തിരുവനന്തപുരം: തിരുവനന്തപുരം ജനറല്‍ ആശുപത്രിയുടെ ഒമ്പതാം വാര്‍ഡില്‍ പ്രവേശിപ്പിക്കപ്പെടുന്ന മാനസിക രോഗികളെ, 24 മണിക്കൂറിനകം പേരൂര്‍ക്കട മാനസികാരോഗ്യകേന്ദ്രത്തിലേക്ക് മാറ്റുമെന്ന് ആരോഗ്യമന്ത്രി വി.എസ്. ശിവകുമാര്‍ അറിയിച്ചു. ഒമ്പതാം വാര്‍ഡിലുണ്ടായ അനിഷ്ട സംഭവത്തെത്തുടര്‍ന്ന്, കെ. മുരളീധരന്‍ എംഎല്‍എയുടെ സാന്നിധ്യത്തില്‍, മന്ത്രിയുടെ ചേംബറില്‍ വിളിച്ചുകൂട്ടിയ ഉന്നതതലയോഗത്തിലാണ് അദ്ദേഹം ഇക്കാര്യം അറിയിച്ചത്.
എട്ട് സ്ത്രീകളും പതിമൂന്ന് പുരുഷന്മാരും ഉള്‍പ്പെടെ 21 മാനസിക രോഗികളാണ് ഇപ്പോള്‍ ഒമ്പതാം വാര്‍ഡിലുള്ളത്. ഇവരെ മാനസികാരോഗ്യ കേന്ദ്രത്തിലേക്ക് മാറ്റുന്നതിനുവേണ്ടി, സൈക്യാട്രിസ്റ്റിന്റെ സര്‍ട്ടിഫിക്കറ്റോടെ, വഞ്ചിയൂര്‍ ചീഫ് ജുഡീഷ്യല്‍ മജിസ്‌ട്രേറ്റിനും, സിറ്റി പോലീസ് കമ്മീഷണര്‍ക്കും, കന്റോണ്‍മെന്റ് സര്‍ക്കിള്‍ ഇന്‍സ്‌പെക്ടര്‍ക്കും അറിയിപ്പ് നല്‍കിക്കഴിഞ്ഞു; ഉടന്‍ മാറ്റും. ഇനി മുതല്‍, ഒമ്പതാം വാര്‍ഡില്‍ പ്രവേശിപ്പിക്കപ്പെടുന്ന മാനസികരോഗികളെ, നിരീക്ഷണത്തിനും രോഗനിര്‍ണ്ണയത്തിനുംശേഷം സൈക്യാട്രിസ്റ്റിന്റെ സര്‍ട്ടിഫിക്കറ്റോടെ, 24 മണിക്കൂറിനകം മജിസ്‌ട്രേറ്റിനുമുമ്പാകെ ഹാജരാക്കി മാനസികാരോഗ്യ കേന്ദ്രത്തിലേക്ക് മാറ്റും. മാനസികരോഗികള്‍ തമ്മില്‍, സംഘര്‍ഷവും മറ്റ് അനിഷ്ട സംഭവങ്ങളും ആവര്‍ത്തിക്കുന്ന സാഹചര്യം ഒഴിവാക്കാനാണ് ഇത്.
പോലീസാണ്, ഒമ്പതാം വാര്‍ഡിലേക്ക് രോഗികളെ എത്തിക്കാറുള്ളത്. തിങ്കളാഴ്ചയിലെ കണക്ക്പ്രകാരം 63 പുരുഷന്മാരും 31 സ്ത്രീകളും ഉള്‍പ്പെടെ, 94 പേര്‍ ഈ വാര്‍ഡിലുണ്ട്. 44 ആണ് ബെഡ് സ്‌ട്രെങ്ത്ത്. അസുഖം പൂര്‍ണ്ണമായും മാറിയ 15 സ്ത്രീകളും 5 പുരുഷന്മാരും ഉള്‍പ്പെടെ 20 പേര്‍ ഈ വാര്‍ഡിലുണ്ട്. ഇവര്‍ക്ക് ഉടന്‍ പുനരധിവാസ സൗകര്യം ലഭ്യമാക്കണമെന്ന് സാമൂഹ്യനീതി വകുപ്പിനെ അറിയിച്ചിട്ടുണ്ട്. സുഖംപ്രാപിക്കുന്ന രോഗികളെ, അതത് സമയങ്ങളില്‍ പുനരധിവസിപ്പിക്കുന്ന കാര്യത്തില്‍ തീരുമാനമെടുക്കുവാന്‍ സാമൂഹ്യനീതി വകുപ്പ് മന്ത്രിയുടെ സാന്നിധ്യത്തില്‍, ബന്ധപ്പെട്ട സംഘടനകളുടെയും സ്ഥാപനങ്ങളുടെയും യോഗം വിളിക്കുമെന്ന് ആരോഗ്യമന്ത്രി അറിയിച്ചു. ഒമ്പതാം വാര്‍ഡ് മോണിറ്ററിംഗ് കമ്മിറ്റി മീറ്റിംഗ് ജൂലൈ 3 ന് രാവിലെ 11 മണിക്ക് ജനറല്‍ ആശുപത്രിയുടെ ടെലി മെഡിസിന്‍ ഹാളില്‍ നടക്കുമെന്നും യോഗത്തില്‍ അറിയിച്ചു. ആരോഗ്യവകുപ്പ് സെക്രട്ടറി ഡോ. കെ. ഇളങ്കോവന്‍, എഡിജിപി: പത്മകുമാര്‍, ഐജി: മനോജ് എബ്രഹാം, ലോ സെക്രട്ടറി: പ്രേമരാജ രാജേന്ദ്രപ്രസാദ്, ആരോഗ്യവകുപ്പ് സെക്രട്ടറി ഡോ. പി.കെ. ജമീല, ഡിഎംഒ: ഡോ. കെ.എം. സിറാബുദ്ദീന്‍, ഡിപിഎം: ഡോ. ബി. ഉണ്ണികൃഷ്ണന്‍, ജനറല്‍ ആശുപത്രി സൂപ്രണ്ട് ഡോ. ഫസീലത്ത് ബീവി, ഡെപ്യൂട്ടി സൂപ്രണ്ട് ഡോ. എം.പി. സിന്ധു, ആര്‍എംഒ: ഡോ. സ്റ്റാന്‍ലി, പേരൂര്‍ക്കട മെന്റല്‍ ഹെല്‍ത്ത് സെന്റര്‍ സുപ്രണ്ട് ഡോ. ഷീലാ ജോസഫ്, ഡോ. പി.എസ്. ഇന്ദു തുടങ്ങിയവര്‍ യോഗത്തില്‍ പങ്കെടുത്തു.
Discussion about this post