തിരുവനന്തപുരം: മഗ്സസെ അവാര്ഡ് നിരസിച്ച സംഭവം സ്ഥിരീകരിച്ച് മുന്മന്ത്രി കെ.കെ. ഷൈലജ. പാര്ട്ടി തീരുമാനത്തെ തുടര്ന്നാണ് അവാര്ഡ് നിരസിച്ചതെന്നും കെ.കെ. ഷൈലജ അറിയിച്ചു.
കേന്ദ്ര-സംസ്ഥാന നേതൃത്വവുമായി ചര്ച്ച ചെയ്താണ് തീരുമാനമെടുത്തത്. നിരസിച്ചത് കൂട്ടായ തീരുമാനമാണെന്നും ഷൈലജ ടീച്ചര് പറഞ്ഞു.
സംസ്ഥാനത്ത് നിപ, കോവിഡ് 19 പൊട്ടിപ്പുറപ്പെടുന്നത് നിയന്ത്രിക്കുന്നതിന് മുന്നില് നിന്ന് ഫലപ്രദമായി നേതൃത്വം നല്കുന്ന പൊതുജനാരോഗ്യ സംവിധാനം ഉറപ്പാക്കുന്നതിലെ പ്രതിബദ്ധയ്ക്കും സേവനത്തിനുമാണ് രമണ് മഗ്സസെ അവാര്ഡ് ഫൗണ്ടേഷന് കെ.കെ. ഷൈലജയെ തേടിയെത്തിയത്.
ഷൈലജയെ അവാര്ഡിന് പരിഗണിക്കുന്ന കാര്യം ജൂലൈ മാസത്തില് തന്നെ ഫൗണ്ടേഷന് അറിയിച്ചിരുന്നു. പുരസ്കാരത്തിന് തെരഞ്ഞെടുക്കപ്പെട്ട വിവരം അറിയിച്ചു കൊണ്ട് മുന് മന്ത്രിക്ക് അയച്ച ഇ മെയിലില്, അവാര്ഡ് സ്വീകരിക്കാനുള്ള സന്നദ്ധത രേഖാമൂലം അറിയിക്കാനും ഫൗണ്ടേഷന് ആവശ്യപ്പെട്ടിരുന്നു.
സിപിഎം കേന്ദ്ര കമ്മിറ്റി അംഗം കൂടിയായ അവര് ഇക്കാര്യം പാര്ട്ടിയെ അറിയിച്ചു. പിന്നീട് വിഷയം പാര്ട്ടി നേതൃത്വവുമായി ചര്ച്ചയും ചെയ്തു. പിന്നാലെയാണ് അവാര്ഡ് സ്വീകരിക്കേണ്ടെന്ന തീരുമാനത്തിലെത്തിയത്. അവാര്ഡിന്റെ വിവിധ വശങ്ങള് പരിശോധിച്ച നേതൃത്വം, അത് സ്വീകരിക്കേണ്ടെന്ന് തീരുമാനിക്കുകയായിരുന്നു. ആരോഗ്യ മന്ത്രി എന്ന നിലയില് പാര്ട്ടി ഏല്പ്പിച്ച കടമ മാത്രമാണ് ഷൈലജ നിര്വഹിച്ചത് എന്നാണ് വിലയിരുത്തല്.
നിപ, കോവിഡ് മഹാമാരികള്ക്കെതിരായ പോരാട്ടം ഒരു കൂട്ടായ പ്രസ്ഥാനത്തിന്റെ ഭാഗമായിരുന്നു. അതുകൊണ്ടു തന്നെ വ്യക്തിഗത മികവിന് നല്കുന്ന അവാര്ഡ് സ്വീകരിക്കേണ്ടതില്ല എന്നാണ് പാര്ട്ടി നിലപാട്. പിന്നാലെ അവാര്ഡ് സ്വീകരിക്കാന് കഴിയില്ലെന്ന് കാണിച്ച് ഷൈലജ ഫൗണ്ടേഷന് കത്തയച്ചു.
ഏഷ്യയുടെ നോബല് സമ്മാനമായി പരക്കെ കണക്കാക്കപ്പെടുന്ന മഗ്സസെ അവാര്ഡ് അന്തരിച്ച ഫിലിപ്പൈന്സ് ഭരണാധികാരി ആയിരുന്ന രമണ് മഗ്സസെയുടെ പേരിലുള്ള അന്തര്ദേശീയ ബഹുമതിയാണ്.
കമ്യൂണിസ്റ്റ് ഗറില്ലകളെ അടിച്ചമര്ത്തിയ ഫിലിപ്പീന്സ് ഭരണാധികാരി ആയിരുന്നു മഗ്സസെ എന്നതും അവാര്ഡ് നിരസിക്കാനുള്ള മറ്റൊരു തീരുമാനമാണെന്നും റിപ്പോര്ട്ടിലുണ്ട്. ഇത്തരമൊരു അവാര്ഡ് സ്വീകരിക്കുന്നത് ദീര്ഘകാലാടിസ്ഥാനത്തില് തിരിച്ചടിയാകുമെന്നും സിപിഎം വിലയിരുത്തുന്നു.
അവാര്ഡ് ഷൈലജ സ്വീകരിച്ചിരുന്നെങ്കില് ഈ പുരസ്കാരം നേടുന്ന ആദ്യ മലയാളി വനിതയായി അവര് മാറുമായിരുന്നു.
Discussion about this post