വയനാട്: വെള്ളമുണ്ട കണ്ടത്തുവയല് ഇരട്ടക്കൊലക്കേസില് പ്രതി വിശ്വനാഥന് വധശിക്ഷ. കല്പറ്റ ജില്ലാ സെഷന്സ് കോടതിയാണ് വധശിക്ഷ വിധിച്ചത്. ഇതിന് പുറമെ പത്ത് ലക്ഷം രൂപ പിഴയും കോടതി പ്രതിയ്ക്ക് വിധിച്ചു. 2018 ജൂലൈയിലായിരുന്നു നാടിനെ നടുക്കിയ ഇരട്ടക്കൊലപാതകം നടന്നത്.
302 വകുപ്പ് പ്രകാരമാണ് ശിക്ഷ വിധിച്ചത്. കൊലപാതകം, ഭവനഭേദനം, കവര്ച്ച, തെളിവ് നശിപ്പിക്കല് എന്നീ വകുപ്പുകള് പ്രകാരം വിശ്വനാഥന് കുറ്റക്കാരനാണെന്ന് കഴിഞ്ഞ ദിവസം ജില്ലാ സെഷന്സ് കോടതി കണ്ടെത്തിയിരുന്നു. ഇതിന് പിന്നാലെയാണ് കേസ് ഇന്നത്തേയ്ക്ക് ശിക്ഷാ വിധിക്കായി മാറ്റിയത്.
നവദമ്പതിമാരായിരുന്ന ഉമ്മര്, ഭാര്യ ഫാത്തിമ എന്നിവരെയാണ് വിശ്വനാഥന് കൊലപ്പെടുത്തിയത്. കോഴിക്കോട് സ്വദേശിയാണ് ശിക്ഷിക്കപ്പെട്ട വിശ്വനാഥന്. കേസില് ആദ്യഘട്ടത്തില് അന്വേഷണം വഴിമുട്ടിനിന്നിരുന്നു. പിന്നീട് രണ്ട് മാസങ്ങള്ക്ക് ശേഷമാണ് പ്രതി പിടിലാവുന്നത്. മാനന്തവാടി ഡിവൈ.എസ്.പിയായിരുന്ന കെ.എം. ദേവസ്യയുടെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിച്ചത്.
മോഷണം ചെറുക്കാനുള്ള ശ്രമത്തിനിടെ വിശ്വനാഥന് ദമ്പതിമാരെ അടിച്ചുകൊന്നു എന്നാണ് കേസ്. വീട്ടില് കയറിയ വിശ്വനാഥന് ഉറങ്ങിക്കിടക്കുകയായിരുന്ന ഫാത്തിമയുടെ മാല പൊട്ടിക്കാന് ശ്രമിച്ചു. ശബ്ദം കേട്ടുണര്ന്ന ഉമ്മറിനെയും ഫാത്തിമയെയും കൈയില് കരുതിയ കമ്പിവടി കൊണ്ട് അടിച്ചു. മരണം ഉറപ്പാക്കിയ ശേഷം ഫാത്തിമയുടെ ശരീരത്തിലുണ്ടായിരുന്ന ആഭരണങ്ങളെടുത്ത് വീട്ടിലും പരിസരത്തും മുളകുപൊടി വിതറി വിശ്വനാഥന് രക്ഷപ്പെടുകയായിരുന്നു.
Discussion about this post