ഇരിട്ടി: പച്ചക്കറിയെന്ന് തെറ്റിദ്ധരിപ്പിച്ചു കടത്തിയ സ്ഫോടക വസ്തുശേഖരം ചെക്ക്പോസ്റ്റില് പിടിച്ചെടുത്തു. സംഭവവുമായി ബന്ധപ്പെട്ട് രണ്ടുപേര് അറസ്റ്റിലായി. കര്ണാടകയില് നിന്നും സംസ്ഥാനത്തേക്കു കടത്തുന്നതിനിടെയാണ് കീഴല്ലൂര് സ്വദേശികളായ ടി. രഞ്ജിത്ത് (30), സിലു (26) എന്നിവര് പിടിയിലായത്. കിളിയന്തറ എക്സൈസ് ചെക്ക് പോസ്റ്റിലെ വാഹന പരിശോധനയ്ക്കിടെയാണ് ഇരുവരും പിടിയിലാകുന്നത്. ഇവരില്നിന്നും 300 കിലോ വെടിയുപ്പ് (അമോണിയം നൈട്രേറ്റ്), 10 ചാക്ക് ഡിറ്റണറേറ്റര്, 16 തിരി എന്നിവ പിടികൂടി. കര്ണാടകയില് നിന്നും കേരളത്തിലേക്കുള്ള പച്ചക്കറിയെന്ന വ്യാജേനയാണ് ഇവ കടത്താന് ശ്രമം നടത്തിയത്.
മിനി ലോറിയില് അമോണിയം നൈട്രേറ്റ് ഉള്പ്പെടെയുള്ളവ നിരത്തിയ ശേഷം അവയ്ക്കു മുകളില് പച്ചക്കറികള് വെയ്ക്കുകയായിരുന്നു. കിളിയന്തറ ചെക്ക് പോസ്റ്റ് വഴി സ്ഫോടക നിര്മാണ സാമഗ്രികള് കടത്തുന്നുണ്ടെന്ന രഹസ്യവിവരത്തെ തുടര്ന്ന് എക്സൈസ് ഇന്സ്പെക്ടര് ഇ.കെ. റെജിയുടെ നേതൃത്വത്തില് ഇന്നുപുലര്ച്ചെ 5.30 ഓടെ നടത്തിയ വാഹന പരിശോധനയിലാണ് ഇരുവരും കുടുങ്ങിയത്. പ്രതികളെയും പിടിച്ചെടുത്ത സാധനങ്ങളും മിനി ലോറിയും എക്സൈസ് അധികൃതര് ഇരിട്ടി പോലീസിനു കൈമാറി. ഇവരെ പോലീസ് ചോദ്യം ചെയ്തുവരികയാണ്.
