ബംഗളൂരു: തിരുവനന്തപുരത്തെ സ്വകാര്യ ആശുപത്രിയില്‍ ചികിത്സയില്‍ കഴിയുന്ന മുന്‍ മുഖ്യമന്ത്രി ഉമ്മന്‍ ചാണ്ടിയെ ഉടന്‍ ബംഗളൂരുവിലേക്ക് മാറ്റില്ല. അദ്ദേഹത്തിന്റെ ന്യൂമോണിയ ബാധ പൂര്‍ണമായും ഭേദമായിട്ടില്ലെന്നും ആരോഗ്യസ്ഥിതി യാത്ര ചെയ്യാന്‍ പറ്റാവുന്ന വിധത്തിലായിട്ടില്ലെന്നും ഡോക്ടര്‍മാര്‍ വിലയിരുത്തി. ഇതോടെയാണ് ഉടന്‍ ബംഗളൂരുവിലേക്ക് മാറ്റേണ്ടെന്ന തീരുമാനമെടുത്തത്.
ഉമ്മന്‍ ചാണ്ടിയുടെ ചികിത്സയ്ക്കായി സര്‍ക്കാര്‍ ആറ് അംഗ മെഡിക്കല്‍ ബോര്‍ഡ് രൂപീകരിച്ചിട്ടുണ്ട്. തുടര്‍ ചികിത്സകളും ബംഗളൂരുവിലേക്ക് മാറ്റുന്ന സമയവും മെഡിക്കല്‍ ബോര്‍ഡാകും തീരുമാനിക്കുക. ആരോഗ്യനില മെച്ചപ്പെട്ടാല്‍ മാത്രമേ എയര്‍ ആംബുലന്‍സ് വഴി ബംഗളൂരുവിലേക്ക് കൊണ്ടുപോകേണ്ടതുള്ളു എന്നാണ് മെഡിക്കല്‍ ബോര്‍ഡിന്റെ തിരുമാനം.
അതേസമയം അദ്ദേഹത്തിന്റെ ആരോഗ്യനിലയില്‍ പുരോഗതിയുണ്ടെന്നാണ് നിംസ് ആശുപത്രിയിലെ ഡോക്ടര്‍മാരുടെ വിലയിരുത്തല്‍. ഒന്‍പത് അംഗ ഡോക്ടര്‍മാരുടെ സംഘമാണ് അദ്ദേഹത്തെ ചികിത്സിക്കുന്നത്. മരുന്നുകളോട് നന്നായി പ്രതികരിക്കുന്നുണ്ട്. ചികിത്സിക്കുന്ന ഡോക്ടര്‍മാരോടും ബന്ധുക്കളോടും സംസാരിച്ചുവെന്നും സന്ദര്‍ശിക്കുന്ന നേതാക്കളെ തിരിച്ചറിയുന്നുണ്ടെന്നും ആശുപത്രി അധികൃതര്‍ അറിയിച്ചു.
ഉമ്മന്‍ ചാണ്ടി സന്തോഷവാനായിരിക്കുന്നുവെന്നും ആശങ്കപ്പെടേണ്ട സാഹചര്യമില്ലെന്നും അദ്ദേഹത്തെ സന്ദര്‍ശിച്ച് മടങ്ങിയ തിരുവഞ്ചൂര്‍ രാധാകൃഷ്ണന്‍ മാധ്യമങ്ങളോട് പറഞ്ഞു. നിരവധി നേതാക്കള്‍ അദ്ദേഹത്തിന്റെ രോഗവിവരങ്ങള്‍ അറിയാന്‍ ആശുപത്രിയില്‍ സന്ദര്‍ശിക്കുന്നുണ്ട്.
Discussion about this post