തൃശൂര്‍: മേളക്കൊഴുപ്പിന്റെയും കുടമാറ്റത്തിന്റെയും സംഗമഭൂമിയായി പൂരനഗരി. ലോകപ്രശസ്തമായ മഠത്തില്‍ വരവ് പഞ്ചവാദ്യം മുഴങ്ങിയതിനു പിന്നാലെ ഘടകപൂരങ്ങള്‍ വരവായി. ഇക്കുറി കോങ്ങാട് മധുവിന്റെ പ്രാമാണികത്വത്തിലാണ് തിരുവമ്പാടിയുടെ മഠത്തില്‍ വരവ് പഞ്ചവാദ്യം.
കൊവിഡിന്റെ പശ്ചാത്തലത്തില്‍ രണ്ട് വര്‍ഷത്തെ ഇടവേളയ്ക്ക് ശേഷം പഴയ പ്രൗഢി വീണ്ടെടുത്ത പൂരനഗരിയിലേക്ക് പതിനായിരങ്ങളാണ് എത്തിക്കൊണ്ടിരിക്കുന്നത്. നഗരത്തില്‍ കനത്ത സുരക്ഷയാണ് ഏര്‍പ്പെടുത്തിയിരിക്കുന്നത്. രണ്ടരയോടെ പാറമേക്കാവിന്റെ ഇലഞ്ഞിത്തറ മേളം കൊട്ടിക്കയറും. കുട്ടന്‍ മാരാരുടെ നേതൃത്വത്തിലാണ് ഇലഞ്ഞിത്തറ മേളം. വൈകിട്ട് അഞ്ചരയോടെയാണ് ജനലക്ഷങ്ങള്‍ സാക്ഷിയാകുന്ന ഭഗവതിമാരുടെ കൂടിക്കാഴ്ചയും കുടമാറ്റവും.
രാത്രി ഏഴിന് കുടമാറ്റം കഴിഞ്ഞ് ഭഗവതിമാര്‍ മടങ്ങും. നാളെ പുലര്‍ച്ചെ മൂന്ന് മണി മുതല്‍ അഞ്ച് വരെയാണ് വെടിക്കെട്ട്. നാളെ രാവിലെ ഒന്‍പതിന് ശ്രീമൂലസ്ഥാനത്ത് പൂരം വിടചൊല്ലിപ്പിരിയും.
Discussion about this post