ന്യൂയോര്‍ക്ക്: ഐക്യരാഷ്ട്രസഭയുടെ ഫസ്റ്റ് കമ്മിറ്റിയുടെ 81-ാമത് സമ്മേളനത്തില്‍ പാകിസ്താന് ശക്തമായ തിരിച്ചടി നല്‍കി ഇന്ത്യ. അതിര്‍ത്തി കടന്നുള്ള ഭീകരവാദത്തിനെതിരെ സ്വയം പ്രതിരോധിക്കാന്‍ ഇന്ത്യക്ക് പൂര്‍ണ അവകാശമുണ്ടെന്ന് വ്യക്തമാക്കിയ ഇന്ത്യന്‍ നയതന്ത്രജ്ഞന്‍ അന്‍മോള്‍ ഷേര്‍ സിംഗ് ബേദി, ആണവ ഭീഷണികള്‍ ചൂണ്ടിക്കാട്ടി പ്രതിരോധ നടപടികളില്‍ നിന്ന് ഇന്ത്യയെ പിന്തിരിപ്പിക്കാനാവില്ലെന്ന് തുറന്നടിച്ചു.
26 സാധാരണക്കാരുടെ ജീവനെടുത്ത പഹല്‍ഗാം ഭീകരാക്രമണത്തിന് ശേഷമാണ് ഇന്ത്യ തിരിച്ചടി നല്‍കിയത്. ഈ നടപടികള്‍ തികച്ചും സ്വയം പ്രതിരോധത്തിന്റെ ഭാഗവും, അനാവശ്യ സംഘര്‍ഷങ്ങള്‍ ഒഴിവാക്കാന്‍ ലക്ഷ്യമിട്ടുള്ള അളന്നുമുറിച്ച നീക്കങ്ങളുമായിരുന്നു എന്ന് ഇന്ത്യ വ്യക്തമാക്കി. ഭീകരവാദത്തിന് മറയായി ആണവായുധങ്ങളെ ഉപയോഗിക്കാനാവില്ല. ‘നോണ്‍-സ്റ്റേറ്റ് ആക്ടറുകള്‍’ (ഭീകര സംഘടനകള്‍) നടത്തുന്ന ആക്രമണങ്ങളുടെ ഉത്തരവാദിത്തത്തില്‍ നിന്ന് അതിന് സഹായം നല്‍കുന്ന രാജ്യങ്ങള്‍ക്ക് (പാകിസ്താന്) ഒഴിഞ്ഞുമാറാനാകില്ല.
വിശ്വസ്തതയിലും സഹകരണത്തിലും അധിഷ്ഠിതമായാണ് സിന്ധു നദീജല കരാര്‍ ഒപ്പുവെച്ചത്. എന്നാല്‍ ആ അടിത്തറ തകര്‍ക്കുന്ന രീതിയില്‍ പ്രവര്‍ത്തിക്കുകയും അതേസമയം കരാറിന്റെ ആനുകൂല്യങ്ങള്‍ വേണമെന്ന് വാദിക്കുകയും ചെയ്യുന്നത് അംഗീകരിക്കാനാവില്ലെന്ന് ഇന്ത്യ ചൂണ്ടിക്കാട്ടി.
പാകിസ്താന്റെ എ.ക്യു. ഖാന്‍ ശൃംഖലയുടെ മുന്‍കാല ആണവ വ്യാപന ചരിത്രം ഓര്‍മിപ്പിച്ച ഇന്ത്യ, മുന്‍നിര സൈനിക സാങ്കേതികവിദ്യ കൈമാറ്റം ചെയ്യുമ്പോള്‍ രാജ്യങ്ങള്‍ അതീവ ജാഗ്രത പാലിക്കണമെന്നും ആവശ്യപ്പെട്ടു. ജമ്മു കാഷ്മീര്‍ ഇന്ത്യയുടെ അവിഭാജ്യ ഘടകമാണെന്നും, അനധികൃതമായി കൈയേറിയ പ്രദേശങ്ങള്‍ പാകിസ്താന് ഒഴിഞ്ഞ് തരണമെന്നും ഇന്ത്യ പ്രസ്താവനയിലൂടെ ആവശ്യപ്പെട്ടു.
