സന്നിധാനം: ശബരിമല സന്നിധാനത്ത് ദര്ശന പുണ്യം തേടിയെത്തിയ ഭക്തജനലക്ഷങ്ങള്ക്ക് സായൂജ്യം നല്കി മകരജ്യോതി തെളിഞ്ഞു. മെയ്യും മനവും അയ്യനിലലിഞ്ഞതോടെ മകരജ്യോതി പ്രഭയില് സന്നിധാനം തിളങ്ങി. മൂന്ന് തവണ മകരജ്യോതി തെളിഞ്ഞപ്പോള് ശരണമന്ത്രങ്ങളാല് സന്നിധാനം മുഖരിതമായി.
വൈകുന്നേരം ആറ് മണിയോടെ തിരുവാഭാരണ ഘോഷയാത്ര സന്നിധാനത്ത് എത്തി. ദേവസ്വം പ്രതിനിധികളും അയ്യപ്പ സേവാസംഘം പ്രവര്ത്തകരും ചേര്ന്ന് ഘോഷയാത്രയെ സ്വീകരിച്ചു. പതിനെട്ടാം പടി കയറി സോപാനത്തില് എത്തിയതോടെ തന്ത്രിയും മേല്ശാന്തിയും ചേര്ന്ന് തിരുവാഭാരണം ഏറ്റുവാങ്ങി. അയ്യപ്പ വിഗ്രഹത്തില് തിരുവാഭരണം ചാര്ത്തി ദീപാരാധന നടത്തി. ആറരയോടെ ശ്രീകോവിലിന്റെ നടതുറന്നു.
ഇതോടെ മകരജ്യോതിക്കായുള്ള കാത്തിരിപ്പിലായിരുന്നു സന്നിധാനം. മകരവിളക്ക് ദൃശ്യമാകുന്ന എല്ലായിടങ്ങളിലും ഭക്തര് തമ്പടിച്ചിരുന്നു. തിരക്ക് മുന്കൂട്ടി കണ്ട് സുരക്ഷ മുന്നിര്ത്തിയുള്ള പ്രവര്ത്തനമാണ് അധികൃതര് നടത്തിയിരുന്നത്. എല്ലാ വ്യൂ പോയിന്റുകളിലും അയ്യപ്പന്മാര് നിന്നിരുന്ന സ്ഥലത്ത് കനത്ത സുരക്ഷ ഏര്പ്പെടുത്തി. തുടര്ന്ന് ഭക്തര്ക്ക് സുഖമായി മകരജ്യോതി ദര്ശിക്കാനായി.
Discussion about this post