തിരുവനന്തപുരം: ലഹരി വിരുദ്ധ ആശയങ്ങള് പാഠ്യ പദ്ധതിയിലുള്പ്പെടുത്തുമെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല പറഞ്ഞു. മയക്കുമരുന്നിന് അടിമകളായ കുട്ടികളെ ആരോഗ്യ വകുപ്പിന്റെ സഹായത്തോടെ കൗണ്സിലിംഗിന് വിധേയരാക്കുമെന്നും അദ്ദേഹം കൂട്ടിച്ചേര്ത്തു.ക്ലീന് കാമ്പസ് സേഫ് കാമ്പസ് പദ്ധതി വിപുലമാക്കുന്നതിന്റെ ഭാഗമായി സെക്രട്ടേറിയറ്റ് ദര്ബാര് ഹാളില് വിളിച്ചു ചേര്ത്ത യുവജന സംഘടനാ നേതാക്കളുടെ യോഗത്തില് അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.
സമൂഹത്തില് ലഹരി വസ്തുക്കളും മയക്കുമരുന്നും വിപണനം നടത്തുന്ന ശൃംഖലകളെക്കുറിച്ചുളള വിവരങ്ങള് പോലീസിനെത്തിക്കാന് യുവജനസംഘടനകള് നേതൃത്വപരമായ പങ്ക് വഹിക്കണം. ലഹരി വിരുദ്ധ ബോധവത്കരണ പരിപാടികള് സംഘടിപ്പിക്കാനും യുവജനസംഘടനകള് പരിപാടി തയ്യാറാക്കണമെന്ന് അദ്ദേഹം പറഞ്ഞു. ക്ലീന് കാമ്പസ് സേഫ് കാമ്പസ് പദ്ധതിയുടെ ബ്രാന്ഡ് അംബാസഡറാകാന് മമ്മൂട്ടി സന്നദ്ധത അറിയിച്ചിട്ടുണ്ട്. വിദ്യാഭ്യാസ ആരോഗ്യ വകുപ്പുകളുടെ സഹകരണത്തോടെ നടപ്പാക്കുന്ന പദ്ധതി കൂടുതല് ഫലപ്രദമാക്കുന്നതിനെക്കുറിച്ചാലോചിക്കാന് വിദ്യാഭ്യാസ മന്ത്രി ഈ മാസം 21 ന് വിവിധ ഏജന്സികളുടെ യോഗം വിളിച്ചുചേര്ക്കും. യുവജന ക്ഷേമ ബോര്ഡിന്റെയും യുവജന കമ്മീഷന്റെയും നേതൃത്വത്തില് ആഗസ്റ്റ് അഞ്ചിന് എല്ലാ ജില്ലകളിലും ലഹരി വിരുദ്ധ സംഗമം സംഘടിപ്പിക്കുമെന്നും അദ്ദേഹംപറഞ്ഞു. സംസ്ഥാനത്ത് മയക്കു മരുന്ന് എത്തിച്ചു കൊടുക്കുന്ന കണ്ണികള് വളരെ ശക്തവും അന്താരാഷ്ട്ര ബന്ധമുളളതുമാണ്. മയക്കുമരുന്ന് കൈവശം വയ്ക്കുന്നതിലെ പരിധി സംബന്ധിച്ച് കേന്ദ്ര നാര്ക്കോട്ടിക് നിയമത്തിലെ വ്യവസ്ഥയില് ഭേദഗതി വരുത്താന് സംസ്ഥാനം ആവശ്യപ്പെടുമെന്നും അദ്ദേഹം വ്യക്തമാക്കി. സംസ്ഥാനത്തെ ലഹരി മയക്കുമരുന്ന് മുക്തമാക്കുന്നതിന് കലാസാംസ്കാരിക സന്നദ്ധസംഘടനകളുടെ കൂടി സഹകരണത്തോടെ അടുത്ത ഒരു വര്ഷക്കാലം കൂട്ടായ യത്നമുണ്ടകണം. സ്കൂള് തലത്തില് നിന്ന് മുകളിലേക്ക് രൂപീകരിച്ച കമ്മിറ്റികള്ക്ക് സമാന്തരമായി താലൂക്ക്, ജില്ലാതലങ്ങളില് യുവജന സാമൂഹിക സംഘടനകളുടെ നേതൃത്വത്തില് സമിതികള് രൂപീകരിക്കണമെന്നും അദ്ദേഹം ആവശ്യപ്പെട്ടു. 8547346600 എന്ന നമ്പരില് മയക്കുമരുന്ന് ലഹരി വിപണന സംഘങ്ങളെപ്പറ്റി പോലീസിന് വിവരം നല്കണമെന്നും അദ്ദേഹം പറഞ്ഞു.
യോഗത്തില് വിവിധ യുവജനസംഘടനകളുടെ നേതാക്കള് പദ്ധതി നടത്തിപ്പ് സംബന്ധിച്ച് അഭിപ്രായങ്ങളും നിര്ദ്ദേശങ്ങളുമവതരിപ്പിച്ചു. മന്ത്രി വി.എസ്.ശിവകുമാര് സംസ്ഥാന പോലീസ് ചീഫ് ബാലസുബ്രഹ്മണ്യം, പൊതുവിദ്യാഭ്യാസ വകുപ്പ് സെക്രട്ടറി ഷാജഹാന്, ഉന്നത പോലീസുദ്യോഗസ്ഥര് വിവിധ വകുപ്പ് മേധാവികള് തുടങ്ങിയവര് പങ്കെടുത്തു.
Discussion about this post