ന്യൂഡല്ഹി: പ്രധാനമന്ത്രി നരേന്ദ്ര മോഡിയും പാക് പ്രധാനമന്ത്രി നവാസ് ഷെരീഫുമായി നടന്ന കൂടിക്കാഴ്ചയില് ഭീകരവാദം ചര്ച്ചാ വിഷയമായി. ഡല്ഹിയിലെ ഹൈദരാബാദ് ഹൗസിലായിരുന്നു കൂടിക്കാഴ്ച നടന്നത്. ഏതാണ്ട് ഒരു മണിക്കൂര് നീണ്ട കൂടിക്കാഴ്ചയില്, അതിര്ത്തി കടന്നുള്ള ഭീകരവാദം തടയാന് പാക്കിസ്ഥാന്റെ ഭാഗത്തുനിന്നു ശക്തമായ നടപടി വേണമെന്ന് മോഡി ആവശ്യപ്പെട്ടു. മുംബൈ ഭീകരാക്രമണക്കേസിലെ കുറ്റക്കാര്ക്കെതിരേ ഉടന് നടപടി വേണമെന്നും പ്രധാനമന്ത്രി പറഞ്ഞു. വിദേശകാര്യമന്ത്രി സുഷമ സ്വരാജും മോഡിക്കൊപ്പം ചര്ച്ചയില് പങ്കെടുത്തു. പ്രധാനമായും അഞ്ചുകാര്യങ്ങളാണ് കൂടിക്കാഴ്ചയില് നരേന്ദ്ര മോഡി മുന്നോട്ടു വച്ചത്. 2008-ലെ മുംബൈ ഭീകരാക്രമണ കേസിലെ പ്രതികളുടെ പാക്കിസ്ഥാനിലെ വിചാരണ മന്ദഗതിയിലാണ് നടക്കുന്നത്. ഈ കേസില് കുറ്റക്കാര്ക്കെതിരേ ഇതുവരെ നടപടി സ്വീകരിച്ചിട്ടില്ലെന്നും മോഡി വ്യക്തമാക്കി. അഫ്ഗാനിസ്ഥാനിലെ ഹെറാത്തില് ഇന്ത്യന് കോണ്സുലേറ്റിനു നേരെയുണ്ടായ ആക്രമണവും ചര്ച്ചയില് ഉയര്ന്നുവന്നു. പാക് ഭീകരവാദസംഘടനയായ ലഷ്കര്-ഇ തോയിബയാണ് ആക്രമണത്തിനു പിന്നിലെന്ന് അഫ്ഗാന് പ്രസിഡന്റ് ഹമീദ് കര്സായി കുറ്റപ്പെടുത്തിയിരുന്നു. ഇരുരാജ്യങ്ങളും തമ്മിലുള്ള വാണിജ്യബന്ധം ശക്തിപ്പെടുത്തേണ്ടതിന്റെ ആവശ്യകതയും ഇരുനേതാക്കളും ചര്ച്ച ചെയ്തു. രാഷ്ട്രപതി പ്രണബ് മുഖര്ജിയുമായി കൂടിക്കാഴ്ച നടത്തിയ നവാസ് ഷെരീഫ് മുന് പ്രധാനമന്ത്രി അടല് ബിഹാരി വാജ്പേയിയെ അദ്ദേഹം സന്ദര്ശിച്ചു. സ്ഥാനമൊഴിഞ്ഞ മുന് പ്രധാനമന്ത്രി മന്മോഹന് സിംഗിനെയും ഷെരീഫ് കാണും. ശ്രീലങ്കന് പ്രസിഡന്റ് മഹീന്ദ രാജപക്സെ, അഫ്ഗാന് പ്രസിഡന്റ് ഹമീദ് കര്സായി, മൗറീഷ്യസ് പ്രധാനമന്ത്രി നവീന് രാംഗുലം, എന്നിവരുമായും മോഡി നേരത്തെ കൂടിക്കാഴ്ച നടത്തിയിരുന്നു. അതേസമയം പ്രധാനമന്ത്രി നരേന്ദ്ര മോഡിയുമായി ക്രിയാത്മകചര്ച്ച നടന്നുവെന്ന് പാക് പ്രധാനമന്ത്രി നവാസ് ഷെരീഫ് വ്യക്തമാക്കി. ഡല്ഹിയിലെ ഹൈദരാബാദ് ഭവനില് നടന്ന കൂടിക്കാഴ്ചയ്ക്കു ശേഷം മാധ്യമങ്ങളോടു പ്രതികരിക്കുകയായിരുന്നു അദ്ദേഹം. ആരോപണപ്രത്യാരോപണങ്ങള് ഒരു രാജ്യത്തിനും യോജിച്ചതല്ല. ഇരുരാജ്യങ്ങള്ക്കും ഇതു ചരിത്രമുഹൂര്ത്തമാണിതെന്നും നവാസ് ഷെരീഫ് പറഞ്ഞു. 1999-ലെ ലാഹോര് പ്രഖ്യാപനത്തിന്റെ തുടര്ച്ചയാണ് ഉണ്ടാകേണ്ടതെന്നും നവാസ് ഷെരീഫ് പറഞ്ഞു. സമാധാനത്തിനും വികസനത്തിനുമായി കൂട്ടായ പ്രവര്ത്തനത്തിന് ധാരണയായതായും അദ്ദേഹം അറിയിച്ചു. ഇരുരാജ്യങ്ങളുടെയും വിദേശകാര്യസെക്രട്ടറിമാര് ചര്ച്ചയുമായി മുന്നോട്ടുപോകും.
Discussion about this post