തിരുവനന്തപുരം: പാലാരിവട്ടം പാലം അഴിമതിക്കേസില്‍ മുന്‍മന്ത്രിമാര്‍ക്കെതിരെയുള്ള അന്വേഷണവുമായി ബന്ധപ്പെട്ട് ഗവര്‍ണര്‍ ആരിഫ് മുഹമ്മദ് ഖാന്‍ വിജിലന്‍സ് ഡയറക്ടറെ വിളിപ്പിച്ചു. വി.കെ. ഇബ്രാഹിം കുഞ്ഞ്, കെ. ബാബു, വി.എസ്. ശിവകുമാര്‍ എന്നിവര്‍ക്കെതിരെയുള്ള അന്വേഷണത്തിന്റെ അനുമതിയാണ് ഗവര്‍ണറുടെ പരിഗണനയിലുള്ളത്. അന്വേഷണത്തിന് അനുമതി തേടിയുള്ള ഫയല്‍ ചൊവ്വാഴ്ചയാണ് ഗവര്‍ണര്‍ക്ക് ലഭിച്ചത്. എന്നാല്‍, ഫയലില്‍ പറഞ്ഞ കാര്യങ്ങളില്‍ കൂടുതല്‍ വിശദീകരണം ആവശ്യമുള്ളതിനാലാണ് ഗവര്‍ണര്‍ വിജിലന്‍സ് ഡയറക്ടറെ വിളിപ്പിച്ചത്. നിലവില്‍ വിജിലന്‍സ് ഡയറക്ടര്‍ അവധിയിലാണ്. അദ്ദേഹം തിരിച്ചെത്തി കഴിഞ്ഞതിന് ശേഷം മാത്രമേ കൂടിക്കാഴ്ചയുണ്ടാകു. അതേസമയം, പാലാരിവട്ടം പാലം അഴിമതി കേസില്‍ മുന്‍ മന്ത്രി ഇബ്രാഹിംകുഞ്ഞിന്റെ റിമാന്‍ഡ് തുടരും. ഈ മാസം 16 വരെ ഇബ്രാംഹിം കുഞ്ഞിനെ ജുഡീഷല്‍ കസ്റ്റഡിയില്‍ വിട്ടു. മൂവാറ്റുപുഴ വിജിലന്‍സ് കോടതിയുടേതാണ് വിധി. ഇബ്രാംഹികുഞ്ഞ് ആശുപത്രിയില്‍ തന്നെ തുടരുമെന്നാണ് വിവരം. കേസില്‍ വിജിലന്‍സ് ചോദ്യം ചെയ്യല്‍ റിപ്പോര്‍ട്ട് സമര്‍പ്പിച്ചു. വീണ്ടും ചോദ്യം ചെയ്യാന്‍ അനുമതി തേടുമെന്നും വിജിലന്‍സ് അറിയിച്ചു.
പാലാരിവട്ടം അഴിമതി; വിജിലന്‍സ് ഡയറക്ടറെ ഗവര്‍ണര്‍ വിളിപ്പിച്ചു
പുതിയ വാർത്തകൾ
