തിരുവനന്തപുരം: പ്രതിഷേധങ്ങള്ക്ക് നേരെയുള്ള പൊലീസ് അതിക്രമത്തിനെതിരെ കോണ്ഗ്രസ് പ്രഖ്യാപിച്ച ഡിജിപി ഓഫീസിലേക്കുള്ള മാര്ച്ചില് സംഘര്ഷം. മാര്ച്ചിനിടെ നവകേരള സദസിന്റെ ബാനറുകള് കോണ്ഗ്രസ് പ്രവര്ത്തകര് വ്യാപകമായി നശിപ്പിച്ചു. പൊലീസിന് നേരെ കല്ലെറുമുണ്ടായി. പ്രവര്ത്തകര് അക്രമാസക്തരായതോടെ പിരിച്ചുവിടാന് പൊലീസ് ജലപീരങ്കിയും കണ്ണീര് വാതകവും പ്രയോഗിച്ചു. മാര്ച്ച് സംഘര്ഷത്തിലേക്ക് നീങ്ങിയതോടെ പ്രതിപക്ഷ നേതാവ് വി ഡി സതീശന് പ്രസംഗം പാതിവഴിയില് അവസാനിപ്പിച്ചു. ദേഹാസ്വാസ്ഥ്യം അനുഭവപ്പെട്ട കെ സുധാകരന് അടക്കമുള്ള നേതാക്കളെ ആശുപത്രിയിലേക്ക് മാറ്റി.
പ്രതിപക്ഷ നേതാവ് സംസാരിക്കുന്നതിനിടെയാണ് സംഘര്ഷമുണ്ടായത്. പൊലീസ് ജലപീരങ്കി പ്രയോഗിച്ചതോടെ സതീശന് പ്രസംഗം പാതിവഴിയില് അവസാനിപ്പിച്ചു. കെ സുധാകരനും എം എം ഹസ്സനും ഉള്പ്പെടെയുള്ള നേതാക്കളെ പ്രവര്ത്തകര് വാഹനത്തില് കയറ്റി സ്ഥലത്തുനിന്ന് മാറ്റി. യാതൊരു പ്രകോപനവുമില്ലാതെയാണ് പൊലീസ് നടപടിയെന്നാണ് നേതാക്കള് ആരോപിക്കുന്നത്.
Discussion about this post