തിരുവനന്തപുരം: കേരളത്തിന്റെ നല്ല ഭാവിക്കുള്ള ചുവടുവയ്പ്പാണു പാഠപുസ്തക പരിഷ്കരണമെന്നു ധനമന്ത്രി കെ.എന്. ബാലഗോപാല്. പ്രീപ്രൈമറി മുതല് ഹയര്സെക്കന്ഡറി വരെയുള്ള പാഠ്യപദ്ധതി പരിഷ്കരണത്തിനു മുന്നോടിയായുള്ള സംസ്ഥാനതല ആശയരൂപീകരണ ശില്പശാല ഉദ്ഘാടനം ചെയ്യുകയായിരുന്നു അദ്ദേഹം.
സ്കൂള് വിദ്യാഭ്യാസത്തിന്റെ ഘടന, ഉള്ളടക്കം, പൊതുസ്വഭാവം എന്നിവ സംബന്ധിച്ച് ഗൗരവമായ ചര്ച്ചകളും മികച്ച ആശയങ്ങളും രൂപപ്പെടേണ്ടതുണ്ട്. സംസ്ഥാനത്തെ വിദ്യാഭ്യാസത്തുണ്ടായ ഭൗതിക വളര്ച്ചയ്ക്കൊപ്പം അക്കാദമിക നിലവാരം മുന്നേറാനുണ്ടെന്നും മന്ത്രി വ്യക്തമാക്കി.
ഉള്ളടക്കത്തില് കാലാനുസൃതമായ മാറ്റങ്ങള് വരുത്തിയാണു പാഠ്യപദ്ധതി പരിഷ്കരണം നടപ്പാക്കുകയെന്നു പരിപാടിയില് അധ്യക്ഷത വഹിച്ച പൊതുവിദ്യാഭ്യാസ മന്ത്രി വി. ശിവന്കുട്ടി പറഞ്ഞു.
മതേതരത്വം, സമഭാവന തുടങ്ങിയ മൂല്യങ്ങളില് അധിഷ്ഠിതമായതും കുട്ടികളില് സര്ഗാത്മകത, വിമര്ശന ചിന്ത എന്നിവയ്ക്കു വഴിയൊരുക്കുന്നതുമായ വിദ്യാഭ്യാസ രീതിയാണു രൂപപ്പെടേണ്ടത്. സ്കൂള് കാലഘട്ടത്തില് ഓരോ കുട്ടിക്കും അവരുടെ കഴിവുകള് വളര്ത്തിയെടുക്കാന് സാധിക്കണം. നവകേരള സൃഷ്ടിക്ക് ഉതകുന്ന രീതിയിലുള്ള സമഗ്രമായ മാറ്റങ്ങള് ഉള്ക്കൊള്ളുന്നതാവണം പരിഷ്കരിച്ച പാഠ്യപദ്ധതി. അധ്യാപകര്ക്കു നിരന്തരമായ ശാക്തീകരണം ഉറപ്പുവരുത്തുവാനുള്ള ഒരു പ്രധാന ഉപാധിയായി ഡിജിറ്റല് സങ്കേതത്തെ മാറ്റിത്തീര്ക്കണമെന്നും മന്ത്രി പറഞ്ഞു.
കല, സാംസ്കാരിക മേഖലകള്ക്കു പരിഷ്കരിച്ച പാഠ്യ പദ്ധതിയില് അര്ഹമായ സ്ഥാനം നല്കണമെന്നു ചലച്ചിത്ര സംവിധായകന് അടൂര് ഗോപാലകൃഷ്ണന് ആവശ്യപ്പെട്ടു. വൈജ്ഞാനികതയുടെയും വൈകാരികതയുടെയും ശ്രേഷ്ഠമായ മിശ്രണമാകണം വിദ്യാര്ഥികളില് ഉണ്ടാകേണ്ടതെന്നു മുന് ചീഫ് സെക്രട്ടറി കെ. ജയകുമാര് പറഞ്ഞു. ആദര്ശങ്ങള്ക്കു സ്ഥാനം നല്കാതെ പ്രയോഗികതയ്ക്കു മാത്രം ഊന്നല് നല്കുന്നതാണു ദേശീയ വിദ്യാഭ്യാസ നയം, എന്നാല് സാമൂഹിക സമത, സാമൂഹിക ബോധം തുടങ്ങിയ മൂല്യങ്ങള്ക്ക് പ്രാധാന്യം നല്കുന്ന പാഠ്യപദ്ധതി ഉണ്ടാകണമെന്നും അദ്ദേഹം കൂട്ടിച്ചേര്ത്തു.
2005 ലെ ദേശീയ പാഠ്യപദ്ധതി നിര്ദേശങ്ങള്ക്കനുസൃതമായി കേരള പാഠ്യപദ്ധതി ചട്ടക്കൂട് 2007 ലാണ് തയാറാക്കിയത്. പിന്നീട് സമഗ്രമായ പരിഷ്കാരണത്തിനു തുടക്കമിടുന്നത് ഇതാദ്യമായാണ്. സ്റ്റീറിങ് കമ്മിറ്റി, കോര് കമ്മിറ്റി എന്നിങ്ങനെ പ്രത്യേക സമിതികള് ചേര്ന്നാണ് വിഷയം ചര്ച്ച ചെയ്യുന്നത്. സ്കൂള് വിദ്യാഭ്യാസത്തിന്റെ അക്കാദമിക കാഴ്ചപ്പാട്, സമീപനം, വിനിമയം, മൂല്യനിര്ണയം എന്നിവ ഉള്ക്കൊള്ളുന്ന സാമൂഹികരേഖയാണ് പാഠ്യപദ്ധതി. കാഴ്ചപ്പാടും സമീപനവും വ്യക്തമാക്കുന്ന പാഠ്യപദ്ധതി ചട്ടക്കൂട്, ഉള്ളടക്കവുമായി ബന്ധപ്പെട്ട സിലബസും പാഠപുസ്തകങ്ങളും, മറ്റു പഠന-ബോധന സാമഗ്രികളായ ടീച്ചര് ടെക്സ്റ്റ്, വര്ക്ക് ബുക്ക്, ഐ.സി.ടി. സൗഹൃദ വിദ്യാഭ്യാസത്തിന് സഹായകമായ ഡിജിറ്റല് സംവിധാനങ്ങളും വിഭവങ്ങളെല്ലാം ഉള്ക്കൊളളുന്നതാണ് പാഠ്യപദ്ധതി. പഠനത്തിന്റെ ആസൂത്രണം, നിര്വഹണം, വിലയിരുത്തല് എന്നിവ എങ്ങനെയാവണമെന്ന് നിര്ദ്ദേശിക്കുന്ന സമഗ്രരേഖ കൂടിയാണിത്.
മേയര് ആര്യ രാജേന്ദ്രന്, ജില്ലാ പഞ്ചായത്ത് പ്രസിഡന്റ് ഡി. സുരേഷ് കുമാര്, പൊതുവിദ്യാഭ്യാസ ഡയറക്ടര് കെ. ജീവന് ബാബു, കൈറ്റ് സി.ഇ.ഒ. അന്വര് സാദത്ത്, എസ്.സി.ഇ.ആര്.ടി ഡയറക്ടര് ആര്.കെ. ജയപ്രകാശ് എന്നിവര് പ്രസംഗിച്ചു. ഉച്ചയ്ക്ക് ശേഷം നടന്ന സ്റ്റീറിങ് കമ്മിറ്റി, കോര് കമ്മിറ്റി സംയുക്ത യോഗം പൊതുവിദ്യാഭ്യാസ മന്ത്രി വി. ശിവന്കുട്ടി ഉദ്ഘാടനം ചെയ്തു. എസ്.സി.ഇ.ആര്.ടി ഡയറക്ടര് ആര്.കെ. ജയപ്രകാശ് പാഠ്യപദ്ധതി പരിഷ്കരണ രൂപരേഖ അവതരിപ്പിച്ചു. എസ്.സി.ഇ.ആര്.ടി കരിക്കുലം മേധാവി ചിത്രാ മാധവന് ചര്ച്ച ക്രോഡീകരിച്ചു.
Discussion about this post