പത്തനംതിട്ട: ശബരിമല മണ്ഡല-മകരവിളക്ക് തീര്ത്ഥാടന കാലയളവില് പത്തനംതിട്ട മുതല് പമ്പ വരെയുള്ള വഴിയോരങ്ങള്, നിലയ്ക്കല് ബേസ് ക്യാമ്പിലെ പാര്ക്കിംഗ് ഗ്രൗണ്ട് എന്നിവടങ്ങളില് വാഹനങ്ങളുടെ സമീപം ഗ്യാസ് സിലിണ്ടര് ഉപയോഗിച്ച് പാചകം ചെയ്യുന്നത് 2005-ലെ ദുരന്തനിവാരണ നിയമപ്രകാരം ജില്ലാ കളക്ടര് പി.ബി നൂഹ് നിരോധിച്ചു. ഇത് സംബന്ധിച്ച മുന്നറിയിപ്പ് ബോര്ഡുകള് വിവിധ ഭാഷകളില് ബന്ധപ്പെട്ട തദ്ദേശ സ്ഥാപനങ്ങളും വനംവകുപ്പും തിരുവിതാംകൂര് ദേവസ്വം ബോര്ഡും സ്ഥാപിക്കണമെന്നും ജില്ലാ കളക്ടറുടെ ഉത്തരവില് പറയുന്നു.
തീര്ഥാടന കാലയളവില് നിലയ്ക്കല് ബേസ് ക്യാമ്പ് മുതല് സന്നിധാനം വരെയുള്ള കടകളില് മാംസാഹാരം പാകം ചെയ്യുന്നതിനും വിതരണം ചെയ്യുന്നതിനും ഉപയോഗിക്കുതിനും കേരള പോലീസ് ആക്ടിലെ വകുപ്പ് 80 പ്രകാരം
നിരോധനം ഏര്പ്പെടുത്തിയിട്ടുണ്ട്.
കൂടാതെ തീര്ഥാടന കാലയളവില് ളാഹ മുതല് സന്നിധാനം വരെയുള്ള സ്ഥലങ്ങളിലെ കടകളില് അനുവദനീയമായ എണ്ണത്തില് കൂടുതല് ഗ്യാസ് സിലിണ്ടറുകള് ശേഖരിച്ചു വയ്ക്കുന്നതിനും നിരോധനം ഏര്പ്പെടുത്തിയിട്ടുണ്ട്. കടകളില് ഒരേസമയം ശേഖരിച്ചു വയ്ക്കാവുന്ന ഗ്യാസ് സിലിണ്ടറുകളുടെ എണ്ണം അഞ്ചായി നിജപ്പെടുത്തുകയും ചെയ്തു.
Discussion about this post