തിരുവനന്തപുരം: അടിയന്തര വിദഗ്ധ ചികിത്സ ലഭ്യമാക്കാനായി ആവിഷ്കരിച്ച എമര്ജന്സി മെഡിസിന് വിഭാഗത്തിന് കരുത്തേകി എമര്ജന്സി മെഡിസിന് പിജി കോഴ്സിന് അനുമതി ലഭ്യമായതായി ആരോഗ്യ മന്ത്രി വീണാ ജോര്ജ്. തിരുവനന്തപുരം മെഡിക്കല് കോളജില് മൂന്ന് എമര്ജന്സി മെഡിസിന് പിജി സീറ്റുകള്ക്കാണ് നാഷണല് മെഡിക്കല് കമ്മീഷന് അനുമതി നല്കിയത്.
എമര്ജന്സി മെഡിസിന് പിജി കോഴ്സ് ഈ വര്ഷം തന്നെ ആരംഭിക്കാനുള്ള നടപടികള് സ്വീകരിക്കുമെന്നും മന്ത്രി വ്യക്തമാക്കി. മറ്റ് പ്രധാന മെഡിക്കല് കോളജുകളിലും എമര്ജന്സി മെഡിസിന് കോഴ്സിനുള്ള അനുമതി ലഭ്യമാക്കാന് ശ്രമിക്കും.
പ്രധാന മെഡിക്കല് കോളജുകളില് എമര്ജന്സി മെഡിസിന് വിഭാഗം ആരംഭിച്ചിട്ടുണ്ട്. അത്യാഹിത വിഭാഗത്തില് മെഡിസിന്, സര്ജറി, ഓര്ത്തോപീഡിക്സ് തുടങ്ങിയ വിവിധ വിഭാഗങ്ങളെ ഏകോപിപ്പിച്ചാണ് എമര്ജന്സി മെഡിസിന് വിഭാഗം ആരംഭിച്ചത്. ഈ വിഭാഗത്തിനായി 108 തസ്തികകള് സൃഷ്ടിക്കുകയും ചെയ്തു.
മികച്ച ട്രയേജ് സംവിധാനം, രോഗ തീവ്രതയനുസരിച്ച് രോഗികള്ക്ക് അടിയന്തര പരിചരണം ഉറപ്പാക്കാന് പച്ച, മഞ്ഞ, ചുവപ്പ് മേഖലകള് എന്നിവയെല്ലാം എമര്ജന്സി മെഡിസിന് വിഭാഗത്തിന്റെ പ്രത്യേകതയാണ്. ഓപ്പറേഷന് തീയറ്ററുകള്, തീവ്ര പരിചരണ വിഭാഗങ്ങള്, സ്കാനിംഗ് തുടങ്ങി വിവിധ പരിശോധനാ സംവിധാനങ്ങള് ഒരൊറ്റ കുടക്കീഴില് ഏകോപിപ്പിച്ചുണ്ട്.
ഒരാള് അപകടത്തിയ.ല്പ്പെട്ടാല് ഗോള്ഡന് അവറിനുള്ളില് അദ്ദേഹത്തെ രക്ഷിക്കുക എന്നത് വളരെ പ്രധാനമാണ്. അതിന് വിദഗ്ധ പരിശീലനം ആവശ്യമാണ്. ഇത് മുന്നില് കണ്ട് സംസ്ഥാന സര്ക്കാര് ആരോഗ്യ പ്രവര്ത്തകരെ പരിശീലിപ്പിക്കുന്നതിനായി തിരുവനന്തപുരത്ത് അപെക്സ് ട്രോമ & എമര്ജന്സി ലേണിംഗ് സെന്റര് (എടിഇഎല്സി) ആരംഭിച്ചിട്ടുണ്ടെന്നും മന്ത്രി പറഞ്ഞു.
Discussion about this post