തിരുവനന്തപുരം : കേന്ദ്ര ബഡ്ജറ്റില് കേരളത്തോട് കടുത്ത അവഗണനയാണ് കാണിച്ചതെന്ന് ധനമന്ത്രി കെ.എന്.ബാലഗോപാല് പറഞ്ഞു. റെയില്വേ പദ്ധതികളില്ല, എയിംസ് പ്രഖ്യാപിച്ചില്ല. തൊഴിലുറപ്പ് പദ്ധതിയുടെ തുക ബഡ്ജറ്റില് വെട്ടിച്ചുരുക്കി. ഭക്ഷ്യസുരക്ഷ ഉറപ്പാക്കാനുള്ള തുക കഴിഞ്ഞ ബഡ്ജറ്റില് 2.14 ലക്ഷം കോടിയായിരുന്നത് ഈ ബഡ്ജ്റില് 1.57 ലക്ഷം കോടിയായി കുറഞ്ഞു. ധാന്യങ്ങള് കര്ഷകരില് നിന്ന് സംഭരിക്കുന്നതിന് പ്രതിഫലമായി നല്കുന്ന തുകയും കുറഞ്ഞു. പ്രഖ്യാപനങ്ങള് താഴേതട്ടില് ഗുണം ചെയ്യില്ലെന്നും ധനമന്ത്രി പറഞ്ഞു.
കേന്ദ്രപദ്ധതികള്ക്കുള്ള പണം ഇന്പുട്ട് അടിസ്ഥാനത്തില് നല്കിയിരുന്നത് റിസള്ട്ട് അടിസ്ഥാനത്തിലാക്കാനാണ് തീരുമാനം, കേന്ദ്രപദ്ധതികള് നടപ്പിലാക്കുന്നതിലെ ഗുണം ആരാണ് വിലയിരുത്തുന്നത് എന്നത് പ്രശ്നമാണെന്നും മന്ത്രി പറഞ്ഞു. കേന്ദ്രസര്ക്കാരിന്റെ പണം വീതം വയ്ക്കുന്നതിലും സംസ്ഥാനത്തോട് വലിയ അവഗണനയാണ് കാണിക്കുന്നത്. പല മേഖലകളിലും സംസ്ഥാനം വികസിച്ചതാണ് പണം കുറയ്ക്കാന് കാരണമായി പറയുന്നത്. കേരളത്തെക്കാള് ജനസംഖ്യ കുറഞ്ഞ സംസ്ഥാനങ്ങള്ക്ക് ഇവിടുത്തെക്കാള് കൂടുതല് ഫണ്ട് ലഭിക്കുന്നുണ്ട്. പദ്ധതികളുടെ ഗുണഫലം നോക്കി ഫണ്ടു തരുമെന്ന് പറയുന്നതിലൂടെ പുതിയ നിയന്ത്രണം കൊണ്ടുവരുന്നു എന്നാണ് കരുതേണ്ടത്. പഞ്ചായത്ത് തലത്തിലടക്കം സഹകരണ മേഖലയിലേക്ക് കേന്ദ്രം കടന്നു കയറുന്നു. സഹകരണ മേഖലയെ കേന്ദ്രം ലക്ഷ്യമിടുന്നു. ദൂര വ്യാപകമായ ഫലങ്ങള് ഉണ്ടാക്കുന്നതാണ് ബഡ്ജറ്റിലെ ഫലപ്രഖ്യാപനങ്ങളെന്നും ധനമന്ത്രി കൂട്ടിച്ചേര്ത്തു.
Discussion about this post