കൊച്ചി: ചലച്ചിത്ര പ്രവര്ത്തകരുടെ വീടുകളില് ആദായ നികുതി വകുപ്പ് നടത്തിയ റെയ്ഡില് പിടിച്ചെടുത്ത രേഖകളുടെ പരിശോധന തുടങ്ങി. കേന്ദ്ര ധനകാര്യമന്ത്രാലയത്തിന്റെ പ്രത്യേക നിര്ദേശപ്രകാരമായിരുന്നു പരിശോധന. കേരളത്തിലെ സിനിമാ നിര്മാണ മേഖലയില് വിദേശനിക്ഷേപം കൂടുതലാണെന്ന് ഇന്റലിജന്സ് വിവരം ലഭിച്ചിരുന്നു.
മലയാളചലച്ചിത്ര പ്രവര്ത്തകരുടെ യഥാര്ത്ഥ വരുമാനവും നികുതിയടവും തമ്മില് പൊരുത്തപ്പെടുന്നുണ്ടോയെന്നും സിനിമാനിര്മാണ മേഖലയില് കളളപ്പണം വിനിയോഗിക്കപ്പെടുന്നുണ്ടോയെന്നും കണ്ടെത്തുന്നതിന്റെ ഭാഗമായിരുന്നു റെയ്ഡ്. വീടുകളിലും സ്ഥാപനങ്ങളിലുമായി കഴിഞ്ഞ ദിവസങ്ങളില് ആദായ നികുതി വകുപ്പ് പരിശോധന നടത്തിയിരുന്നു. അതേസമയം, പരിശോധനയില് കള്ളപ്പണം പിടിച്ചെടുത്തോയെന്ന വിവരം ഐ ടി ഉദ്യോഗസ്ഥര് സ്ഥിരീകരിച്ചിട്ടില്ല.
കഴിഞ്ഞദിവസം ആദായ നികുതി വകുപ്പ് നടന് മോഹന്ലാലിന്റെ മൊഴിയെടുത്തിരുന്നു. രണ്ട് മാസം മുന്പ് നടത്തിയ റെയ്ഡിന്റെ ഭാഗമായിട്ടായിരുന്നു ഇത്. കുണ്ടന്നൂരിലെ ഫ്ളാറ്റിലെത്തിയാണ് ഉദ്യോഗസ്ഥര് മൊഴിയെടുത്തത്. ചില സാമ്പത്തിക കാര്യങ്ങളില് മോഹന്ലാലില് നിന്ന് വ്യക്തത തേടിയെന്ന് ഐ ടി വൃത്തങ്ങള് അറിയിച്ചു.
വിദേശത്തെ സ്വത്ത് വകകളുടെയും സാമ്പത്തിക ഇടപാടുകളുടെയും വിശദാംശങ്ങള് മോഹന്ലാലിനോട് തേടിയെന്നാണ് വിവരം. ആന്റണി പെരുമ്പാവൂരിന്റെ മൊഴി നേരത്തെ രേഖപ്പെടുത്തിയിരുന്നു. ഇതില് മോഹന്ലാലുമായി ബന്ധപ്പെട്ട സാമ്പത്തിക ഇടപാടുകള് കൂടി ഉണ്ടായിരുന്നു. ഇക്കാര്യത്തിലും മോഹന്ലാലില് നിന്ന് വിശദീകരണം തേടിയിട്ടുണ്ട്. മൊഴിയെടുക്കല് നാലരമണിക്കൂര് നീണ്ടുവെന്നാണ് റിപ്പോര്ട്ട്.
