തിരുവനന്തപുരം: തന്ത്രി കണ്ഠരര് രാജീവരരുടെ വീട്ടില് നിന്നും കണ്ടെത്തിയ വാജിവാഹനം കോടതിയില് നല്കി പ്രത്യേക അന്വേഷണ സംഘം. കൊല്ലം വിജിലന്സ് കോടതിയിലാണ് വാജിവാഹനം നല്കിയിരിക്കുന്നത്. പഴയ കൊടിമരത്തിലുണ്ടായിരുന്ന വാജിവാഹനം തന്ത്രി കണ്ഠരര് രാജീവരര് കൈവശം വച്ചിരിക്കുകയായിരുന്നു. വര്ഷങ്ങള് പഴക്കമുള്ള ശില്പ്പമാണ് വാജിവാഹനം. 11കിലോ തൂക്കം വരുന്ന പഞ്ചലോഹത്തില് സ്വര്ണം പൊതിഞ്ഞതാണ് ഇത്. നിര്ണായകമായ ഒരു നീക്കമാണ് അന്വേഷണ സംഘം നടത്തിയിരിക്കുന്നത്. 2017 ലാണ് ശബരിമലയില് ഉണ്ടായിരുന്ന വളരെ മൂല്യമുള്ള വാജിവാഹനം തന്ത്രി വീട്ടിലേക്ക് കൊണ്ടുപോയത്. വിവാദങ്ങളെ തുടര്ന്ന് വാജിവാഹനം തിരികെ നല്കാന് തയ്യാറാണെന്ന് തന്ത്രി ദേവസ്വം ബോര്ഡിനെ അറിയിച്ചിരുന്നു. കട്ടിളപ്പാളി കേസില് തന്ത്രിയെ അറസ്റ്റ് ചെയ്തതിന് ശേഷം എസ്ഐടി സംഘം തന്ത്രിയുടെ വീട്ടില് റെയ്ഡ് നടത്തുകയും വാജിവാഹനം കണ്ടെത്തി കസ്റ്റഡിയില് എടുക്കുകയുമായിരുന്നു.
ശബരിമല ദ്വാരപാലക ശില്പ്പ കേസിലും തന്ത്രി കണ്ഠരര് രാജീവരെ അറസ്റ്റ് ചെയ്യാന് എസ്ഐടിക്ക് ഇന്ന് കോടതി അനുമതി നല്കി. തന്ത്രിക്ക് തട്ടിപ്പില് ബന്ധമുണ്ടെന്ന റിപ്പോര്ട്ട് എസ്ഐടി കൊല്ലം വിജിലന്സ് കോടതിയില് നല്കിയിട്ടുണ്ട്. സ്വര്ണം ചെമ്പാക്കിയ വ്യാജ മഹസ്സറില് തന്ത്രി ഒപ്പിട്ട് ഗൂഡാലോചനയില് പങ്കാളിയായെന്ന് എസ്ഐടി കോടതിയെ അറിയിച്ചു. കട്ടിളപാളി കടത്തിയ കേസിലാണ് തന്ത്രിയെ അറസ്റ്റ് ചെയ്തത്. തന്ത്രിയുടെ ജാമ്യാപേക്ഷ 19ലേക്ക് മാറ്റിയിട്ടുണ്ട്. മുന് ദേവസ്വം പ്രസിഡന്റ് എ.പത്മകുമാറിന്റെ റിമാന്ഡ് കാലാവധിയും നീട്ടി. ഈ മാസം 27വരെയാണ് റിമാന്ഡ് നീട്ടിയത്.
