കൊച്ചി: രണ്ട് ദിവസത്തെ കേരള സന്ദര്ശനത്തിനെത്തിയ പ്രധാനമന്ത്രി നരേന്ദ്ര മോദിയുടെ റോഡ് ഷോ ആരംഭിച്ചു. എം.ജി റോഡില് കെപിസിസി ജംഗ്ഷനില്നിന്നും ആരംഭിച്ച റോഡ് ഷോയില് പ്രധാനമന്ത്രിയോടൊപ്പം തുറന്ന വാഹനത്തില് ബിജെപി സംസ്ഥാന അദ്ധ്യക്ഷന് കെ.സുരേന്ദ്രനുമുണ്ട്. റോഡിനിരുവശവും തിങ്ങിക്കൂടിയ ജനങ്ങളെയും പാര്ട്ടി പ്രവര്ത്തകരെയും പ്രധാനമന്ത്രി അഭിവാദ്യം ചെയ്തു. മോദിയ്ക്ക് ജയ് വിളികളും പുഷ്പവൃഷ്ടിയുമായി വന് ജനാവലിയാണ് റോഡ് ഷോ നടക്കുന്നയിടത്തെത്തിയത്.
അല്പം മുന്പ് നെടുമ്പാശേരി വിമാനത്താവളത്തിലെത്തിയ പ്രധാനമന്ത്രി മോദിയെ മുഖ്യമന്ത്രി പിണറായി വിജയനും ഗവര്ണര് ആരിഫ് മുഹമ്മദ് ഖാനും ചേര്ന്നാണ് സ്വീകരിച്ചത്. എം.ജി റോഡില് കെപിസിസി ജംഗ്ഷന് മുതല് ഹോസ്പിറ്റല് റോഡ് കടന്ന് ഗസ്റ്റ് ഹൗസ് വരെ ഒന്നേകാല് കിലോമീറ്ററോളം ദൂരമാണ് ഇപ്പോള് പ്രധാനമന്ത്രിയുടെ റോഡ് ഷോ നടക്കുന്നത്. ശേഷം ഗസ്റ്റ് ഹൗസിലാണ് രാത്രി താമസം.നാളെ രാവിലെ 6.30ന് ഹെലികോപ്ടറില് ഗുരുവായൂരിലേക്ക് തിരിക്കും. ക്ഷേത്രദര്ശത്തിന് ശേഷം നടന് സുരേഷ് ഗോപിയുടെ മകളുടെ വിവാഹത്തില് പങ്കെടുക്കും. 10.10ന് തൃപ്രയാര് ശ്രീരാമക്ഷേത്രത്തില് ദര്ശനം നടത്തും. കൊച്ചിയില് മടങ്ങിയെത്തി കൊച്ചി കപ്പല്ശാലയിലെ ഡ്രൈഡോക്ക് ഉദ്ഘാടനം ചെയ്യും. മറൈന് ഡ്രൈവില് ബി.ജെ.പി. പ്രവര്ത്തകരുടെ യോഗത്തിലും പങ്കെടുത്ത ശേഷം ഹെലികോപ്ടറില് നെടുമ്പാശേരി വിമാനത്താവളത്തിലെത്തി ഡല്ഹിക്ക് മടങ്ങും.
