തിരുവനന്തപുരം: സംസ്ഥാനവ്യാപകമായി നടപ്പിലാക്കിവരുന്ന ഊര്ജ്ജിത പകര്ച്ചവ്യാധി നിയന്ത്രണ പരിപാടിയില് വമ്പിച്ച ജനപങ്കാളിത്തം ആവശ്യമാണെന്ന് ആഭ്യന്തരമന്ത്രി രമേശ് ചെന്നിത്തല. മഴക്കാലരോഗപ്രതിരോധത്തിനായുള്ള ശുചീകരണപ്രവര്ത്തനങ്ങളുടെ ഉത്തരവാദിത്തം എല്ലാ തദ്ദേശഭരണ സ്ഥാപനങ്ങളും ഏറ്റെടുത്ത് പൂര്വ്വാധികം ഫലപ്രദമായി നിര്വ്വഹിക്കണമെന്നും അദ്ദേഹം പറഞ്ഞു. തൈക്കാട് സ്ത്രീകളുടെയും കുട്ടികളുടെയും ആശുപത്രിയില്, പൊതുസ്ഥലങ്ങള്, ഓഫീസുകള്, സ്ഥാപനങ്ങള് മുതലായവയുമായി ബന്ധപ്പെട്ട ശുചീകരണ പ്രവര്ത്തനങ്ങളുടെയും കൊതുകുനശീകരണ തീവ്രയജ്ഞ പരിപാടിയുടെയും സംസ്ഥാനതല ഉദ്ഘാടനം നിര്വ്വഹിക്കുകയായിരുന്നു രമേശ് ചെന്നിത്തല.
ആരോഗ്യവകുപ്പ്, തദ്ദേശസ്വയംഭരണ വകുപ്പ്, ദേശീയ ആരോഗ്യദൗത്യം എന്നിവയുടെ സംയുക്താഭിമുഖ്യത്തില് മൂന്നുമാസം നീണ്ടുനില്ക്കുന്ന കര്മ്മപദ്ധതിക്കാണ് ഇന്ന് തുടക്കം കുറിച്ചിട്ടുള്ളത്. കൊറോണ വൈറസ് രോഗബാധയെക്കുറിച്ച് ആശങ്കവേണ്ടെന്ന് ആരോഗ്യമന്ത്രി വി.എസ്. ശിവകുമാര് അധ്യക്ഷപ്രസംഗത്തില് പറഞ്ഞു. രോഗ നിര്ണ്ണയത്തിനും ചികിത്സയ്ക്കുമുള്ള സൗകര്യങ്ങള് സംസ്ഥാനത്തെ എല്ലാ പ്രധാന ആശുപത്രികളിലും ഏര്പ്പെടുത്തിയിട്ടുണ്ട്. മഴക്കാലരോഗ ചികിത്സയ്ക്കായുള്ള മരുന്നുകള് എല്ലാ ആശുപത്രികളിലും ആവശ്യാനുസരണം ലഭ്യമാക്കുവാന് ജില്ലാ മെഡിക്കല് ഓഫീസര്മാര്ക്ക് നിര്ദ്ദേശം നല്കിയിട്ടുണ്ട്. എല്ലാ എയ്ഡഡ്, അണ്എയ്ഡഡ് സ്കൂളുകളിലും എല്ലാ ബുധനാഴ്ചകളിലും ആരോഗ്യ അസംബ്ലികള് സംഘടിപ്പിച്ച് പകര്ച്ചവ്യാധി ബോധവത്ക്കരണവും പ്രതിരോധ-നിയന്ത്രണ പ്രവര്ത്തനങ്ങളും ഊര്ജ്ജിതപ്പെടുത്തും.
ജലജന്യരോഗങ്ങള് തടയുന്നതിനായുള്ള ജലസ്രോതസ്സുകളുടെ വ്യാപകമായ ശുചീകരണം മേയ് 22 മുതല് സംസ്ഥാനത്ത് സംഘടിപ്പിക്കും.
Discussion about this post