കോഴിക്കോട്: കാലവര്‍ഷം തുടങ്ങാന്‍ ദിവസങ്ങള്‍ മാത്രം ശേഷിക്കെ വാഹനാപകടങ്ങള്‍ കുറയ്ക്കാന്‍ ‘ഓപ്പറേഷന്‍ റെയിന്‍ബോ’യുമായി കേരള റോഡ് സുരക്ഷാ അഥോറിറ്റി. 13 ഇന നിര്‍ദേശവുമായി റോഡപകടങ്ങള്‍ക്കെതിരേ കാമ്പയിന്‍ ശക്തിപ്പെടുത്തുകയാണ് അഥോറിറ്റിയുടെ ലക്ഷ്യം.
കോവിഡ് കാലത്ത് വാഹനാപകടങ്ങളുടെ എണ്ണത്തില്‍ കുറവുണ്ടായിരുന്നു. മഴക്കാലം കൂടി വരുന്നതോടെ അപകടം കൂടാന്‍ സാധ്യത കണ്ടാണ് നിര്‍ദേശങ്ങള്‍. മഴക്കാലത്ത് അപകട വര്‍ധന 12 ശതമാനംവരെയാണെന്നാണ് വിലയിരുത്തല്‍.
വാഹനങ്ങളുടെ ബ്രേക്ക്, വൈപ്പര്‍, ഇന്‍ഡിക്കേറ്റര്‍ എന്നിവ നല്ല രീതിയില്‍ പ്രവര്‍ത്തിക്കുന്നുണ്ടെന്ന് ഉറപ്പാക്കണം. വാഹനത്തില്‍ ഫോഗ് ലാമ്പ്, പുകമഞ്ഞില്‍ കാഴ്ച ലഭ്യമാകുന്ന ഉപകരണങ്ങള്‍ എന്നിവ പ്രവര്‍ത്തിക്കുന്നുവെന്ന് ഉറപ്പാക്കണം. വിന്‍ഡ് സ്‌ക്രീന്‍ മങ്ങുന്നത് ഡീ ഫോഗ് ചെയ്യാനുള്ള സംവിധാനം ഉപയോഗിക്കല്‍ അറിഞ്ഞിരിക്കണം.
മഴക്കാലത്ത് ബ്രേക്കിംഗ്ദൂരം കൂടുതലായതിനാല്‍ മുന്നിലുള്ള വാഹനത്തില്‍ നിന്നും നിശ്ചിത അകലം സൂക്ഷിക്കുക. മഴയിലും മൂടല്‍ മഞ്ഞിലും മങ്ങിയ ഹെഡ്ലൈറ്റ് ഉപയോഗിക്കുക, അനാവശ്യമായി ഹൈ ബീം ലൈറ്റ് ഉപയോഗിക്കരുത്, ഇടിമിന്നലും കനത്ത മഴയും ഉള്ളപ്പോള്‍ കഴിവതും വാഹനം ഓടിക്കാതിരിക്കുക തുടങ്ങിയ നിര്‍ദേശങ്ങളും മുന്നോട്ടുവയ്ക്കുന്നു.
റോഡിലെ വെള്ളം, കുഴികള്‍, കാഴ്ചയിലെ അവ്യക്തതകള്‍ തുടങ്ങിയ കാരണങ്ങളാലാണ് കൂടുതല്‍ അപകടങ്ങള്‍ ഉണ്ടാവുന്നത്.
