തിരുവനന്തപുരം: ജീവനക്കാരുടെ ശമ്പളവിതരണം അനിശ്ചിതമായി വൈകുന്നതിനെത്തുടര്‍ന്ന് കെഎസ്ആര്‍ടിസിയില്‍ ഇന്നലെ മുതല്‍ ജീവനക്കാര്‍ അനിശ്ചിതകാലസമരം ആരംഭിച്ചു.
സിഐടിയു, ഐഎന്‍ടിയുസി സംഘടനകളുടെ ആഭിമുഖ്യത്തിലാണ് ഇന്നലെ മുതല്‍ കിഴക്കേക്കോട്ടയിലെ കെഎസ്ആര്‍ടിസി ആസ്ഥാനത്ത് സമരം ആരംഭിച്ചത്. അഞ്ചാം തീയതി കഴിഞ്ഞിട്ടും ശന്പളം ലഭിക്കാത്തതിനെ തുടര്‍ന്നാണ് ജീവനക്കാര്‍ സമരത്തിലേക്കു കടന്നത്. എന്നാല്‍ ബസ് സര്‍വീസുകളെ ബാധിക്കാത്ത വിധത്തിലാണു സമരം നടത്തുന്നത്.
അതേസമയം, കെഎസ്ആര്‍ടിസിയിലെ ശന്പള വിതരണത്തിനു സര്‍ക്കാര്‍ ഇന്നലെ 30 കോടി രൂപ അനുവദിച്ചു. ശന്പള വിതരണത്തിനു കഴിഞ്ഞയാഴ്ച കെഎസ്ആര്‍ടിസി മാനേജ്‌മെന്റ് സര്‍ക്കാരിനോട് 65 കോടി രൂപ ആവശ്യപ്പെട്ടിരുന്നു. 30 കോടി രൂപ മതിയാകില്ലെന്നും 52 കോടി രൂപകൂടി അനുവദിക്കണമെന്നും മാനേജ്‌മെന്റ് ധനവകുപ്പിനോട് ആവശ്യപ്പെട്ടു.
കിഴക്കേക്കോട്ടയിലെ കെഎസ്ആര്‍ടിസി ആസ്ഥാനത്ത് സിഐടിയു ആഭിമുഖ്യത്തിലുള്ള എംപ്ലോയീസ് അസോസിയേഷന്റെ നേതൃത്വത്തിലുള്ള സമരം ഇന്നലെ സിഐടിയു സംസ്ഥാന പ്രസിഡന്റ് ആനത്തലവട്ടം ആനന്ദന്‍ ഉദ്ഘാടനം ചെയ്തു.
കെഎസ്ആര്‍ടിസി സിഎംഡി ബിജു പ്രഭാകറിനെതിരേ കടുത്ത വിമര്‍ശനമാണ് അദ്ദേഹം ഉന്നയിച്ചത്. കെഎസ്ആര്‍ടിസിയില്‍ പണിയെടുക്കുന്ന തൊഴിലാളികളെ മാനേജ്‌മെന്റ് ദ്രോഹിക്കുകയാണെന്ന് അദ്ദേഹം പറഞ്ഞു. ജീവനക്കാര്‍ക്കെതിരേ അദ്ദേഹം അപവാദ പ്രചാരണം നടത്തുകയാണ്. ഇനി ഇങ്ങനെ തുടരാന്‍ അനുവദിക്കില്ല. 30 ലക്ഷം ആളുകള്‍ പ്രതിദിനം ആശ്രയിക്കുന്ന ഗതാഗതസംവിധാനം നിര്‍ത്തുന്നുവെങ്കില്‍ നിര്‍ത്തട്ടെയെന്ന ധാരണ ശരിയല്ലെന്നും ആനത്തലവട്ടം പറഞ്ഞു.
