തിരുവനന്തപുരം: മുഖ്യമന്ത്രിക്കെതിരെ വിമാനത്തിനുള്ളിലുണ്ടായ പ്രതിഷേധത്തില് അറസ്റ്റിലായ യൂത്ത് കോണ്ഗ്രസ് പ്രവര്ത്തകര്ക്ക് ജാമ്യം. ഹൈക്കോടതിയാണ് ജാമ്യം അനുവദിച്ചത്. കണ്ണൂര് സ്വദേശികളായ ഫര്സീന് മജീദിനും, നവീന് കുമാറിനുമാണ് കോടതി ജാമ്യം അനുവദിച്ചത്. കേസിലെ മൂന്നാം പ്രതി സുജിത് നാരായണന് ഹൈക്കോടതി മുന്കൂര് ജാമ്യവും അനുവദിച്ചു.
ഉപാധികളോടെയാണ് ഹൈക്കോടതി ജാമ്യം അനുവദിച്ചത്. പ്രതികള് അരലക്ഷം രൂപ ജാമ്യത്തുകയായി കെട്ടിവയ്ക്കണം. അന്വേഷണ ഉദ്യോഗസ്ഥര് ആവശ്യപ്പെടുന്പോള് അല്ലാതെ തിരുവനന്തപുരം ജില്ലയില് കടക്കരുതെന്നും കോടതി ഉത്തരവിട്ടു.
വിമാനത്തില് നടന്നത് മുദ്രാവാക്യം വിളിമാത്രമാണെന്നും അതിന് വധശ്രമത്തിന് കേസെടുക്കാന് കഴിയില്ലെന്നും ഹര്ജിക്കാര് കോടതിയെ അറിയിച്ചിരുന്നു. സിസിടിവി ദൃശ്യങ്ങള് പരിശോധിച്ചാല് ഇക്കാര്യം വ്യക്തമാകുമെന്നും പ്രതികള് അറിയിച്ചു.
ഇതോടെവിമാനത്തിന് അകത്തെ ദൃശ്യം റെക്കോര്ഡ് ചെയ്യാന് സംവിധാനം ഉണ്ടോ എന്ന് കോടതി ചോദിച്ചു. സിസിടിവി ലഭിച്ചാല് പരിശോധിക്കാം എന്നും കോടതി വ്യക്തമാക്കി. എന്നാല് ചെറു വിമാനം ആയതിനാല് സിസിടിവിയില്ലെന്ന് എന്ന് ഡിജിപി വ്യക്തമാക്കി. എന്നാല് ഇപ്പോള് മാറ്റിയതായിരിക്കാം എന്ന് മൂന്നാം പ്രതി സുജിത്തിന്റെ അഭിഭാഷകന് കോടതിയില് പറഞ്ഞു.
മുഖ്യമന്ത്രിയെ ആക്രമിക്കാന് മൂന്ന് പ്രതികളും നേരെത്തെ പദ്ധതി ഇട്ടിരുന്നതായി ഡിജിപി വാദിച്ചു. ഇക്കാര്യം സ്ഥിരീകരിക്കുന്ന സാക്ഷിമൊഴികളും ഡിജിറ്റല് രേഖകളുമുണ്ട്. ഗൂഢാലോചനയുടെ ഭാഗമാണ് ഈ ആക്രമണമെന്നും ഡിജിപി വാദിച്ചു.
ഇരുഭാഗത്തിന്റെയും വാദം കേട്ടശേഷം കോടതി പ്രതികള്ക്ക് ജാമ്യം അനുവദിക്കുകയായിരുന്നു.
Discussion about this post