തിരുവനന്തപുരം: തിരുവനന്തപുരം മെഡിക്കല് കോളേജില്, കരള് മാറ്റിവയ്ക്കല് ശസ്ത്രക്രിയാ വിഭാഗം ഈ വര്ഷം ഡിസംബറില് ആരംഭിക്കുമെന്നും അവയവദാന പ്രവര്ത്തനങ്ങള് ഊര്ജ്ജിതമാക്കുമെന്നും മന്ത്രി വി.എസ്. ശിവകുമാര് അറിയിച്ചു. വിവിധ ചികിത്സാ വിഭാഗങ്ങളെ ഏകോപിപ്പിച്ചുകൊണ്ടുള്ള മള്ട്ടി ഡിസിപ്ലിനറി ഐ.സി.യു തിരുവനന്തപുരം മെഡിക്കല് കോളേജിലും സ്ഥാപിക്കുമെന്ന് അദ്ദേഹം പറഞ്ഞു.
ഇരുപത്തിയൊമ്പതാമത് ദേശീയ നേത്രദാനപക്ഷാചരണത്തിന്റെ ജില്ലാതല ഉദ്ഘാടനം തിരുവനന്തപുരം റീജിയണല് ഇന്സ്റ്റിറ്റിയൂട്ട് ഓഫ് ഒഫ്താല്മോളജിയില്, നിര്വ്വഹിച്ച് പ്രസംഗിക്കുകയായിരുന്നു അദ്ദേഹം. റീജിയണല് ഇന്സ്റ്റിറ്റിയൂട്ട് ഓഫ് ഒഫ്താല്മോളജിക്കുവേണ്ടി നിര്മ്മിക്കുന്ന സൂപ്പര് സ്പെഷ്യാലിറ്റി ബ്ലോക്ക്, മിഷന് 676 ല് ഉള്പ്പെടുത്തി ഉദ്ഘാടനം ചെയ്യും. സംസ്ഥാനത്ത്, സന്നദ്ധ നേത്രദാനത്തിലൂടെ, മുന്വര്ഷങ്ങളെ അപേക്ഷിച്ച് നാലിരട്ടി കണ്ണുകള് ലഭിച്ചത് ആശ്വാസകരമാണ്. നേത്രപടല അന്ധത ബാധിച്ച ഒട്ടേറെപ്പേര് സമൂഹത്തില് ഉള്ളതിനാല് സന്നദ്ധ നേത്രദാനത്തിനായി കൂടുതല്പേര് മുന്നോട്ടുവരണമെന്ന് മന്ത്രി അഭ്യര്ത്ഥിച്ചു.
നേത്രദാന സമ്മതപത്രം നല്കിയവരുടെ മരണാനന്തരം നിര്ദ്ദിഷ്ട സമയത്തിനകം അവരുടെ കണ്ണുകള് പ്രയോജനപ്പെടുത്തുന്നതിനുവേണ്ടി നേത്ര ബാങ്കിലെ മെഡിക്കല് സംഘത്തെ വിവരമറിയിക്കുന്ന കാര്യം വീട്ടുകാരും മറ്റ് ബന്ധുമിത്രാദികളും വിസ്മരിക്കരുതെന്ന് സമ്മേളനത്തില് അധ്യക്ഷതവഹിച്ച കെ. മുരളീധരന് എംഎല്എ അഭ്യര്ത്ഥിച്ചു. കഴിഞ്ഞ ഒരു വര്ഷത്തിനിടെ, നാല് ദിവസംമുതല് 90 വയസ്സുവരെ പ്രായമുള്ള ഇരുനൂറോളംപേരുടെ നേത്രങ്ങളാണ് തിരുവനന്തപുരം റീജിയണല് ഇന്സ്റ്റിറ്റിയൂട്ട് ഓഫ് ഒഫ്താല്മോളജിയില് ലഭിച്ചതെന്ന്, ഡയറക്ടര് ഡോ. സഹസ്രനാമം ചടങ്ങില് അറിയിച്ചു. ഒന്നാം വയസ്സില് മരണമടഞ്ഞ സ്വന്തം കുഞ്ഞിന്റെ കണ്ണുകള് ദാനംചെയ്ത പുല്ലുവിള സ്വദേശി വിജി ടോമി ഉള്പ്പെടെ, നേത്രദാതാക്കളുടെ ബന്ധുക്കളും സ്വീകര്ത്താക്കളും അനുഭവം പങ്കുവച്ചു. ജില്ലാ അന്ധതാനിവാരണ സൊസൈറ്റിയുടെയും ആരോഗ്യകേരളത്തിന്റെയും സംയുക്താഭിമുഖ്യത്തില് സെപ്തംബര് 8 വരെ തുടരുന്ന പക്ഷാചരണ പരിപാടിയില് മരണാനന്തര നേത്രദാനത്തിന്റെ പ്രസക്തിയെക്കുറിച്ച് വ്യാപകമായ ബോധവത്ക്കരണം നല്കും.
ചടങ്ങില് മേയര് കെ. ചന്ദ്രിക മുഖ്യപ്രഭാഷണം നടത്തി. ആര്.ഐ.ഒ ഡയറക്ടര് ഡോ. പി.എസ്. ഗിരിജാ ദേവി, സൂപ്രണ്ട് ഡോ. സഹസ്രനാമം, ഡി.എം.ഒ: ഡോ. കെ.എം. സിറാബുദ്ദീന്, ഡി.പി.എം: ഡോ. ബി. ഉണ്ണികൃഷ്ണന്, ഒഫ്താല്മോളജി ഡി.ഡി.എച്ച്.എസ് ഡോ. വി.വി. ഷെര്ളി, മെഡിക്കല് കോളേജ് പ്രിന്സിപ്പാള് ഡോ. രാംദാസ് പിഷാരടി, ഒഫ്താല്മോളജി സര്ജന് ഡോ. സി.വി. ശശികല, ജില്ലാ അന്ധതാ നിവാരണ സമിതി പ്രോഗ്രാം ഓഫീസര് ഡോ. സൂസന് മാത്യു എന്നിവര് സംസാരിച്ചു.
Discussion about this post