ മാര്‍ജിന്‍ എങ്കില്‍ പോസ്റ്റല്‍ ബാലറ്റുകള്‍വീണ്ടും എണ്ണി ഉറപ്പാക്കുകയും അത് വീഡിയോയില്‍ പകര്‍ത്തുകയും ചെയ്യും.
ഒരു റൗണ്ടിലെ എല്ലാ ഇ.വി.എമ്മുകളും എണ്ണി നടപടിക്രമങ്ങള്‍ പൂര്‍ത്തിയാക്കി റൗണ്ട് ഫലം പ്രഖ്യാപിച്ച ശേഷമേ അടുത്ത റൗണ്ടിലെ ഇ.വി.എമ്മുകള്‍ എണ്ണാന്‍ തുടങ്ങുകയുള്ളൂ.
ഓരോ കണ്‍ട്രോള്‍ യൂണിറ്റിലെയും സീലുകള്‍ (പിങ്ക് പേപ്പര്‍ സീല്‍, ഔട്ടര്‍ പേപ്പര്‍ സീല്‍, സ്പെഷ്യല്‍ടാഗ്, ഗ്രീന്‍ പേപ്പര്‍ സീല്‍) പരിശോധിച്ച് സുരക്ഷിതമാണെന്ന് ഉറപ്പുവരുത്തിയായിരിക്കും അവയിലെ വോട്ടെണ്ണല്‍ തുടങ്ങുന്നത്.
ഓരോ റൗണ്ടും തീര്‍ന്ന് നടപടിക്രമങ്ങള്‍ പൂര്‍ത്തിയാക്കുന്നതിന് മുന്‍പ് തിരഞ്ഞെടുപ്പ് നിരിക്ഷകന്‍ റാന്‍ഡം ആയി തിരഞ്ഞെടുക്കുന്ന രണ്ട് ഇ.വി.എംകള്‍ വീണ്ടും എണ്ണി കൃത്യത ഉറപ്പാക്കും. കൗണ്ടിംഗ് ഹാളിലെ എല്ലാ നടപടിക്രമങ്ങളും വീഡിയോയില്‍ പകര്‍ത്തും. വോട്ടിംഗ്മെഷീനുകളിലെ വോട്ടെണ്ണല്‍ പൂര്‍ത്തിയാക്കിയശേഷമായിരിക്കും വിവിപാറ്റുകളിലെ പേപ്പര്‍സ്ലിപ്പുകള്‍ എണ്ണാന്‍ തുടങ്ങുന്നത്.
വിവിപാറ്റ് സ്ലിപ്പുകള്‍ എണ്ണുന്നത് നാല് സാഹചര്യങ്ങളിലാണ്. കണ്‍ട്രോള്‍യൂണിറ്റിലെ ഡിസ്പ്ലേ പ്രവര്‍ത്തിക്കുന്നില്ലെങ്കില്‍, വിവിപാറ്റ് സ്ലിപ്പുകള്‍ എണ്ണാന്‍ കമ്മീഷന്‍ ഉത്തരവായ പോളിംഗ് ബൂത്തുകളിലെ വിവിപാറ്റ് സ്ലിപ്പുകള്‍, 1961-ലെ ഇലക്ഷന്‍ നടത്തിപ്പ് ചട്ടങ്ങളിലെ ചട്ടം 56(ഡി) പ്രകാരം സ്ഥാനാര്‍ത്ഥിയോ ഇലക്ഷന്‍ ഏജന്റോ, കൗണ്ടിംഗ് ഏജന്റോ ആവശ്യപ്പെടുന്ന ബൂത്തുകളില്‍ എല്ലാ വസ്തുതകളും പരിശോധിച്ച് റിട്ടേണിംഗ് ഓഫീസര്‍ക്ക് ബോധ്യമുള്ള സാഹചര്യങ്ങളില്‍, ലോകസഭാ മണ്ഡലത്തിലെ ഓരോ അസംബ്ലി സെഗ്മെന്റുകളിലെയും നറുക്കിട്ടെടുക്കുന്ന അഞ്ചു ബൂത്തുകളില്‍ എന്നീ സാഹചര്യങ്ങളിലാണ് വിവിപാറ്റ് എണ്ണേണ്ടിവരിക.
1961-ലെ ഇലക്ഷന്‍ നടത്തിപ്പ് ചട്ടങ്ങളിലെ ചട്ടം 56 ഡി (4ബി) പ്രകാരം വോട്ടിംഗ് മെഷീനിലെ ഫലവും വിവിപാറ്റ് പേപ്പര്‍ സ്ലിപ്പ് എണ്ണവും തമ്മില്‍ വ്യത്യാസം ഉണ്ടെങ്കില്‍ വിവിപാറ്റ് പേപ്പര്‍ സ്ലിപ്പ് എണ്ണമായിരിക്കും അന്തിമം. വിവിപാറ്റ്സ്ലിപ്പുകള്‍ എണ്ണുന്നതിനുള്ള ജീവനക്കാരെ ആവശ്യമെങ്കില്‍ പ്രത്യേകമായി നിയമിക്കും. വിവിപാറ്റ്സ്ലിപ്പുകള്‍ എണ്ണുന്നതിനായി എല്ലാ വോട്ടെണ്ണല്‍ ബൂത്തുകളിലും പ്രത്യേകം വിവിപാറ്റ് കൗണ്ടിംഗ് ബൂത്തുകള്‍ സജ്ജീകരിച്ചിട്ടുണ്ടെന്നും അദ്ദേഹം അറിയിച്ചു.
ഔദ്യോഗിക വീഡിയോ ക്യാമറ മാത്രമേ കൗണ്ടിംഗ് ഹാളില്‍ സജ്ജീകരിക്കാന്‍ അനുമതിയുള്ളൂ. മാധ്യമപ്രവര്‍ത്തകര്‍ കൗണ്ടിംഗ് ഹാളില്‍ ക്യാമറ സ്റ്റാന്‍ഡ് കൊണ്ടുപോകാന്‍ പാടില്ല. ഇലക്ഷന്‍ കമ്മീഷന്‍ അനുവദിച്ച മീഡിയാ പാസ്സുള്ള മാധ്യമ പ്രവര്‍ത്തകര്‍ക്ക് കൗണ്ടിംഗ് ഹാളില്‍ വീഡിയോ ക്യാമറ ഉപയോഗിക്കാം. അപ്രകാരം എടുക്കുന്ന വീഡിയോ ക്ലിപ്പിംഗുകളില്‍ പോസ്റ്റല്‍ ബാലറ്റ്, ഇ.വി.എം., വിവിപാറ്റുകള്‍ എന്നിവയിലെ യഥാര്‍ത്ഥ വോട്ടുകള്‍ കവര്‍ ചെയ്യാന്‍ പാടില്ല. സുരക്ഷാചുമതലയുള്ള ഉദ്യോഗസ്ഥര്‍, റിട്ടേണിംഗ് ഓഫീസര്‍/ അസിസ്റ്റന്റ് റിട്ടേണിംഗ് ഓഫീസര്‍ ആവശ്യപ്പെടുന്ന സാഹചര്യങ്ങളിലല്ലാതെ കൗണ്ടിംഗ് ഹാളില്‍ പ്രവേശിക്കാന്‍ പാടില്ലെന്നും മുഖ്യ തിരഞ്ഞെടുപ്പ് ഓഫീസര്‍ അറിയിച്ചു.
വോട്ടെണ്ണല്‍ നടപടികള്‍ക്ക് സുരക്ഷ ഒരുക്കാന്‍ എല്ലാ ക്രമീകരണങ്ങളും ഏര്‍പ്പെടുത്തിയതായി വാര്‍ത്താസമ്മേളനത്തില്‍ സംബന്ധിച്ച സംസ്ഥാന പോലീസ് മേധാവി ലോക്നാഥ് ബെഹ്റ അറിയിച്ചു.
