ആലപ്പുഴ: ജല അതോറിറ്റിയില്‍ ആര്‍എസ്‌പി നേതാവിന്റെ നേതൃത്വത്തില്‍ കോഴവാങ്ങി താല്‍കാലിക നിയമനം. ആലപ്പുഴ, കൊല്ലം ജില്ലകളില്‍ പിഎസ്‌സി ലിസ്‌റ്റ്‌ നോക്കുകുത്തിയാക്കിയാണ്‌ അഴിമതി നിയമനം. 5000 രൂപ കൈക്കൂലി വാങ്ങിയ ആര്‍എസ്‌പി സംസ്‌ഥാനകമ്മിറ്റി അംഗം, കണ്ണന്‍ നായര്‍ എന്നയാള്‍ക്ക്‌ പമ്പ്‌ ഓപ്പറേറ്ററായി ജോലി ശരിയാക്കിക്കൊടുത്തു.
ആലപ്പുഴ ടൗണിലെ പാട്ടുകുളം പമ്പ്‌ ഹൗസില്‍ ഇത്തരത്തില്‍ താല്‍ക്കാലിക നിയമനം കിട്ടുമെന്ന സൂചനയിലാണ്‌ ജോലിക്കായി ശ്രമിച്ചത്‌. 200 രൂപ ദിവസക്കൂലിയ്‌ക്ക്‌ ആറു മാസത്തേയ്‌ക്കാണ്‌ ജോലി. വേണ്ട സമയത്ത്‌ മോട്ടോര്‍ ഓണ്‍ ചെയ്യുകയും ഓഫ്‌ ചെയ്യുകയും വേണം, ക്ലോറിന്‍ കലക്കണം. ഇതാണ്‌ ചെയ്യേണ്ട ജോലി. നിയമനത്തിനായി സമീപിക്കേണ്ട ഇടനിലക്കാര്‍ വഴി പോയ കണ്ണന്‍ നായര്‍ എത്തിച്ചേര്‍ന്നത്‌ ആര്‍എസ്‌പി സംസ്‌ഥാനകമ്മിറ്റി അംഗവും യുടിയുസി ആലപ്പുഴ ജില്ലാസെക്രട്ടറിയുമായ ചന്ദ്രന്റെ വീട്ടില്‍.
പമ്പ്‌്‌ ഹൗസുകളില്‍ ഒഴിവില്ലെന്ന്‌ നേതാവ് ആദ്യമേ ബലം പിടിച്ചു. അത്യാവശ്യമാണെന്നു പറഞ്ഞപ്പോള്‍ സ്വരം മാറി. നേതാവിന്റെ നിര്‍ദ്ദേശമനുസരിച്ച്‌ ആലപ്പുഴ നഗരത്തില്‍ പ്രവര്‍ത്തിക്കുന്ന ജലഅതോറിറ്റി ഓഫീസിലെത്തി. ഒരു ഉദ്യോഗസ്‌ഥയെ കണ്ടു. കാര്യങ്ങളൊക്കെ നേതാവ് പറഞ്ഞിട്ടുണ്ടെന്നും ഉടന്‍ ജോലി തരപ്പെടുമെന്നും ഈ ഉദ്യോഗസ്‌ഥ ഉറപ്പു നല്‍കി. ജോലി ഉറപ്പായപ്പോള്‍ വീണ്ടും നേതാവിന്റെ വീട്ടിലെത്തി. കൈക്കൂലിയുടെ ആദ്യഗഡുവായ 1,500 രൂപയും നല്‍കി. ബാക്കി തുക ജോലിയ്‌ക്ക്‌ കയറിയശേഷം നല്‍കിയാല്‍ മതിയെന്ന്‌ നേതാവ് പറഞ്ഞു. ഈ വിവരം രഹസ്യമാക്കിവയ്‌ക്കണമെന്നും ഉപദേശിച്ചു. പണം കൊടുത്ത്‌ രണ്ടാംദിവസം ജോലി കിട്ടി.
പമ്പ്‌ ഓപ്പറേറ്റര്‍മാരുടെ 1379 ഒഴിവുകള്‍ നികത്താനുള്ള പിഎസ്‌സി ലിസ്‌റ്റ്‌ നിലനില്‍ക്കെയാണ്‌ ജല അതോറിറ്റിയില്‍ കൈക്കൂലി നിയമനം തുടരുന്നത്‌. കൈക്കൂലി വാങ്ങി താല്‍ക്കാലിക ജീവനക്കാരെ കുത്തിനിറയ്‌ക്കുന്നതു കൊണ്ട്‌ അര്‍ഹതപ്പെട്ടവര്‍ക്ക്‌ കിട്ടേണ്ട നിയമനം നീളുകയാണ്‌. 300 ട്രീറ്റ്‌മെന്റ്‌ പ്ലാന്റുകള്‍ക്കും 2250 പമ്പ്‌ ഹൗസുകള്‍ക്കുമായി 6000ത്തോളം പമ്പ്‌ ഓപ്പറേറ്റര്‍മാരുടെ തസ്‌തികകളാണ്‌ ജല അതോറിറ്റിയിലുള്ളത്‌. നിലവില്‍ 1379 തസ്‌തികകളിലെ ഒഴിവുകള്‍ ജല അതോറിറ്റി തന്നെ റിപ്പോര്‍ട്ട്‌ ചെയ്‌തിട്ടുണ്ട്‌.
2009 നവംബറില്‍ നിലവില്‍ വന്ന റാങ്ക്‌ ലിസ്‌റ്റില്‍ നിന്ന്‌ 631 പേരെ നിയമിച്ചു. ഇതില്‍ 122 പേര്‍ ജോലി സ്വീകരിച്ചില്ല. അതായത്‌ ഇപ്പോള്‍ ജല അതോറിറ്റിയില്‍ 870 പമ്പ്‌ ഓപ്പറേറ്റര്‍മാരുടെ ഒഴിവുകളുണ്ടെന്ന്‌ വ്യക്‌തം. ഈ ഒഴിവുകള്‍ റാങ്ക്‌ ലിസ്‌റ്റില്‍ നിന്ന്‌ നികത്തേണ്ടതാണ്‌. എന്നാല്‍ അതുണ്ടായില്ല. പകരം കൊല്ലം ആലപ്പുഴ ജില്ലകളില്‍ നേതാക്കള്‍ കൈക്കൂലി വാങ്ങി നല്‍കുന്ന ശുപാര്‍ശയ്‌ക്കനുസരിച്ച്‌ ജല അതോറിറ്റി ഉദ്യോഗസ്‌ഥര്‍ താല്‍ക്കാലിക നിയമനം തുടരുകയാണ്‌. അര്‍ഹതപ്പെട്ട തൊഴിലില്ലാത്തവരാണ്‌ ഈ അഴിമതിയില്‍ ബലിയാടാകുന്നത്‌.
ജല അതോറിറ്റിയില്‍ കോഴവാങ്ങി നിയമനം
പുതിയ വാർത്തകൾ
Discussion about this post