ചങ്ങനാശേരി: സംസ്ഥാന സര്‍ക്കാരിന്റെ മദ്യനിരോധനമെന്ന നയം പ്രായോഗികമല്ലെന്നും മദ്യവര്‍ജനമാണ് നടപ്പാക്കേണ്ടതെന്നും എന്‍.എസ്.എസ്. ജനറല്‍ സെക്രട്ടറി ജി. സുകുമാരന്‍നായര്‍ പറഞ്ഞു. ഇതിനുള്ള പ്രായോഗിക സമീപനമാണാവശ്യം. മദ്യനിരോധനത്തിന്റെ പേരില്‍ ഇപ്പോള്‍ നടക്കുന്നത്, കോണ്‍ഗ്രസ്സിലെ രണ്ടുവിഭാഗങ്ങള്‍ തമ്മില്‍ പ്രതിച്ഛായ വര്‍ധിപ്പിക്കുന്നതിനുള്ള മത്സരം മാത്രമാണ്. ഈ നയം യാതൊരുവിധത്തിലും മദ്യവര്‍ജനത്തിന് പ്രയോജനം ചെയ്യില്ല.കോണ്‍ഗ്രസ്സിലെ രണ്ടുവിഭാഗങ്ങള്‍ തമ്മിലുള്ള മത്സരത്തില്‍ മുഖ്യമന്ത്രി കീഴടങ്ങുകയാണ് ചെയ്തത്.
ഘടകകക്ഷികളും ഇതിന് കൂട്ടുനില്‍ക്കുകയാണ് ചെയ്തത്. നേതാക്കള്‍ ആദര്‍ശമുണ്ടെന്ന് കാണിക്കാന്‍ ശ്രമിക്കുന്നു. മദ്യവര്‍ജനം എന്ന ആശയം നടപ്പാക്കുന്നതിന് ആത്മാര്‍ത്ഥതയോ ദീര്‍ഘവീക്ഷണമോ ഇല്ല.സര്‍ക്കാരിന്റെ ഇപ്പോഴത്തെ തീരുമാനം ദൂരവ്യാപകമായ ഭവിഷ്യത്തുകള്‍ക്ക് കാരണമാകുമെന്നും എന്‍.എസ്.എസ്. ജനറല്‍ സെക്രട്ടറി പെരുന്നയില്‍ മാധ്യമപ്രവര്‍ത്തകരോട് പറഞ്ഞു.
