തൃശൂര്: നെല്ല് സംഭരണത്തില് കൃഷിക്കാരുടെയും മില്ലുകാരുടെയും ഇടയില് എജന്റുമാരായി പ്രവത്തിക്കുന്നവരുടെ ചൂഷണം സര്ക്കാര് അവസാനിപ്പിക്കുമെന്ന് കൃഷി മന്ത്രി അഡ്വ. വി.എസ്. സുനില്കുമാര് പറഞ്ഞു. തൃശൂര് ടൗണ്ഹാളില് തൃശൂര്-പൊന്നാനി കോള്നില വികസന കൗണ്സില് യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കര്ഷകര് മില്ലുകാര്ക്ക് കൈമാറുന്ന നെല്ലിന്റെ തൂക്കത്തെ സംബന്ധിച്ചും ജലാംശത്തെ സംബന്ധിച്ചും കര്ഷകദ്രോഹപരമായ ഇടെപടലാണ് ഈ എജന്റുമാര് നടത്തുന്നത്. ഇത് അനുവദിക്കാനാകില്ല. ഇത് തടയാന് സര്ക്കാര് ഫലപ്രദമായ ഇടപെടല് നടത്തും. കക്ഷി രാഷ്ട്രീയത്തിനധീതമായി ഇവര്ക്കെതിരെ കര്ശന നടപടി സ്വീകരിക്കും. നെല്ല് സംരഭണ ഘട്ടത്തില് സ്വകാര്യ കുത്തക മില്ലുകളുടെ സമീപനവും സമ്മര്ദവും കൃഷിക്കാര്ക്ക് അര്ഹമായ വില ലഭിക്കുന്നതിന് തടസമാകുന്ന സാഹചര്യമാണുള്ളത്. ഇത് തടയുന്നതിനായാണ് സര്ക്കാര് തന്നെ നേരിട്ട് നെല്ല് സംഭരണത്തിന് വന്കിട മില്ലുകള് സ്ഥാപിക്കുന്നത്. ജില്ലയില് ചേലക്കരയില് ഇത്തരമൊരു മില്ല് സ്ഥാപിക്കും.
കോള്മേഖലയുടെ വികസനം കൃഷിവകുപ്പിന്റെ പ്രധാന പരിഗണനാ വിഷയമാണ്. റീബില്ഡ് കേരള പദ്ധതിയില് ഉള്പ്പെടുത്താനായി വകുപ്പ് തൃശൂര്-പൊന്നാനി കോള്മേഖലയുമായി ബന്ധപ്പെട്ട് 308 കോടിരൂപയുടെ പ്രോജക്ടാണ് സമര്പ്പിച്ചിരിക്കുന്നത്. മേഖലയില് കൃഷിചെയ്യുന്ന മുഴുവന് കര്ഷകര്ക്കും വര്ഷം മുഴുവന് വരുമാനം ഉറപ്പു വരുത്തുകയാണ് ലക്ഷ്യം. വര്ഷത്തില് രണ്ട് പ്രാവശ്യം കൃഷി ഇറക്കുക എന്ന ലക്ഷ്യവുമായി മുന്നോട്ടുപോവുകയാണ്. കോള്വികസന പ്രവര്ത്തനങ്ങളുടെ രണ്ടാംഘട്ടത്തിലേക്ക് കടക്കുന്നതോടെ ശാസ്ത്രീയ കൃഷി രീതികള് അവലംബിക്കുന്നതിന് പ്രാധാന്യം നല്കും. ഇതുവഴി ഉല്പാദന ക്ഷമത വര്ദ്ധിക്കുമെന്ന് അദ്ദേഹം പറഞ്ഞു.
ഒക്ടോബര് 31 നകം 14 കോള്പടവുകളില് മോട്ടോര് പമ്പുകള് സ്ഥാപിക്കും. ഇതിന് പുറമേ 31 എണ്ണം അധികമായും സ്ഥാപിക്കും. ചാലുകള് ആഴം കൂട്ടുന്നതിനും സ്ലൂയിസുകള് പുനഃസ്ഥാപിക്കുന്നതുള്പ്പടെയുള്ള പ്രൊപ്പോസല് തയ്യാറാക്കിയിട്ടുണ്ട്.കേന്ദ്രസര്ക്കാരിന്റെ നിബന്ധനകള്ക്കനുസരിച്ച് പ്രവര്ത്തനങ്ങള് നടപ്പിലാക്കുമെന്നും മന്ത്രി പറഞ്ഞു.
Discussion about this post