കൊച്ചി: ഹെയ്‌റോമാക്‌സ് മിസ് കേരള 2011 ആയി കൊച്ചി സ്വദേശിനിയായ എലിസബത്ത് താടിക്കാരനെ തെരഞ്ഞെടുത്തു. ശനിയാഴ്ച രാത്രി ലെ മെറിഡിയന്‍ കണ്‍വെന്‍ഷന്‍ സെന്ററില്‍ നടന്ന ഫൈനല്‍ മത്സരത്തിലാണ് എലിസബത്ത് സൗന്ദര്യകിരീടം ചൂടിയത്. വെണ്ണല താടിക്കാരന്‍ വീട്ടില്‍ ചാര്‍ളി താടിക്കാരന്റെയും റാണിയുടെയും മകളായ എലിസബത്ത് ബാംഗ്ലൂര്‍ എം.എസ്. രാമയ്യ കോളേജിലെ രണ്ടാം വര്‍ഷ ബി.ഡി.എസ്. വിദ്യാര്‍ത്ഥിനിയാണ്. കൊച്ചിക്കാരി തന്നെയായ ശ്രുതി നായര്‍ ആണ് ഫസ്റ്റ് റണ്ണര്‍ അപ്പ്. പുണെയില്‍ താമസിക്കുന്ന മലയാളിയായ മരിയ ജോണ്‍ സെക്കന്‍ഡ് റണ്ണര്‍ അപ്പുമായി.
പാര്‍ട്ടി വെയര്‍, ഗൗണ്‍, സാരി എന്നീ മൂന്ന് റൗണ്ടുകളിലായിട്ടായിരുന്നു ഫൈനല്‍ മത്സരം. സിനിമാ താരം പൂര്‍ണിമ ഇന്ദ്രജിത്ത്, അന്താരാഷ്ട്ര മേക്കപ്പ് ആര്‍ട്ടിസ്റ്റ് ഷാന്‍ മുസഫില്‍, ഫാഷന്‍ ഡിസൈനര്‍ അസ്പിത മാര്‍വ, 2010 ലെ ‘മിസ് ഇന്ത്യ’ നേഹ ഹിംഗെ, മോഡല്‍ അര്‍ഷിത ത്രിവേദി, ബോളിവുഡ് സംവിധായകന്‍ റോഷന്‍ അബ്ബാസ്, മലയാള സിനിമാ സംവിധായകന്‍ സിദ്ദിഖ് തുടങ്ങിയവരായിരുന്നു വിധികര്‍ത്താക്കള്‍. 20 പേരില്‍ നിന്ന് മികച്ച 10 പേരെ ആദ്യ റൗണ്ടുകളില്‍ തിരഞ്ഞെടുത്തു. തുടര്‍ന്ന്, മൂന്നാം റൗണ്ടില്‍ 5 പേരെയും. ഇവരില്‍ നിന്നാണ് ആദ്യ മൂന്ന് സ്ഥാനക്കാരെ കണ്ടെത്തിയത്.
അഴകളവിനൊപ്പം വസ്ത്രധാരണം, ആത്മവിശ്വാസം, ആശയവിനിമയ മികവ് തുടങ്ങിയവ കൂടി അടിസ്ഥാനമാക്കിയായിരുന്നു മത്സരം. മലയാളത്തിന്റെ സൗന്ദര്യറാണിയായി തിരഞ്ഞെടുക്കപ്പെട്ടതില്‍ സന്തോഷവും അതിലേറെ അഭിമാനവുമുള്ളതായി മിസ് കേരളയായി തിരഞ്ഞെടുക്കപ്പെട്ട എലിസബത്ത് താടിക്കാരന്‍ പറഞ്ഞു. പഠനത്തോടൊപ്പം മോഡലിങ് രംഗത്തും ശ്രദ്ധ കേന്ദ്രീകരിക്കണമെന്നാണ് എലിസബത്തിന്റെ ആഗ്രഹം.
Discussion about this post