തിരുവനന്തപുരം: ജടായുരാമ സാംസ്കാരിക കേന്ദ്രം സംഘടിപ്പിച്ച ‘ജടായുരാമ സന്ധ്യ’ സൗത്ത് പാര്ക്ക് ഹോട്ടലില് മുന് മിസോറം ഗവര്ണര് കുമ്മനം രാജശേഖരന് ദീപപ്രോജ്ജ്വലനം നിര്വഹിച്ചു. വട്ടപ്പാറ സോമശേഖരന് നായര് രാമായണത്തിലെ ജടായുസ്തുതി പാരായണം ചെയ്ത് ആരംഭിച്ച ഭക്തിനിര്ഭരമായ ചടങ്ങില് സാമൂഹ്യ സാംസ്കാരിക രംഗത്തെ നിരവധി പ്രമുഖര് പങ്കെടുത്തു.
പരിപാടിയില് ജടായുരാമക്ഷേത്ര വികസന സമിതി ജനറല് സെക്രട്ടറി ചാര്ട്ടേഡ് അക്കൗണ്ടന്റ് രഞ്ജിത് കാര്ത്തികേയന് സ്വാഗതം പറഞ്ഞു. സമിതി ചെയര്മാന് ഡോ.സി.വി. ആനന്ദബോസ് ഐഎഎസ് സമ്മേളനത്തില് അദ്ധ്യക്ഷനായിരുന്നു. ഡോ.എം.ജി.ശശിഭൂഷണ്, വട്ടപ്പാറ സോമശേഖരന് നായര്, ശില്പി പുഷ്കരക്കുറുപ്പ് തുടങ്ങിയവര് പങ്കെടുക്കുന്ന ചടങ്ങില് ‘സ്ത്രീ ശാക്തീകരണം’ എന്ന വിഷയത്തെ ആസ്പദമാക്കി രാജകുടുംബാംഗം ഗൗരി ലക്ഷ്മി ഭായ് തമ്പുരാട്ടി ഓണ്ലൈനിലൂടെ വീഡിയോ പ്രഭാഷണം നടത്തി. ഡോ.എം.ജി ശശിഭൂഷണ് ‘കേരളത്തില് രാമ പ്രസ്ഥാനങ്ങളുടെ പ്രസക്തി’ എന്ന വിഷയത്തെ അധികരിച്ച് പ്രഭാഷണം നടത്തി. ജഗദ്ഗുരു സ്വാമി സത്യാനന്ദ സരസ്വതി, ജടായുരാമ ക്ഷേത്രം, ഷീ ഷോര്ട് ഫിലിം ഫെസ്റ്റിവല് എന്നീ വിഷയങ്ങളെക്കുറിച്ചുളള വീഡിയോ അവതരണവും നടന്നു. ക്ഷേത്രം ട്രസ്റ്റ് ഭാരവാഹികളായ രാമചന്ദ്രന് നായര്, പാല്ക്കുളങ്ങര കൃഷ്ണകുമാര് തുടങ്ങിയവരു സന്നിഹിതരായിരുന്നു.
അയോധ്യയില് ശ്രീരാമക്ഷേത്രം ഉയരുമ്പോള് ദക്ഷിണഭാരതത്തില് കേരളത്തില് ജടായുമംഗലം എന്ന സ്ഥലത്ത് ജടായുപ്പാറയില് ചേങ്കോട്ടുകോണം ശ്രീരാമദാസ ആശ്രമം മഠാധിപതി ജഗദ്ഗുരു സ്വാമി സത്യാനന്ദ സരസ്വതി തിരുവടികള് പ്രതിഷ്ഠിച്ച കോദണ്ഡരാമവിഗ്രഹം കുടികൊള്ളുന്ന സ്ഥലത്ത് മഹനീയമായ ഒരുക്ഷേത്രം ഉയരേണ്ടതിന്റെ ആവശ്യകത മുന്നിറുത്തിയാണ് പരിപാടി സംഘടിപ്പിച്ചത്. ശ്രീരാമായണം എന്ന ഇതിഹാസകാവ്യത്തിന് കേരളത്തിലെ ജീവസുറ്റ അടയാളമായി നിലകൊള്ളുന്ന പുണ്യഭൂമിയില് ഭക്തലക്ഷങ്ങള്ക്ക് അനുഗ്രഹമേകുവാനായാണ് ഈ ഉദ്യമത്തിന് സംഘാടകസമിതി ശ്രമിക്കുന്നതെന്ന് ചാര്ട്ടേഡ് അക്കൗണ്ടന്റ് രഞ്ജിത് കാര്ത്തികേയന് സ്വാഗതപ്രസംഗത്തില് പറഞ്ഞു. ചിത്രകാരിയും ഏഷ്യാബുക്ക് ഓഫ് റിക്കോഡ്സിന്റെ ഗ്രാന്ഡ്മാസ്റ്റര് അവാര്ഡ് ജേതാവുമായ ലക്ഷ്മി നായര്, വട്ടപ്പാറ സോമശേഖരന് നായര്, കോദണ്ഡരാമവിഗ്രഹത്തിന്റെ ശില്പി പുഷ്കരക്കുറുപ്പ്, ക്ഷേത്രം തന്ത്രി സതീഷ് ഭട്ടതിരി എന്നിവരെ ട്രസ്റ്റിന്റെ പേരില് കുമ്മനം രാജശേഖരന് പൊന്നാടചാര്ത്തി ആദരിച്ചു. തുടര്ന്ന് ജടായുപ്പാറയിലെ രാമസാന്നിധ്യം സമൂഹത്തിന് വെളിവാക്കിക്കൊടുത്ത ജഗദ്ഗുരു സ്വാമി സത്യാനന്ദ സരസ്വതി തിരുവടികളെ കുറിച്ച് തയാറാക്കിയ വീഡിയോ പ്രദര്ശനം നടന്നു.
ആര്ട്ടിസ്റ്റ് രാജേന്ദ്രന് രൂപകല്പ്പന ചെയ്ത പ്രോജക്ട് ലോഗോ പ്രകാശനവും ഷീ ഷോര്ട്ട് ഫിലിം ഫെസ്ററിവലിന്റെ വീഡിയോ പ്രദര്ശനവും ചടങ്ങിന് മിഴിവേകി. 13 അടി ഉയരമുള്ള കോദണ്ഡരാമവിഗ്രഹം 1974 ഫെബ്രുവരി 2ന് ജഗദ്ഗുരു സ്വാമി സത്യാനന്ദ സരസ്വതി തിരുവടികള് പ്രതിഷ്ഠിച്ച ചരിത്രം കുമ്മനം രാജശേഖരന് പ്രസംഗത്തില് വിശദീകരിച്ചു. രാമായണ കള്ച്ചറല് സെന്റര് എന്ന ആശയം നടപ്പിലാക്കുന്നതിനൊപ്പം സ്ത്രീസുരക്ഷയും ജീവകാരുണ്യപ്രവര്ത്തനം ഉള്പ്പെടുന്ന പരിസ്ഥിതി സംരക്ഷണകേന്ദ്രവും പദ്ധതിയില് ഉള്പ്പെടുത്തിയതായും അദ്ദേഹം പറഞ്ഞു. പാല്ക്കുളങ്ങര കൃഷ്ണകുമാര് സമ്മേളനത്തില് കൃതജ്ഞത രേഖപ്പെടുത്തി. കോദണ്ഡരാമക്ഷേത്ര നിര്മാണത്തിനും രാമായണ ലിവിംഗ് മ്യൂസിയം പദ്ധതിയുടെ വികസനത്തിനും വേണ്ടി jatayuramatemple.in എന്ന വെബ്സൈറ്റിലൂടെ ഭക്തജനങ്ങള്ക്ക് സാമ്പത്തിക സമര്പ്പണം നടത്താവുന്നതാണെന്ന് ട്രസ്റ്റ് ഭാരവാഹികള് അറിയിച്ചു.
Discussion about this post