വയനാട്: മുത്തങ്ങ അതിര്‍ത്തിയില്‍ വ്യാജ പാസുമായി അതിര്‍ത്തി കടന്ന ആള്‍ അറസ്റ്റില്‍. മലപ്പുറം ചുങ്കത്തറ സ്വദേശി അഖില്‍ ടി റെജിയാണ് അറസ്റ്റിലായത്. തലപ്പാടി വഴി കടക്കാനായി ലഭിച്ച പാസ് കമ്പ്യൂട്ടറില്‍ എഡിറ്റ് ചെയ്ത് മുത്തങ്ങ വഴി ആക്കിയാണ് ഇയാള്‍ എത്തിയത്. പാസിലെ ഡേറ്റും എഡിറ്റ് ചെയ്തിട്ടുണ്ട്.
സുല്‍ത്താന്‍ ബത്തേരി പൊലീസ് ആണ് ഇയാള്‍ക്കെതിരെ കേസെടുത്തത്. അതിര്‍ത്തി കടന്ന് പരിശോധനാ കേന്ദ്രത്തില്‍ വച്ചാണ് രേഖയില്‍ തട്ടിപ്പ് നടത്തിയതായി മനസിലായത്. ഇയാള്‍ക്കെതിരെ പകര്‍ച്ചവ്യാധി നിയമപ്രകാരവും വ്യാജരേഖ ചമക്കല്‍ എന്നീ കുറ്റങ്ങള്‍ ചുമത്തും. രണ്ട് പേര്‍ക്കായി ലഭിച്ച പാസിലാണ് കൃത്രിമം കാട്ടിയത്. ഇയാളോടൊപ്പം വന്ന 15 വയസുകാരനും കസ്റ്റഡിയിലുണ്ട്.
അതേസമയം, പാസില്ലാതെ വരുന്നവരുടെ എണ്ണം ഇന്നലെ അപേക്ഷിച്ച് നോക്കുമ്പോള്‍ കുറവാണ് എന്ന് അധികൃതര്‍ പറഞ്ഞു. വാളയാറില്‍ ഇതുവരെ പാസില്ലാതെ മുപ്പതോളം പേരാണ് എത്തിയത്. ഇതില്‍ ഭൂരിഭാഗവും ചെന്നൈയില്‍ നിന്നെത്തിയവരാണ്. മലപ്പുറം, കണ്ണൂര്‍, കോഴിക്കോട്, എറണാകുളം ജില്ലകളിലുള്ളവര്‍ പാസില്ലാതെ എത്തിയത്. ഇവരോട് മടങ്ങി പോവണമെന്ന് ഉദ്യോഗസ്ഥര്‍ ആവശ്യപ്പെട്ടു. കേരള പാസില്ലാത്തവരെ തമിഴ്‌നാട് അതിര്‍ത്തിയായ മധുക്കരൈയില്‍ വെച്ചും തടയുന്നുണ്ട്. മൂലഹള്ള ചെക്ക് പോസ്റ്റില്‍ ആന്ധ്രയില്‍ നിന്നെത്തിയ രണ്ട് പേരെയുള്‍പ്പടെ പാസില്ലാത്ത മൂന്ന് യുവാക്കളെയാണ് ഇങ്ങനം തടഞ്ഞത്.
